ຮອງນາຍົກລົງຊູກຍູ້ວຽກງານຢູ່ເຂດເສດຖະກິດກວມລວມໄຊເສດຖາ

ໃນວັນທີ 5 ສິງຫາ 2022 ທ່ານ ສອນໄຊ ສີພັນດອນ ຮອງນາຍົກລັດຖະມົນຕີພ້ອມດ້ວຍຄະນະໄດ້ລົງຊຸກຍູ້ການຈັດຕັ້ງປະຕິບັດວຽກງານຢູ່ເຂດເສດຖະກິດກວມລວມໄຊເສດຖາ ນະຄອນຫຼວງວຽງຈັນ ເພື່ອເຮັດໃຫ້ການດຳເນີນກິດຈະການຕ່າງໆຢູ່ພາຍໃນເຂດເສດຖະກິດດັ່ງກ່າວ, ໃຫ້ມີຄວາມໂລ່ງລ່ຽນ,ຖືກຕ້ອງຕາມລະບຽບຫຼັກການ ແລະ ແນວທາງນະໂຍບາຍທີ່ພັກ, ລັດຖະບານວາງອອກ, ທັງນີ້, ແນໃສ່ໃຫ້ເຂດເສດຖະກິດກວມລວມໄຊເສດຖາໄດ້ຮັບການພັດທະນາ ແລະ ສືບຕໍ່ຜະລິດສິນຄ້າຕ່າງໆ ໃຫ້ໄດ້ຄຸນນະພາບ, ໄດ້ມາດຕະຖານ ແລະສາມາດຕອບສະໜອງ ຕາມຄວາມຕ້ອງການຂອງຕະຫຼາດທັງພາຍໃນ ແລະຕ່າງປະເທດ.

ໃນໂອກາດນີ້, ທ່ານ ຂຽງຄຳ ພຸດຈັນທະວົງ ຮອງຜູ້ອຳນວຍການໃຫຍ່ບໍລິສັດຮ່ວມທຶນລາວ-ຈີນໄດ້ລາຍງານໃຫ້ຮູ້ວ່າ: ປັດຈຸບັນເຂດພັດທະນາກວມລວມໄຊເຊດຟາ ນະຄອນຫຼວງວຽງຈັນ ມີຫົວໜ່ວຍວິສາຫະກິດເຊັນສັນຍາທັງໝົດ 114 ບໍລິສັດ, ໃນນັ້ນ 57 ບໍລິສັດໄດ້ເລີ່ມທໍາການຜະລິດ ແລະ 57 ບໍລິສັດກໍາລັງກະກຽມເບື້ອງຕົ້ນ ແລະກໍາລັງດໍາເນີນການກໍ່ສ້າງຊຶ່ງເປັນນັກລົງທຶນທີ່ມາຈາກ 7 ປະເທດເຊັ່ນ: ຈີນ, ໄທ, ຍີ່ປຸ່ນ, ມາເລເຊຍ, ສິງກະໂປ, ລາວ ແລະສະຫະລັດອາເມຣິກາ ຄາດວ່າພາຍຫຼັງບັນດາບໍລິສັດດັ່ງກ່າວລົງມືທຳການຜະລິດສາມາດສ້າງມູນຄ່າຜະລິດຈະພັນທັງໝົດ 1,8 ຕື້ໂດລາ ແລະສາມາດສ້າງວຽກເຮັດງານທຳໄດ້ຫຼາຍກວ່າ 10.000 ກ່າວຄົນ.

ທ່ານ ຫວັງ ຕື່ນເທົ່າ ຮອງຜູ້ອຳນວຍການບໍລິສັດ ເປໂຕຣເຄມີ ລາວຈຳກັດ ໄດ້ກ່າວວ່າ: ບໍລິສັດ ເປໂຕຣເຄມີ ລາວ ຈຳກັດແມ່ນໂຮງກັ່ນແຫ່ງທຳອິດ ແລະແມ່ນໂຮງກັ່ນໜື່ງດຽວໃນປະເທດລາວ ຊຶ່ງເລີ່ມສ້າງຕັ້ງຂຶ້ນໃນປີ 2014 ແລະ ເລີ່ມຈຳໜ່າຍໃນ ປີ 2021 ດ້ວຍກຳລັງການຜະລິດ1.000.000 ໂຕນຕໍ່ປີ ປັດຈຸບັນແມ່ນໄດ້ຢຸດທໍາການຜະລິດຕັ້ງແຕ່ເດືອນກຸມພາ 2022 ແລະພວມດຳເນີນການເຈລະຈາກັບຂະແໜງການທີ່ກ່ຽວຂ້ອງຂອງລັດ ໂດຍສະເພາະ ການຍົກເວັ້ນພາສີນຳເຂົ້າວັດຖຸດິບ ຂະນະດຽວກັນກໍສະເໜີໃຫ້ລັດຖະບານເກັບພາສີພາຍໃນເວລາທີ່ບໍລິສັດຈຳໜ່າຍນໍ້າມັນເຊື້ອໄຟໃຫ້ກັບບັນດາບໍລິສັດເຊື້ອໄຟພາຍໃນປະເທດ.

ໃນໂອກາດນີ້, ທ່ານ ສອນໄຊ ສີພັນດອນ ໄດ້ຊົມເຊີຍຕໍ່ການຈັດຕັ້ງປະຕິບັດວຽກງານຂອງ ບໍລິສັດ ເປໂຕຣເຄມີ ລາວ ແລະບໍລິສັດຄວາມຫວັງໃໝ່ຊຶ່ງຍາມໃດກໍໄດ້ເອົາໃຈໃສ່ໃນການປະຕິບັດໜ້າທີ່ວຽກງານວິຊາສະເພາະຂອງຕົນເປັນຕົ້ນແມ່ນຜະລິດເພື່ອສະໜອງໃຫ້ແກ່ສັງຄົມທັງເປັນການພັດທະນາ ສປປ ລາວ ແລະສ້າງລາຍຮັບໃຫ້ປະເທດພ້ອມດຽວກັນນີ້ທ່ານ ສອນໄຊ ສີພັນດອນ ໄດ້ຮຽກຮ້ອງໃຫ້ຜູ້ປະກອບການປະຕິບັດມາດຕະການປ້ອງກັນພະຍາດໂຄວິດ-19 ໂດຍສະເພາະເລັ່ງໃຫ້ພະນັກງານໄປສັກວັກຊິນ ເຂັມ 3 ແລະເຂັມ 4, ຕ້ອງປະສານສົມທົບກັບຮາກຖານບ້ານເພື່ອຮ່ວມກັນປົກປັກຮັກສາສິ່ງແວດລ້ອມລວມທັງການຮັກສາຄວາມເປັນລະບຽບຮຽບຮ້ອຍ ແລະ ວຽກງານປ້ອງກັນຄວາມສະຫງົບສຸກຂອງປະຊາຊົນເພື່ອເຮັດໃຫ້ເຂດດັ່ງກ່າວເກີດມີຜະລິດຕະພັນທີ່ຫຼາກຫຼາຍເພື່ອອອກຈຳໜ່າຍ.

ໃນໂອກາດນີ້, ທ່ານ ສອນໄຊ ສີພັນດອນ ພ້ອມດ້ວຍຄະນະຍັງໄດ້ລົງຊຸກຍູ້ການຈັດຕັ້ງປະຕິບັດວຽກງານບໍລິສັດຄວາມຫວັງໃໝ່ທີ່ທຳການຜະລິດຫົວອາຫານສັດ ເຊັ່ນ: ຫົວອາຫານໝູ, ອາຫານເປັດ-ໄກ່ ແລະຫົວອາຫານປາອີກດ້ວຍ.

แชร์