ຮອງຜູ້ອຳນວຍການໃຫຍ່ ຄົນໃໝ່ພ້ອມຜູ້ຊ່ວຍອຳນວຍການ ກາເຟດາວ ຖືກແຕ່ງຕັ້ງ

ເພື່ອຂັບເຄື່ອນໃຫ້ທຸລະກິດຂອງກາເຟດາວໄປໃນທິດທາງທີ່ລັດຖະບານກໍ່ຄືກະຊວງການເງິນກຳນົດໄວ້ໃນນາມຜູ້ຖືຮຸ້ນ 56% ຫຼ້າສຸດໄດ້ປະກາດແຕ່ງຕັ້ງພະນັກງານຈາກກະຊວງມາຊ່ວຍບໍລິຫານທຸລະກິດເປັນຮອງຜູ້ອຳນວຍການໃຫຍ່ ແລະຜູ້ຊ່ວຍອຳນວຍການຫວັງສ້າງໃຫ້ທຸລະກິດໄປໃນທິດທາງດຽວກັນ ແລະເປົ້າໝາຍຄືການປົດແອກໜີ້ສິນ ແລະກ້າວໄປສູ່ການສ້າງຜົນກຳໄລສູງສຸດໃນແຕ່ລະປີ.

ພິທີດັ່ງກ່າວ ມີຂຶ້ນໃນວັນທີ 5 ສິງຫາຜ່ານມາທີ່ລັດວິສາຫະກິດກາເຟດາວ ເມືອງບາຈຽງ ຈະເລີນສຸກ ແຂວງຈຳປາສັກ, ໂດຍໃຫ້ກຽດເຂົ້າຮ່ວມເປັນປະທານຂອງທ່ານ ໄຊສົມເພັດ ນໍຣະສິງ ຫົວໜ້າສົ່ງເສີມການຄ້າກະຊວງອຸດສາຫະກຳ ແລະການຄ້າ, ທັງເປັນຮອງປະທານສະພາບໍລິຫານບໍລິສັດລັດວິສາຫະກິດກາເຟດາວ ຈຳກັດ, ມີ ທ່ານ ວັນນະດາພົມມະສະຖິດຜູ້ອໍານວຍການໃຫຍ່ລັດວິສາຫະກິດກາເຟດາວ ຈຳກັດ, ທ່ານ ນາງ ບຸນເຮືອງ ແຄລ໌ ລິດ ດັ່ງ ຄະນະສະພາບໍລິຫານບໍລິສັດລັດວິສາຫະກິດກາເຟດາວ ຈຳກັດ ແລະບັນດາທ່ານແຂກຜູ້ໃຫຍ່ທີ່ກ່ຽວຂ້ອງ, ບັນດາພະນັກງານ, ວິຊາການແຕ່ ລະຂະແໜງການພາຍໃນບໍລິສັດ ຂົ້າຮ່ວມ.

ການແຕ່ງຕັ້ງຄັ້ງນີ້ປະກອບມີ ທ່ານ ວິຖະໜອມ ແກ້ວຄູນສີ ຮອງຫົວໜ້າພະແນກ, ກົມນະໂຍບາຍການເງິນກະຊວງການເງິນເປັນຮອງຜູ້ອຳນວຍການລັດວິສາຫະກິດກາເຟດາວ ຈໍາກັດ ແລະແຕ່ງຕັ້ງທ່ານ ພັນທອງ ວັນທາວົງ ຮອງຫົວໜ້າພະແນກຄຸ້ມຄອງລາຍຮັບບໍ່ແມ່ນພາສີ ແລະສ່ວຍສາອາກອນ, ກົມສ່ວຍສາອາກອນກະຊວງການເງິນເປັນຜູ້ຊ່ວຍວຽກຜູ້ອຳນວຍການບໍລິສັດ.

ການແຕ່ງຕັ້ງຮອງຜູ້ອຳນວຍການ ແລະຜູ້ຊ່ວຍອຳນວຍການໃນຄັ້ງນີ້ແມ່ນທັງສອງທ່ານຈະເຮັດໜ້າທີ່ຕາມພາລະບົດບາດ, ໜ້າທີ່,ຂອບເຂດສິດ ແລະຄວາມຮັບຜິດຊອບຢ່າງຖືກຕ້ອງກັບລະບຽບການທີ່ກ່ຽວຂ້ອງ ແລະກົດໝາຍຕ່າງໆຂອງ ສປປ ລາວ ວາງອອກ, ພ້ອມນັ້ນໃຫ້ສະຫຼຸບຜົນການເຄື່ອນໄຫວການຈັດຕັ້ງປະຕິບັດວຽກງານເພື່ອລາຍງານ ຕໍ່ຄະນະນໍາກະຊວງການເງິນຮັບ ຊາບຢ່າງເປັນປົກຄະຕິຕາມລະບຽບການ, ຊຶ່ງຫ້ອງການກະຊວງການເງິນ, ກົມຈັດຕັ້ງ ແລະພະນັກງານ, ກົມນະໂຍບາຍການເງິນ, ກົມປະຕິຮູບລັດວິສາຫະກິດ ແລະການປະກັນໄພທ່ານທີ່ຖືກແຕ່ງຕັ້ງ ແລະທຸກພາກສ່ວນທີ່ກ່ຽວຂ້ອງຈົ່ງຮັບຮູ້ ແລະຈັດຕັ້ງປະຕິບັດຂໍ້ຕົກລົງຢ່າງເຂັ້ມງວດ.

ໂດຍ: ໂພທິລາດ

• 08/08/2022