ຈຳປາສັກ ດຳເນີນກອງປະຊຸມຄົບຄະນະບໍລິຫານງານພັກແຂວງ ຄັ້ງທີ 8 ສະໄໝທີ VIII

ໃນວັນທີ 8 ກໍລະກົດ 2022 ກອງປະຊຸມຄົບຄະນະບໍລິຫານງານພັກແຂວງຈໍາປາສັກ ຄັ້ງທີ 8 ສະໄໝທີ VIII ໂດຍການເປັນປະທານຂອງ ທ່ານ ວິໄລວົງ ບຸດດາຄຳ ເລຂາພັກແຂວງ, ເຈົ້າແຂວງຈຳປາສັກ, ມີທ່ານຮອງເລຂາພັກແຂວງ, ຄະນະປະຈຳພັກແຂວງ, ກໍາມະການພັກແຂວງ, ເລຂາພັກເມືອງ, ເລຂາຄະນະພັກ-ໜ່ວຍພັກຮາກຖານ ແລະ ພະແນກການ, ກົມກອງອ້ອມຂ້າງແຂວງເຂົ້າຮ່ວມ.

ໂອກາດນີ້, ທ່ານ ວິໄລວົງ ບຸດດາຄຳ ໄດ້ກ່າວວ່າ: ກອງປະຊຸມຄັ້ງນີ້, ພວກເຮົາຈະໄດ້ພ້ອມກັນເຊື່ອມຊຶມມະຕິກອງປະຊຸມຄົບຄະນະຄັ້ງທີ 4 ສະໃຫມທີ XI ຂອງສູນກາງພັກ, ມະຕິກອງປະຊຸມລັດຖະບານເປີດກວ້າງ ຄັ້ງທີ I ປະຈຳປີ 2022 ແລະ ຮັບຟັງການລາຍງານຜົນສຳເລັດກອງປະຊຸມສາມັນເທື່ອທີ 3 ຂອງສະພາແຫ່ງຊາດ ຊຸດທີ IX, ຄຽງຄູ່ກັນນັ້ນພວກເຮົາຈະໄດ້ພ້ອມກັນສະຫຼຸບຕີລາຄາການນຳພາ-ຊີ້ນໍາວຽກງານຮອບດ້ານ ຂອງຄະນະບໍລິຫານງານພັກແຂວງ ໃນໄລຍະ 6 ເດືອນ ຕົ້ນປີ 2022 ທີ່ຜ່ານມາ, ຕີລາຄາການນຳພາ ແລະ ໃຫ້ທິດຊີ້ນໍາຕໍ່ກັບວຽກງານໃນບາງຂົງເຂດ ໂດຍສະເພາະ ການນຳພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ ຕິດພັນກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ການນຳພາວຽກງານກໍ່ສ້າງຮາກຖານການເມືອງ, ພັດທະນາຊົນນະບົດຮອບດ້ານ ແລະວຽກງານ 3 ສ້າງ, ການນຳພາຜັນຂະຫຍາຍຈັດຕັ້ງປະຕິບັດແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານຂອງພັກຕິດພັນກັບການຈັດຕັ້ງປະຕິບັດວາລະແຫ່ງຊາດ-ວາລະຂອງແຂວງ ວ່າດ້ວຍການແກ້ໄຂບັນຫາຢາເສບຕິດ, ການນຳພາການປັງປຸງກົງຈັກການຈັດຕັ້ງ ພັກ-ລັດຕິດພັນກັບ ການສ້າງແຜນກຳນົດພະນັກ ງານນຳພາ-ຄຸ້ມຄອງ ໃນທົ່ວແຂວງ ແລະຕໍ່ກັບການນຳພາວຽກງານບາງຂອງຂະແໜງການອື່ນໆ ຈຳນວນໜຶ່ງ.

ໃນກອງປະຊຸມຄັ້ງນີ້,ຈະໄດ້ດໍາເນີນແຕ່ວັນທີ 8-12 ສິງຫາ 2022,ພ້ອມນັ້ນຍັງຈະໄດ້ເປີດບັ້ນດຳເນີນຊີວິດການເມືອງແນໃສ່ເພີ່ມທະວີຄວາມສາມັກຄີເປັນເອກະພາບ ແລະເຊີດຊູບົດບາດການນຳພາລວມຂອງອົງຄະນະພັກ ກໍຄື ຂອງແຕ່ລະທ່ານທີ່ຮັບຜິດຊອບໃນແຕ່ລະຂົງເຂດວຽກງານ. ຈາກນັ້ນ, ຈະໄດ້ຮັບຮອງເອົາມະຕິກອງປະຊຸມຄົບຄະນະຄັ້ງທີ 8 ສະໃຫມທີ VIII ຂອງຄະນະບໍລິຫານງານພັກແຂວງ ເພື່ອສືບຕໍ່ຊີ້ນຳ-ນຳພາທົ່ວພັກ, ທົ່ວປວງຊົນບັນດາເຜົ່າພາຍໃນແຂວງຈັດຕັ້ງປະຕິບັດມະຕິກອງປະຊຸມ ໃຫຍ່ຄັ້ງທີ XI ຂອງພັກ, ມະຕິກອງປະຊຸມໃຫຍ່ຄັ້ງທີ VIII ຂອງອົງຄະນະພັກແຂວງໃຫ້ເກີດໝາກເກີດຜົນ ແລະການເປັນຂະບວນການຂອງມະຫາຊົນຢ່າງກວ້າງຂວາງຕື່ມອີກ.

ຂ່າວ: ທັດຊະນະ

แชร์