ເລຂາທິການໃຫຍ່ ພົບປະໂອ້ລົມພະນັກງານຫຼັກແຫລ່ງເມືອງນານ ແລະເມືອງງອຍ

ໃນໂອກາດລົງຢ້ຽມຢາມ ແລະ ພົບປະໂອ້ລົມພະນັກຫລັກແຫລ່ງ ເມືອງນານ ແລະ ເມືອງງອຍ ແຂວງຫລວງພະບາງ ໃນວັນທີ 4 ສິງຫາ 2022 ທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດແຫ່ງ ສປປ ລາວ ໄດ້ເນັ້ນໃຫ້ຄະນະພັກ, ອົງການປົກຄອງເມືອງ ແລະປະຊາຊົນ 2 ເມືອງດັ່ງກ່າວໃຫ້ມີຄວາມສາມັກຄີເປັນຈິດໜຶ່ງໃຈດຽວໃນການປົກປັກຮັກສາ ແລະສ້າງສາພັດທະນາ, ເອົາໃຈໃສ່ເສີມຂະຫຍາຍມູນເຊື້ອດຸໝັ່ນຂະຫຍັນພຽນເຂົ້າໃນການອອກແຮງງານຜະລິດເປັນສິນຄ້າໃຫ້ຫຼາຍ ແລະ ມີສ່ວນແຮໄວ້ໂດຍສະເພາະແມ່ນການຄໍ້າປະກັນສະບຽງອາຫານ,ການຜະລິດກະສິກໍາປອດສານພິດ, ປົກປັກຮັກສາສິ່ງແວດລ້ອມ, ເອົາໃຈໃສ່ແກ້ໄຂປະກົດການຫຍໍ້ທໍ້ໃນສັງຄົມເປັນຕົ້ນບັນຫາຢາເສບຕິດ, ເອົາໃຈໃສ່ຊຸກຍູ້ສົ່ງເສີມໃຫ້ລູກຫລານໃຫ້ໄດ້ຮັບການສຶກສາບໍ່ໃຫ້ປະລະການຮໍ່າຮຽນ.

ໂອກາດນີ້, ທ່ານ ຄຳເກັ່ງ ຈັນທະວີສຸກ ເຈົ້າເມືອງນານກໍໄດ້ລາຍງານສະພາບການພັດທະນາເສດຖະກິດ-ສັງຄົມຂອງເມືອງໂດຍຫຍໍ້ໂດຍໄດ້ຍົກໃຫ້ຜົນສຳເລັດທີ່ອົງການປົກຄອງເມືອງຍາດມາໄດ້ໃນແຕ່ລະຂົງເຂດ ອັນເປັນພືນຖານເຮັດໃຫ້ເສດຖະ ກິດມີການຂະຫຍາຍຕົວໃນລະດັບ 5,65% ຕໍ່ປີ ສະເລ່ຍລາຍຮັບໄດ້ປະມານ 13 ລ້ານ ກວ່າກີບ ຫຼື ປະມານ 1.400 ໂດລາຕໍ່ຄົນຕໍ່ປີ, ອັນພົ້ນເດັ່ນແມ່ນການປູກເຂົ້ານາສາມາດເຫຼືອກິນ ແລະສົ່ງອອກເປັນສິນຄ້າ,ຄຽງຄູ່ກັບການປູກພືດອຸດສາຫະກຳ ແລະ ລ້ຽງສັດເປັນສິນຄ້າມີປະຊາຊົນ ແລະ ນັກທຸລະກິດພາຍໃນ ແລະ ຕ່າງປະເທດມາລົງທຶນຫລາຍໂຄງການ.

ໂອກາດ ລົງຢ້ຽມຢາມ ແລະພົບປະໂອ້ລົມພະນັກຫລັກແຫລ່ງເມືອງງອຍ, ທ່ານ ທອງລຸນ ສີສຸລິດ ກໍໄດ້ຮັບຟັງການລາຍງານຈາກທ່ານເຈົ້າເມືອງກ່ຽວກັບສະພາບການພັດທະນາເສດຖະກິດ-ສັງຄົມຂອງເມືອງໂດຍຫຍໍ້ໂດຍໄດ້ຍົກໃຫ້ເຫັນທ່າແຮງຕົ້ນຕໍຂອງເມືອງຊຶ່ງຍັງແມ່ນການຜະລິດກະສິກຳເປັນຕົ້ນຕໍ,ທົ່ວເມືອງມີເນື້ອທີ່ນາທັງໝົດ 1.009 ເຮັກຕາ, ໃນນັ້ນມີເນື້ອທີ່ນາແຊງ 193 ເຮັກຕາ, ແຕ່ເນື້ອທີ່ເຮັດນາແຊງຕົວຈິງ 55 ເຮັກຕາ, ຜົນຜະລິດໄດ້ 243,36 ໂຕນ, ສະມັດຕະພາບ 4,5 ໂຕນ/ຮຕ, ມີຊົນລະປະທານຖາວອນ 6 ແຫ່ງ, ຝາຍປະຖົມປະຖານ 113 ແຫ່ງ. ນອກຈາກນີ້, ຍັັງໄດ້ຊຸກຍູ້ການປູກພືດອຸດສາຫະກຳປະເພດຕ່າງໆເປັນຕົ້ນສາລີຫວານ, ສາລີແຂງ, ໝາກເດືອຍ, ໝາກງາ, ໝາກນໍ້າມັນເຄືອ, ໝາກນໍ້າມັນຕົ້ນ, ປູກຂ່າ, ປູກພືດລະດູແລ້ງ ແລະລ້ຽງສັດ. ນອກຈກນີ້ເມືອງງອຍຍັງມີທ່າແຮງບົ່ມຊ້ອນໃນການເຮັດບໍລິການການທ່ອງທ່ຽວ, ໃນທົ່ວເມືອງມີແຫລ່ງທ່ອງທ່ຽວ 40 ກວ່າແຫ່ງໃນໄລຍະ 6 ເດືອນຜ່ານມາສາມາດດຶ່ງດູດນັກທ່ອງທ່ຽວໄດ້ທັງໝົດ 1.909 ຄົນ, ຍິງ 1.091 ຄົນ, ໃນນັ້ນນັກທ່ອງທ່ຽວພາຍໃນ 1.704 ຄົນ, ຍິງ 968 ຄົນ, ຕ່າງປະເທດ 205 ຄົນ, ຍິງ 123 ຄົນ, ສະເລ່ຍລາຍຮັບໃສ່ຫົວຄົນໄດ້ 6.763.000 ກີບ/ຄົນ/ປີ ເທົ່າກັບ 650 ໂດລາ.

ພ້ອມກັນນີ້, ທ່ານ ທອງລຸນ ສີສຸລິດ ພ້ອມຄະນະ ຍັງໄດ້ໄປຢ້ຽມຢາມ, ພົບປະ ແລະມອບອຸປະກອນໃຫ້ຜູ້ເສຍອົງຄະຈຳນວນໜຶ່ງຢູ່ເມືອງງອຍຕື່ມອີກ.

แชร์