ທະນາຄານ ເອຊີລີດາ ລາວ ຈຳກັດ ເພີ່ມວົງເງິນໂອນຜ່ານເອຊີລີດາໂມບາຍ ສູງເຖິງ 1,5 ຕື້ກີບ

ປັດຈຸບັນ ການບໍລິການດີຈິຕອລມີບົດບາດສຳຄັນຫຼາຍໃນຊີວິດປະຈຳວັນຂອງຄົນເຮົາ ເຊິ່ງ ແອັບ ເອຊີລີດາໂມບາຍ ຂອງທະນາຄານ ເອຊີລີດາ ລາວ ຈຳກັດ ກໍ່ເປັນອີກໜຶ່ງແອັບພິເຄຊັ່ນບໍລິການເທິງມືຖື (FinTech) ທີ່ນຳໃຊ້ກັບໂທລະສັບສະມາດໂຟນທີ່ມີລະບົບປະຕິບັດການ iOS, Android ເຊິ່ງລູກຄ້າສາມາດເຮັດທຸລະກຳທາງການເງິນຜ່ານໂທລະສັບມືຖືຂອງຕົນເອງໄດ້ທຸກທີ່, ທຸກເວລາ ດ້ວຍຄວາມສະດວກສະບາຍ ແລະ ມີຄວາມປອດໄພສູງ.
ທະນາຄານ ເອຊີລີດາ ລາວ ຈຳກັດ, ປະຊາທະນາຄານທີ່ທ່ານໄວ້ວາງໃຈ ແລະ ມີວິໄສທັດເປັນຜູ້ນໍາໃນດ້ານທະນາຄານເພື່ອທຸລະກິດຂະໜາດນ້ອຍ ແລະ ຂະໜາດກາງໃນ ສປປ ລາວ ເຫັນໄດ້ເຖິງຄວາມສຳຄັນໃນການເຮັດທຸລະກຳຕ່າງໆຜ່ານເອຊີລີດາໂມບາຍໂດຍສະເພາະການຊຳລະເງິນ, ດັ່ງນັ້ນ ເພື່ອຕອບສະໜອງຄວາມຮຽກຮ້ອງຕ້ອງການຂອງລູກຄ້າ ແລະ ເຮັດໃຫ້ການບໍລິການດ້ານການຊຳລະເງິນມີຄວາມສະດວກສະບາຍຂຶ້ນຕື່ມ ທະນາຄານຈຶ່ງໄດ້ເພີ່ມວົງເງິນໂອນຜ່ານທາງເອຊີລີດໂມບາຍ ສູງເຖິງ 1,5 ຕື້ກີບຕໍ່ມື້ ໂດຍບໍ່ມີຄ່າທຳນຽມສຳລັບການໂອນເງິນ.
ທ່ານນາງ ໄກສອນ ລິນທອງ, ຫົວໜ້າພະແນກການຕະຫຼາດຂອງທະນາຄານ ເອຊີລີດາ ລາວ ຈຳກັດ ໄດ້ກ່າວວ່າ "ເປັນເວລາຫຼາຍກວ່າ 04 ປີແລ້ວ ທີ່ທະນາຄານ ເອຊີລີດາ ລາວ ໄດ້ໃຫ້ການບໍລິການ ເອຊີລີດາໂມບາຍ ແລະ ສືບຕໍ່ພັດທະນາຟັງຊັ່ນທີ່ມີຄວາມປອດໄພ ແລະ ສະດວກສະບາຍຕໍ່ການນຳໃຊ້ ເພື່ອຕອບສະໜອງຄວາມຕ້ອງການຂອງລູກຄ້າ ແລະ ປະຊາຊົນໃນຍຸກດິຈິຕອລ. ຈົນມາຮອດປັດຈຸບັນນີ້, ມີລູກຄ້າຫຼາຍກວ່າ 100,000 ຄົນນຳໃຊ້ແອັບ ເອຊີລີດາໂມບາຍ ຂອງພວກເຮົາ.
ລູກຄ້າຜູ້ທີ່ມີ ເອຊີລີດາໂມບາຍ ສາມາດໃຊ້ງານ ແລະ ເຂົ້າເຖິງການບໍລິການຂອງທະນາຄານໄດ້ທຸກທີ່ ແລະ ທຸກເວລາໂດຍບໍ່ຕ້ອງເຂົ້າມາຫ້ອງການຂອງ ທະນາຄານ ເພາະເອຊີລີດາໂມບາຍ ມີຫຼາກຫຼາຍຟັງຊັ່ນທີ່ຊ່ວຍໃຫ້ລູກຄ້າສາມາດເຮັດທຸລະກຳໄດ້ດ້ວຍຕົນເອງເຊັ່ນ: ລົງທະບຽນເງິນກູ້, ການຖອນເງິນດ່ວນ, ການຊຳລະຄ່ານ້ຳປະປາ, ຊຳລະຄ່າໄຟຟ້າ, ຊຳລະສິນເຊື່ອ, ປະກັນໄພ, ຕື່ມມູນຄ່າໂທ, ໂອນເງິນ,ຈ່າຍຜ່ານຄິວອາໂຄດ, ກວດຍອດເງິນໃນບັນຊີ, ກວດອັດຕາແລກປ່ຽນປະຈຳວັນ ແລະ ອີກຫຼາກຫຼາຍຟັງຊັ່ນໃໝ່ທີ່ກຽມຈະໃຫ້ບໍລິການໃນໄວໆນີ້. ພິເສດ ການນຳໃຊ້ແອັບເຊີລີດາໂມບາຍຂອງພວກເຮົາແມ່ນບໍ່ເສຍຄ່າທຳນຽມ.

ທະນາຄານ ເອຊີລີດາ ລາວ ຈຳກັດ ເປັນທະນາຄານທຸລະກິດຕ່າງປະເທດທີ່ດຳເນີນທຸລະກິດໃນ ສປປ ລາວ ມາຫຼາຍກວ່າ 14 ປີ. ໃນລະດັບພູມີພາກ, ກຸ່ມເອຊີລີດາມີ ທະນາຄານ ເອຊີລີດາ ມະຫາຊົນ ເຊິ່ງເປັນບໍລິສັດແມ່ ແລະ ມີ 4 ບໍລິສັດລູກທີ່ດຳເນີນທຸລະກິດໃນປະເທດກຳປູເຈຍ, ລາວ ແລະ ມຽນມາ ທີ່ໃຫ້ບໍລິການລູກຄ້າຫລາຍລ້ານຄົນ ແລະ ບໍລິການໂອນເງິນໄປທົ່ວໂລກ.

แชร์