ຄະນະຜູ້ແທນລາວ ສືບຕໍ່ເຂົ້າຮ່ວມກອງປະຊຸມລັດຖະມົນຕີຕ່າງປະເທດ ພາຍໃຕ້ຂອບກອງປະຊຸມສຸດຍອດອາຊີຕາເວັນອອກ

ໃນວັນທີ 5 ສິງຫາທີ່ຜ່ານມາ, ທ່ານ ສະເຫຼີມໄຊ ກົມມະສິດຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສືບຕໍ່ນໍາພາຄະນະຜູ້ແທນລາວ ເຂົ້າຮ່ວມກອງປະຊຸມລັດຖະມົນຕີຕ່າງປະເທດພາຍໃຕ້ຂອບກອງປະຊຸມສຸດຍອດອາຊີຕາເວັນອອກ ຄັ້ງທີ 12 ແລະກອງປະຊຸມເວທີພາກພື້ນອາຊຽນ ຄັ້ງທີ 29 ທີ່ພະນົມເປັນ, ກໍາປູເຈຍ.

ກອງປະຊຸມລັດຖະມົນຕີຕ່າງປະເທດ ພາຍໃຕ້ຂອບກອງປະຊຸມສຸດຍອດອາຊີຕາເວັນອອກ ຄັ້ງທີ 12 ໄດ້ຢໍ້າຄືນຄວາມສໍາຄັນຂອງກົນໄກກອງປະຊຸມສຸດຍອດອາຊີຕາເວັນອອກ ໃນຖານະເປັນເວທີຂອງຜູ້ນໍາ ເພື່ອປຶກສາຫາລື ແລະ ສົ່ງເສີມການຮ່ວມມືໃນຂົງເຂດຍຸດທະສາດທາງດ້ານການເມືອງ ແລະ ເສດຖະກິດ ທີ່ມີຄວາມສົນໃຈ ແລະ ມີຜົນປະໂຫຍດຮ່ວມກັນ ໂດຍແນໃສ່ປົກປັກຮັກສາ ແລະ ສົ່ງເສີມສັນຕິພາບ, ສະຖຽນລະພາບ ແລະ ຄວາມສົມບູນພູນສຸກໃນພາກພື້ນ ກໍຄື ໃນໂລກ. ພ້ອມທັງທົບທວນຄືນ ແລະຊົມເຊີຍຄວາມຄືບໜ້າຂອງ ການຈັດຕັ້ງປະຕິບັດແຜນປະຕິບັດງານ ໄລຍະ 2018-2022 ໃນຂົງເຂດຕ່າງໆເຊັ່ນ: ສິ່ງແວດລ້ອມ ແລະ ພະລັງງານ, ການສຶກສາ, ການເງິນ,ວຽກງານສາທາລະນະສຸກ ແລະພະຍາດລະບາດ, ການຄຸ້ມຄອງໄພພິບັດ, ການເຊື່ອມຈອດ, ເສດຖະກິດ ແລະການຄ້າ, ຄວາມໝັ້ນຄົງດ້ານສະບຽງອາຫານ, ການຮ່ວມມືທາງທະເລ ແລະ ອື່ນໆ. ພ້ອມນີ້, ກອງປະຊຸມ ຍັງໄດ້ຢືນຢັນຄວາມໝາຍໝັ້ນ ເພື່ອຮັດແໜ້ນ ແລະເສີມຂະຫຍາຍການຮ່ວມມືໃນຂົງເຂດເຫລົ່ານີ້, ລວມທັງຊຸກຍູ້ການຮ່ວມມືໃນຂົງເຂດໃໝ່ ເພື່ອຮັບມືກັບພະຍາດໂຄວິດ-19 ກໍຄື ພະຍາດລະບາດທີ່ຈະເກີດຂຶ້ນໃໝ່ ແລະ ຟື້ນຟູເສດຖະກິດຫລັງໂຄວິດ-19 ເປັນຕົ້ນແມ່ນການຮັບປະກັນຄວາມໂລ່ງລ່ຽນຂອງຕ່ອງໂສ້ການຜະລິດ, ຄວາມໝັ້ນຄົງດ້ານພະລັງງານ ແລະສະບຽງອາຫານ, ການພັດທະນາແບບຍືນຍົງ, ການຫລຸດຜ່ອນຄວາມທຸກຍາກ, ການທ່ອງທ່ຽວ, ຄວາມປອດໄພ ແລະຄວາມໝັ້ນຄົງທາງທະເລ ແລະອື່ນໆ.

ສໍາລັບກອງປະຊຸມເວທີພາກພື້ນອາຊຽນຄັ້ງທີ 29,ບັນດາລັດຖະມົນຕີໄດ້ທົບທວນຄືນການຮ່ວມມືໃນໄລຍະຜ່ານມາ ແລະສະແດງຄວາມຊົມເຊີຍຕໍ່ຄວາມຄືບໜ້າໃນການຈັດຕັ້ງປະຕິບັດຖະແຫລງການວິໄສທັດເວທີພາກພື້ນອາຊຽນໂດຍສະເພາະແມ່ນການຈັດຕັ້ງປະຕິບັດບັນດາກິດຈະກໍາສົ່ງເສີມການສ້າງຄວາມໄວ້ເນື້ອເຊື່ອໃຈເຊິ່ງກັນແລະ ກັນ ແລະການທູດປ້ອງກັນເຫດ.

ຕໍ່ສະພາບການພາກພື້ນທີ່ພວມຜັນແປຄວບຄູ່ກັບສິ່ງທ້າທາຍໃນພາກພື້ນອາຊີ-ປາຊີຟິກ, ກອງປະຊຸມ ໄດ້ຢໍ້າຄືນບົດບາດຂອງອາຊຽນທີ່ເປັນກໍາລັງຂັບເຄື່ອນສໍາຄັນຂອງເວທີພາກພື້ນອາຊຽນ ໃນການຮັບມືກັບບັນດາສິ່ງທ້າທາຍ ແລະ ໄດ້ຊຸກຍູ້ປະເທດເຂົ້າຮ່ວມເວທີພາກພື້ນອາຊຽນ ສືບຕໍ່ຈັດຕັ້ງປະຕິບັດກິດຈະກໍາການທູດປ້ອງກັນເຫດ ກໍຄືການສົ່ງເສີມການສ້າງຄວາມໄວ້ເນື້ອເຊື່ອໃຈເຊິ່ງກັນ ແລະກັນ ທີ່ສອດຄ່ອງກັບບັນດາຫລັກການຂອງກົນໄກເວທີພາກພື້ນອາຊຽນ ແລະຮັດແໜ້ນການຮ່ວມມືໃນການຕ້ານພະຍາດໂຄວິດ-19 ແລະການຟື້ນຟູຫລັງໂຄວິດ-19.

ກອງປະຊຸມໄດ້ຮັບຮອງເອົາ 3 ເອກະສານສໍາຄັນ ຄື: ກິດຈະກໍາການຮ່ວມມືຂອງເວທີພາກພື້ນອາຊຽນສໍາລັບສົກປີ 2022-2023, ໃນນັ້ນ ສປປ ລາວ, ສປ ຈີນ ແລະ ການາດາ ໄດ້ສືບຕໍ່ເປັນປະທານຮ່ວມ ກອງປະຊຸມກາງສະໄໝເວທີພາກພື້ນອາຊຽນ ກ່ຽວກັບການບັນເທົາທຸກໄພພິບັດ ສໍາລັບປີ 2023; ຖະແຫລງການເວທີພາກພື້ນອາຊຽນກ່ຽວກັບການສົ່ງເສີມສັນຕິພາບ, ສະຖຽນລະພາບ ແລະວັດທະນາຖາວອນຜ່ານບັນດາມາດຕະການການສ້າງຄວາມໄວ້ເນື້ອເຊື່ອໃຈ ແລະ ການທູດປ້ອງກັນເຫດ; ແລະຖະແຫລງການເວທີພາກພື້ນອາຊຽນກ່ຽວກັບການຢໍ້າຄືນຄວາມໝາຍໝັ້ນເພື່ອຮັກສາອາຊີຕາເວັນອອກສ່ຽງໃຕ້ເປັນເຂດປອດອາວຸດນິວເຄລຍ.

ໃນວັນດຽວກັນ, ທ່ານ ສະເຫລີມໄຊ ກົມມະສິດ ຍັງໄດ້ພົບປະສອງຝ່າຍກັບ ທ່ານ ປາກ ຈິນ (Park Jin) ລັດຖະມົນຕີຕ່າງປະເທດ ແຫ່ງສາທາລະນະລັດ ເກົາຫລີ ເຊິ່ງສອງຝ່າຍໄດ້ປຶກສາຫາລື ແລະ ແລກປ່ຽນຄຳຄິດເຫັນກ່ຽວກັບການຮ່ວມມືດ້ານເສດຖະກິດ, ການຄ້າ, ການລົງທຶນໃນຂະແໜງການຕ່າງໆ, ການສົ່ງເສີມການທ່ອງທ່ຽວພາຍຫລັງເປີດປະເທດ ແລະ ການໄປມາຫາສູ່ແລກປ່ຽນການຢ້ຽມຢາມພາຍຫລັງສະພາບການແພ່ລະບາດຂອງພະຍາດໂຄວິດ-19 ໄດ້ຜ່ອນຄາຍລົງໂດຍສະເພາະການປຶກສາຫາລືກ່ຽວກັບການແກ້ໄຂບັນຫາເສດຖະກິດ ແລະການເງິນໃນປັດຈຸບັນທີ່ໄດ້ຮັບຜົນກະທົບຈາກການແພ່ລະບາດຂອງພະຍາດໂຄວິດ-19, ບັນຫາດ້ານພະລັງງານລວມເຖິງການປຶກສາຫາລືສະພາບການພາກພື້ນ ແລະສາກົນທີ່ພວມຜະເຊີນໜ້າກັບສິ່ງທ້າທາຍຫຼາຍຢ່າງ ແລະອື່ນໆ.

แชร์