ຜ່ານຮ່າງປຶ້ມຄູ່ມືແນະນຳຂໍ້ມູນແຫຼ່ງທ່ອງທ່ຽວ

   ກອງປະຊຸມຜ່ານຮ່າງປຶ້ມຄູ່ມືແນະນໍາປ້າຍຊີບອກແຫຼ່ງທ່ອງທ່ຽວ ແລະປ້າຍນໍາເໜີຂໍ້ມູນແຫຼ່ງທ່ອງທ່ຽວໃນ ສປປ ລາວ ໄດ້ໄຂຂຶ້ນໃນທ້າຍອາທິດຜ່ານມາ ໂດຍການເປັນປະທານຮ່ວມຂອງທ່ານ ໄຊສົມບູນ ສຸວັນດາລາ ຮອງຫົວໜ້າພະແນກ ຖວທ ແຂວງຄໍາມ່ວນ ແລະທ່ານ ໄຊສົມບັດ ບຸນນະຜົນ ຮອງຫົວໜ້າກົມຄຸ້ມຄອງການທ່ອງທ່ຽວ, ມີບັນດາຕາງໜ້າພະແນກການ, ຕາງໜ້າແຂວງຈໍາປາສັກ, ວຽງຈັນ, ບໍລິຄໍາໄຊ, ສາລະວັນ, ສະຫວັນນະເຂດ, ຄໍາມ່ວນ, ມີຫ້ອງການ ຖວທ ເມືອງ ແລະພະນັກງານວິຊາການທີ່ກ່ຽວຂ້ອງເຂົ້າຮ່ວມ.

 ທ່ານ ໄຊສົມບັດ ບຸນນະຜົນ ກ່າວວ່າ: ສະພາບການທ່ອງທ່ຽວໃນໂລກເວົ້າລວມ, ເວົ້າສະເພາະຢູ່ ສປປ ລາວໄດ້ມີການເຕີບໃຫຍ່ຂະຫຍາຍຕົວຂຶ້ນຢ່າງຕໍ່ເນື່ອງຊຶ່ງໃນແຕ່ລະປີຈໍານວນນັກທ່ອງທ່ຽວກໍ່ນັບມື້ນັບມີຈໍານວນເພີ້ມຂຶ້ນເພື່ອຮອງຮັບ ແລະ ອໍານວຍຄວາມສະດວກໃຫ້ແກ່ນັກທ່ອງທ່ຽວທັງພາຍໃນ ແລະຕ່າງປະ ເທດທີ່ເດີນທາງທ່ອງທ່ຽວຕາມສະຖານທີ່ແຫຼ່ງທ່ອງທ່ຽວຕ່າງໆໃນ ສປປ ລາວ ປ້າຍຊີ້ບອກແຫຼ່ງທ່ອງທ່ຽວ ແລະປ້າຍນໍາສະເໜີຂໍ້ມູນແຫຼ່ງທ່ອງທ່ຽວແມ່ນມີຄວາມສໍາຄັນ ແລະຈໍາເປັນຕໍ່ການເຂົ້າເຖິງຂໍ້ມູນ ແລະແຫຼ່ງທ່ອງທ່ຽວທີ່ສໍາຄັນຕ່າງໆສໍາລັບນັກທ່ອງທ່ຽວ. ເນື່ອງຈາກວ່າໃນສະພາບປະຈຸບັນປ້າຍຊີ້ບອກແຫຼ່ງ ທ່ອງທ່ຽວ ແລະປ້າຍນໍາສະເໜີຂໍ້ມູນແຫຼ່ງທ່ອງທ່ຽວຢູ່ ສປປ ລາວ ແມ່ນມີຄວາມຈໍາກັດດ້ານປະລິມານ ແລະ ເນື້ອໃນຍ້ອນຂາດຄູ່ມືແນະນໍາກ່ຽວກັບປ້າຍຊີ້ບອກແຫຼ່ງທ່ອງທ່ຽວ ແລະ ປ້າຍນໍາສະເໜີຂໍ້ມູນແຫຼ່ງທ່ອງທ່ຽວ, ການກໍານົດການຕິດຕັ້ງ, ອອກແບບ, ເນື້ອໃນ ແລະຫຼັກການອົງການປະກອບຂອງປ້າຍພ້ອມທັງຂໍ້ກໍານົດແນະນໍາຕ່າງໆກ່ຽວກັບປ້າຍການທ່ອງທ່ຽວເພື່ອຄວາມເປັນເອກະພາບໃນການຈັດຕັ້ງປະຕິບັດໃນທົ່ວປະເທດ .

  ຈາກນັ້ນທ່ານ ບຸນເສີດ ໄຊຍະແສງ ຮອງຫົວໜ້າພະແນກຄຸ້ມຄອງທຸລະກິດທີ່ພັກແຮມກົມຄຸ້ມຄອງການທ່ອງທ່ຽວແມ່ນໄດ້ນໍາສະເໜີຮ່າງປຶ້ມຄູ່ມືແນະນໍາປ້າຍຊີ້ບອກແຫຼ່ງທ່ອງທ່ຽວ ແລະປ້າຍນໍາສະເໜີຂໍ້ມູນແຫຼ່ງທ່ອງທ່ຽວໃນ ສປປ ລາວ ຊຶ່ງບົດຮຽນທີ່ນໍາສະເໜີໃນກອງປະຊຸມລວມມີທັງໝົດ 3 ພາກຄື: 1 ກ່ຽວກັບຄວາມເປັນມາ ແລະ ຂອບເຂດການນໍາໃຊ້ ແລະ3 ການດໍາເນີນການກ່ຽວກັບປ້າຍ ແລະຂັ້ນຕອນການຂໍອະນຸຍາດດໍາເນີນກິດຈະການກ່ຽວກັບປ້າຍ. ພ້ອມກັນນັ້ນຜູ້ເຂົ້າຮ່ວມກອງປະຊຸມທັງໝົດຍັງໄດ້ປຶກສາຫາລື ແລະ ປະກອບຄໍາຄິດເຫັນໃສ່ຮ່າງປຶ້ມຄູ່ມືແນະນໍາປ້າຍຊີ້ບອກແຫຼ່ງທ່ອງທ່ຽວ ແລະ ປ້າຍນໍາສະເໜີຂໍ້ມູນແຫຼ່ງທ່ອງທ່ຽວໃນ ສປປ ລາວ .

ໂດຍ: ວົງມະນີ

• 27/03/2019