ນາຍົກລັດຖະມົນຕີ ເຄື່ອນໄຫວວຽກຢູ່ແຂວງອຸດົມໄຊ

ວັນທີ 6 ສິງຫາຜ່ານມາ, ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ພ້ອມດ້ວຍຄະນະລົງເຄື່ອນໄຫວວຽກ ແລະ ຢ້ຽມຢາມ ຢູ່ແຂວງອຸດົມໄຊ ໂດຍການຕ້ອນຮັບຂອງ ທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊພ້ອມດ້ວຍຄະນະເພື່ອຕິດຕາມ, ຊຸກຍູ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງ ແຂວງ, ການຈັດຕັ້ງປະຕິບັດ 2 ວາລະແຫ່ງຊາດຄື ວາລະແຫ່ງຊາດວ່າດ້ວຍການແກ້ໄຂ ບັນຫາຫຍຸ້ງຍາກທາງດ້ານເສດຖະກິດ-ການເງິນ ແລະວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດແນໃສ່ເຮັດໃຫ້ເສດຖະກິດຂອງແຂວງອຸດົມໄຊໄດ້ຮັບການຂະຫຍາຍຕົວ ແລະ ກາຍເປັນແຂວງ 4 ໃຈກາງຂອງພາກເໜືອ.

ຊຶ່ງການລົງເຄື່ອນໄຫວວຽກ ແລະຢ້ຽມຢາມຂອງທ່ານນາຍົກລັດຖະມົນຕີພ້ອມດ້ວຍຄະນະໃນຄັ້ງນີ້, ໄດ້ຮັບຟັງການລາຍງານສະພາບລວມກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ, ສອງວາລະແຫ່ງຊາດວ່າດ້ວຍການແກ້ໄຂບັນຫາຂໍ້ຫຍຸ້ງຍາກທາງດ້ານເສດຖະກິດ-ການເງິນ ແລະບັນຫາຢາເສບຕິດ. ຈາກນັ້ນ ທ່ານໄດ້ມີຄໍາຄິດເຫັນໂອ້ລົມພະນັກງານການນຳແຂວງພ້ອມທັງເນັ້ນໃຫ້ສືບຕໍ່ເອົາໃຈໃສ່ການຈັດຕັ້ງປະຕິບັດໃນຕໍ່ໜ້າ.

ພາຍຫລັງສຳເລັດການພົບປະໂອ້ລົມພະນັກງານການນຳຂອງແຂວງທີ່ຫ້ອງວ່າ ການແຂວງແລ້ວ, ທ່ານນາຍົກລັດຖະມົນຕີ ພ້ອມດ້ວຍຄະນະ ແລະ ການນໍາແຂວງໄດ້ສືບຕໍ່ລົງຢ້ຽມຢາມໂຮງງານປຸງແຕ່ງນໍ້າຢາງພາລາຂອງບໍລິສັດ ຈົງອູ ໄດ້ຮັບຟັງການລາຍງານສະພາບກ່ຽວກັບການຈັດຕັ້ງປະຕິບັດວຽກງານຂອງໂຮງງານເປັນຕົ້ນລາຄາການເກັບຊື້ຢາງ, ການຜະລິດ ແລະການສົ່ງອອກ; ຢ້ຽມຢາມ ໂຮງງານເຟີນີເຈີ ບໍລິສັດ ຊວງໄຊ ທີ່ບ້ານກໍນ້ອຍ ຊຶ່ງມີທ່ານ ຈັງເອີ ພ້ອມດ້ວຍພະນັກງານໃຫ້ການຕ້ອນຮັບພ້ອມທັງນຳພາໃນການຢ້ຽມຊົມການຜະລິດເຟີນີເຈີ ພາຍໃນໂຮງງານ ແລະບາງກິດຈະກຳຂອງບໍລິສັດກໍຄືການສົ່ງເສີມປະຊາຊົນປູກມອນ-ລ້ຽງມ້ອນ.

ຈາກນັ້ນ, ກໍໄດ້ສືບຕໍ່ລົງຕິດຕາມ, ກວດກາຈຸດຄ່ຽນຖ່າຍສິນຄ້າທີ່ສະຖານີລົດໄຟເມືອງໄຊເພື່ອພ້ອມກັນສຶກສາ, ສຳຫຼວດ ແລະກຳນົດເປັນສູນໂລຈິສຕິກ ຫລືຈຸດຄ່ຽນຖ່າຍສິນຄ້າ ລະດັບພາກພື້ນໃນຕໍ່ໜ້າ. ພາຍຫລັງສຳເລັດການຕິດຕາມ, ກວດກາ ຢູ່ຈຸດດັ່ງກ່າວແລ້ວ, ໄດ້ສືບຕໍ່ລົງຢ້ຽມຢາມຄວາມຄືບໜ້າໂຄງການກໍ່ສ້າງຕ້ານຕາຝັ່ງເຈື່ອນລຽບແຄມແມ່ນໍ້າກໍເຊິ່ງໂຄງການດັ່ງກ່າວໄດ້ຮັບການກໍ່ສ້າງມາແຕ່ກາງປີ 2021 ມາຮອດປັດຈຸບັນແມ່ນກໍ່ສ້າງສຳເລັດແລ້ວ 70 ກວ່າ% ແລະຄາດຄະເນຈະໃຫ້ສຳເລັດໃນໄວໆນີ້.

ຂ່າວ: ຄານມະນີ ຮຽນດໍຈັນ

แชร์