ຮອງນາຍົກລັດຖະມົນຕີ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນກັບ ຄູ່ຮ່ວມເຈລະຈາ ອາຊຽນ

ໃນວັນທີ 4 ສິງຫາ 2022 ທີ່ພະນົມເປັນ,ຣາຊະອານາຈັກກໍາປູເຈຍ, ທ່ານ ສະເຫລີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນກັບບັນດາປະເທດຄູ່ເຈລະຈາເຊິ່ງປະກອບດ້ວຍກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ, ອາຊຽນ-ຈີນ, ອາຊຽນ-ສ.ອາເມລິກາ, ອາຊຽນ-ຍີ່ປຸ່ນ, ອາຊຽນ-ສ.ເກົາຫລີ, ອາຊຽນ-ອິນເດຍ, ອາຊຽນ-ນິວຊີແລນ, ອາຊຽນ-ສະຫະພາບເອີຣົບ (ອີຢູ), ອາຊຽນ-ການາດາ, ອາຊຽນ-ລັດເຊຍ, ອາຊຽນ-ອັງກິດ ແລະກອງປະຊຸມລັດຖະມົນຕີຕ່າງປະເທດອາຊຽນບວກສາມ ຄັ້ງທີ 23 ຕາມລໍາດັບ.

ໃນນາມ ສປປ ລາວ ເປັນປະເທດປະສານງານການພົວພັນອາຊຽນ-ອົດສະຕຣາລີ, ທ່ານ ສະເຫລີມໄຊ ກົມມະສິດ ໄດ້ເປັນປະທານຮ່ວມກອງປະຊຸມລັດຖະມົນຕີຕ່າງປະເທດອາຊຽນ-ອົດສະຕຣາລີ ຮ່ວມກັບທ່ານນາງເພັນນີວອງ (Penny Wong) ລັດຖະມົນຕີຕ່າງປະເທດອົດສະຕຣາລີ. ກອງປະຊຸມໄດ້ສະແດງຄວາມຊົມເຊີຍຕໍ່ຂໍ້ລິເລີ່ມຂອງອົດສະຕຣາລີ ເພື່ອຊ່ວຍເຫລືອອາຊຽນມູນຄ່າ 154 ລ້ານໂດລາອົດສະຕຣາລີ ເຊິ່ງລວມມີ: ຂໍ້ລິເລີ່ມອົດສະຕຣາລີ ເພື່ອອະນາຄົດຂອງອາຊຽນມູນຄ່າ 124 ລ້ານໂດລາອົດສະຕຣາລີ, ທຶນການສຶກສາຈຳນວນ 100 ທຶນ ເພື່ອສົ່ງເສີມການສ້າງຜູ້ນຳອາຊຽນໃນ 4 ຂົງເຂດບູລິມະສິດພາຍໃຕ້ແນວຄວາມຄິດອາຊຽນ ກ່ຽວກັບອິນໂດ-ປາຊີຟິກ ແລະຂໍ້ລິເລີ່ມກ່ຽວກັບການສົ່ງເສີມຄວາມສາມາດ ແລະການຫັນເປັນດີຈີຕອນໃນອະນາຄົດ. ກອງປະຊຸມຍັງໄດ້ຮັບຮອງເອົາເອກະສານຊ້ອນທ້າຍຂອງແຜນປະຕິບັດງານອາຊຽນ-ອົດສະຕຣາລີ 2020-2024 ເພື່ອຈັດຕັ້ງຜັນຂະຫຍາຍຄູ່ຮ່ວມຍຸດທະສາດຮອບດ້ານອາຊຽນ-ອົດສະຕຣາລີ ທີ່ຖືກຍົກລະດັບໃນທ້າຍ ປີ 2021.

ກອງປະຊຸມລັດຖະມົນຕີຕ່າງປະເທດ ອາຊຽນ-ຈີນ ໄດ້ຮັບຮອງເອົາເອກະສານຊ້ອນທ້າຍຂອງແຜນປະຕິບັດງານອາຊຽນ-ຈີນ (2021-2025) ເພື່ອຈັດຕັ້ງຜັນຂະຫຍາຍຄູ່ຮ່ວມຍຸດທະສາດຮອບດ້ານ ອາຊຽນ-ຈີນ ທີ່ຖືກຍົກລະດັບໃນທ້າຍປີ 2021. ກອງປະຊຸມໄດ້ຮັບຊາບຂໍ້ສະເໜີຂອງຈີນເພື່ອອອກຖະແຫລງການອາຊຽນ-ຈີນ ວ່າດ້ວຍການສົ່ງເສີມການພັດທະນາຮ່ວມກັນ ແລະຖະແຫລງການຮ່ວມອາຊຽນ-ຈີນ ວ່າດ້ວຍການຮ່ວມມືດ້ານຄວາມໝັ້ນຄົງທາງສະບຽງອາຫານ ເຊິ່ງມີແຜນຮັບຮອງເອົາຢູ່ກອງປະຊຸມສຸດຍອດ ອາຊຽນ-ຈີນ ຄັ້ງທີ 25 ໃນເດືອນພະຈິກ 2022 ນີ້. ໃນໂອກາດນີ້, ກອງປະຊຸມຍັງໄດ້ສະແດງຄວາມຊົມເຊີຍຕໍ່ຄວາມຄືບໜ້າຂອງການຈັດຕັ້ງປະຕິບັດຖະແຫລງການວ່າດ້ວຍການປະພຶດຂອງບັນດາຝ່າຍໃນທະເລຈີນໃຕ້(DOC), ລວມທັງການເຈລະຈາຮ່າງກົດແຫ່ງການປະພຶດໃນທະເລຈີນໃຕ້ ແລະໄດ້ເແລກປ່ຽນຄວາມຄິດເຫັນຕໍ່ບາງບັນຫາພົ້ນເດັ່ນຢູ່ໃນພາກພື້ນ ແລະສາກົນ.

ກອງປະຊຸມລັດຖະມົນຕີຕ່າງປະເທດ ອາຊຽນ-ສ.ອາເມລິກາ ໄດ້ເຫັນດີສືບຕໍ່ເຮັດວຽກຮ່ວມກັນເພື່ອກ້າວໄປສູ່ການຍົກລະດັບການພົວພັນຮ່ວມມື ອາຊຽນ-ສ.ອາເມລິກາ ຂຶ້ນເປັນຄູ່ຮ່ວມຍຸດທະສາດຮອບ ດ້ານ ໃນໂອກາດກອງປະຊຸມສຸດຍອດ ອາຊຽນ-ສ.ອາເມລິກາ ຄັ້ງທີ 10 ທີ່ຈະຈັດຂຶ້ນໃນເດືອນພະຈິກ 2022. ພ້ອມນີ້, ກອງປະຊຸມໄດ້ຊຸກຍູ້ໃຫ້ສືບຕໍ່ຈັດຕັ້ງຜັນຂະຫຍາຍຜົນຂອງກອງປະຊຸມສຸດຍອດ ອາຊຽນ-ສ.ອາເມລິກາ ສະໄໝພິເສດທີ່ໄດ້ຈັດຂຶ້ນໃນວັນທີ 12-13 ພຶດສະພາ 2022 ທີ່ນະຄອນຫລວງວໍຊິງຕັນດີຊີ.

ກອງປະຊຸມ ລັດຖະມົນຕີຕ່າງປະເທດອາຊຽນ-ຍີ່ປຸ່ນ ໄດ້ເຫັນດີໃຫ້ເຮັດວຽກຮ່ວມກັນເພື່ອກະກຽມໃຫ້ແກ່ການຈັດກອງປະຊຸມສຸດຍອດສະເຫລີມສະຫລອງຄົບຮອບ 50 ປີແຫ່ງການພົວພັນອາຊຽນ-ຍີ່ປຸ່ນ ທີ່ຈະຈັດຂຶ້ນໃນເດືອນທັນວາ 2023 ທີ່ ໂຕກຽວ,ຍີ່ປຸ່ນລວມທັງການສ້າງກິດຈະກໍາຕ່າງໆ ເພື່ອຈັດຕັ້ງຜັນຂະຫຍາຍປີແຫ່ງມິດຕະພາບ ແລະການຮ່ວມມືອາຊຽນ-ຍີ່ປຸ່ນ2023.

ກອງປະຊຸມລັດຖະມົນຕີຕ່າງປະເທດອາຊຽນ-ສ.ເກົາຫລີ ໄດ້ຊຸກຍູ້ໃຫ້ເລັ່ງລັດການລົງນາມບົດບັນທຶກຄວາມເຂົ້າໃຈກ່ຽວກັບການສ້າງຕັ້ງສູນນະວັດຕະກໍາດ້ານອຸດສາຫະກຳ ແລະການສ້າງຕັ້ງສູນຮ່ວມມືດ້ານວິທະຍາສາດ ແລະເຕັກໂນໂລຊີ ໃຫ້ສໍາເລັດໂດຍໄວເພື່ອປະກອບສ່ວນສົ່ງເສີມການຮ່ວມມືໃນຂົງເຂດດັ່ງກ່າວໃຫ້ຫລາຍຂຶ້ນ.

ກອງປະຊຸມ ລັດຖະມົນຕີຕ່າງປະເທດ ອາຊຽນ-ອິນເດຍ ໄດ້ຊຸກຍູ້ການຈັດຕັ້ງຜັນຂະຫຍາຍຜົນຂອງກອງປະຊຸມລັດຖະມົນຕີອາຊຽນ-ອິນເດຍ ສະໄໝພິເສດ ທີ່ຈັດຂຶ້ນໃນວັນທີ 16 ມິຖຸນາ 2022 ທີ່ ນິວເດັນລີ ເພື່ອສະເຫລີມສະຫລອງການພົວພັນອາຊຽນ-ອິນເດຍ ຄົບຮອບ 30 ປີ ແນໃສ່ຮັດແໜ້ນການຮ່ວມມືຂຶ້ນສູ່ລະດັບໃໝ່ ໂດຍສະເພາະແມ່ນເພື່ອກ້າວໄປສູ່ການຍົກລະດັບການພົວພັນອາຊຽນ-ອິນເດຍ ຂຶ້ນເປັນຄູ່ຮ່ວມຍຸດທະສາດຮອບດ້ານ. ນອກນັ້ນ, ກອງປະຊຸມກໍໄດ້ຢໍ້າຄືນຄວາມສໍາຄັນຂອງການຈັດຕັ້ງປະຕິບັດບັນດາໂຄງການຮ່ວມມືດ້ານການເຊື່ອມຈອດຕ່າງໆ ໂດຍສະເພາະໂຄງການທາງດ່ວນສາມຝ່າຍ ອິນເດຍ-ມຽນມາ-ໄທ ແລະການຂະຫຍາຍທາງດ່ວນດັ່ງກ່າວເຊື່ອມຕໍ່ມາຍັງ ສປປ ລາວ, ກໍາປູເຈຍ ແລະ ຫວຽດນາມ ໃຫ້ສໍາເລັດໃນເວລາອັນຄວນ.

ກອງປະຊຸມລັດຖະມົນຕີຕ່າງປະເທດ ອາຊຽນ-ນິວຊີແລນ ໄດ້ຊຸກຍູ້ໃຫ້ສອງຝ່າຍເລັ່ງລັດການເຈລະຈາເພື່ອຍົກລະດັບສັນຍາເຂດການຄ້າເສລີ ອາຊຽນ-ອົດສະຕຣາລີ-ນີວຊີແລນ ໃຫ້ສໍາເລັດໂດຍໄວ. ນອກນັ້ນ, ນິວຊີແລນ ໄດ້ໃຫ້ຄວາມໝາຍໝັ້ນທີ່ຈະສືບຕໍ່ສະໜັບສະໜູນການສ້າງຂີດຄວາມສາມາດໃຫ້ອາຊຽນ ໃນການຈັດຕັ້ງປະຕິບັດສັນຍາການຄ້າເສລີອາຊຽນ-ອົດສະຕຣາລີ-ນິວຊີແລນ ລວມທັງການສ້າງຂີດຄວາມສາມາດໃຫ້ແກ່ນັກເຈລະຈາວຽກງານການຄ້າຂອງອາຊຽນ.

ກອງປະຊຸມລັດຖະມົນຕີຕ່າງປະເທດ ອາຊຽນ-ອີຢູ ໄດ້ສະແດງຄວາມຍິນດີຕໍ່ການພົວພັນຮ່ວມມືອາຊຽນ-ອີຢູ ຄົບຮອບ 45 ປີ ພ້ອມທັງເຫັນດີໃຫ້ເລັ່ງລັດການກະກຽມ ເພື່ອຈັດກອງປະຊຸມສຸດຍອດສະເຫລີມສະຫລອງການພົວພັນອາຊຽນ-ອີຢູ ຄົບຮອບ 45 ປີ ເຊິ່ງມີແຜນຈັດຂຶ້ນໃນເດືອນທັນວາ 2022 ທີ່ ບຣຸກແຊນ,ປະເທດແບນຊິກ.

ກອງປະຊຸມ ລັດຖະມົນຕີຕ່າງປະເທດ ອາຊຽນ-ການາດາ ໄດ້ເຫັນດີຈັດກອງປະຊຸມສຸດຍອດສະເຫລີມສະຫລອງການພົວພັນ ອາຊຽນ-ການາດາ ຄົບຮອບ 45 ປີ ໃນທ້າຍປີ 2022 ເພື່ອທົບທວນການຮ່ວມມືໃນໄລຍະຜ່ານມາພ້ອມທັງວາງທິດທາງເພື່ອຮັດແໜ້ນການຮ່ວມມືໃນຕໍ່ໜ້າ ແລະເພື່ອຍົກລະດັບການພົວພັນອາຊຽນ-ການາດາຂຶ້ນສູ່ລະດັບໃໝ່.

ກອງປະຊຸມ ລັດຖະມົນຕີຕ່າງປະເທດ ອາຊຽນ-ລັດເຊຍ ໄດ້ສະແດງຄວາມຊົມເຊີຍຕໍ່ຜົນສໍາເລັດຂອງກອງປະຊຸມສຸດຍອດ ອາຊຽນ-ລັດເຊຍ ເພື່ອສະເຫລີມສະຫລອງການຮ່ວມມືອາຊຽນ-ລັດເຊຍ ຄົບຮອບ 30 ປີ ໃນເດືອນ ຕຸລາ 2021 ທີ່ຜ່ານມາພ້ອມທັງຊຸກຍູ້ໃຫ້ສືບຕໍ່ຈັດຕັ້ງຜັນຂະຫຍາຍຜົນຂອງກອງປະຊຸມດັ່ງກ່າວກໍຄືບັນດາກິດຈະກໍາຮ່ວມມືໃນແຜນປະຕິບັດງານໃຫ້ມີປະສິດທິຜົນຫລາຍຂຶ້ນຕື່ມລວມທັງການຈັດຕັ້ງຜັນຂະຫຍາຍປີແຫ່ງການຮ່ວມມືອາຊຽນ-ລັດເຊຍ ດ້ານວິທະຍາສາດ ແລະເຕັກນິກ ໃນປີ 2022 ນີ້.

ກອງປະຊຸມ ລັດຖະມົນຕີຕ່າງປະເທດອາຊຽນ-ອັງກິດ ເປັນກອງປະຊຸມຄັ້ງທຳອິດພາຍຫລັງທີ່ອັງກິດໄດ້ຖືກຮັບຮອງເປັນຄູ່ເຈລະຈາຂອງອາຊຽນ ໃນປີ 2021. ກອງປະຊຸມ ໄດ້ຮັບຮອງເອົາແຜນປະ ຕິບັດງານການຮ່ວມມື ອາຊຽນ-ອັງກິດ ໄລຍະ 2022-2026 ເພື່ອເປັນພື້ນຖານໃນການສົ່ງເສີມການຮ່ວມມືໃນຕໍ່ໜ້າ. ອັງກິດ ໄດ້ໃຫ້ການຊ່ວຍເຫລືອອາຊຽນໃນການຮັບມື ກັບການແຜ່ລະບາດຂອງພະຍາດໂຄວິດ-19 ໂດຍການປະກອບສ່ວນ 1 ລ້ານປອນ ເຂົ້າໃນກອງທຶນອາຊຽນ ເພື່ອຮັບມືກັບພະຍາດໂຄວິດ-19 ແລະ 4,8 ລ້ານປອນໃຫ້ແກ່ ກໍາປູເຈຍ, ສປປ ລາວ, ມຽນມາ ແລະ ຫວຽດນາມ ເພື່ອຮັບມືກັບການແຜ່ລະບາດຂອງພະຍາດໂຄວິດ-19.

ກອງປະຊຸມ ລັດຖະມົນຕີຕ່າງປະເທດອາຊຽນບວກສາມ (ສປ.ຈີນ, ຍີ່ປຸ່ນ ແລະ ສ.ເກົາຫລີ) ຄັ້ງທີ 23 ໄດ້ສະແດງຄວາມຍິນດີຕໍ່ການຮ່ວມມືໃນຂອບອາຊຽນບວກສາມໃນໄລຍະ 25 ປີ ທີ່ຜ່ານມາ, ພ້ອມທັງຕີລາຄາສູງຕໍ່ໝາກຜົນຂອງການຮ່ວມມືພາຍໃຕ້ຂອບອາຊຽນບວກສາມໃນການເປັນເວທີການຮ່ວມມືທີ່ສໍາຄັນຂອງພາກພື້ນ ເຊິ່ງໄດ້ມີບົດບາດສໍາຄັນໃນການຮັບມືກັບສິ່ງທ້າທາຍຕ່າງໆ ເຊັ່ນ: ພະຍາດລະບາດ, ວິກິດການທາງການເງິນ, ຄວາມຂາດແຄນດ້ານສະບຽງອາຫານ ແລະອື່ນໆ. ກອງປະຊຸມໄດ້ຮັບຮອງເອົາແຜນວຽກການຮ່ວມມືໄລຍະ 2023-2027 ເພື່ອເສີມຂະຫຍາຍການຮ່ວມມືໃຫ້ນັບມື້ນັບເຂັ້ມແຂງຍິ່ງຂຶ້ນ.

ໃນວັນດຽວກັນທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ຍັງໄດ້ພົບປະສອງຝ່າຍກັບລັດຖະມົນຕີຕ່າງປະເທດອົດສະຕຣາລີ, ລັດຖະມົນຕີຊີ້ນຳວຽກງານອາຊີ ແລະຕາເວັນອອກກາງ, ກະຊວງການຕ່າງປະເທດອັງກິດ ແລະລັດຖະມົນຕີຕ່າງປະເທດຣັດເຊຍ.

ຂ່າວ-ພາບ:ກຕທ

แชร์