ປະທານສູນກາງແນວລາວສ້າງຊາດ ເຫັນ 4 ບັນຫາໃຫຍ່ ຄວາມຫຍຸ້ງຍາກທີ່ພວກເຮົາຕ້ອງຜ່ານຜ່າໃຫ້ໄດ້

ວັນທີ 2 ສິງຫາ  ຜ່ານມາ, ທີ່ສູນກາງແນວລາວສ້າງຊາດຈັດກອງປະຊຸມ ສຳມະນາກ່ຽວກັບທິດທາງ ແລະວິທີການປຸກລະດົມຂົນຂວາຍປະຊາຊົນຊັ້ນຄົນຕ່າງໆ ເພື່ອຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ແລະຄ່າຄອງຊີບສູງໂດຍເປັນກຽດເຂົ້າຮ່ວມເປັນປະທານຂອງທ່ານ ສິນລະວົງ ຄຸດໄພທູນ ປະທານສູນກາງແນວລາວສ້າງຊາດ, ທ່ານ ສົມສະຫວາດ ເລັ່ງສະຫວັດ ອະດີດຮອງນາຍົກລັດຖະມົນຕີ ທີ່ປຶກສາສະພາທິດສະດີສູນກາງ ແລະທ່ານ ສົມດີ ດວງດີ ອະດີດຮອງນາຍົກລັດຖະມົນຕີ,ມີບັນດາທ່ານຮອງປະທານສູນກາງແນວລາວສ້າງຊາດ,ກຳມະການສູນກາງແນວລາວສ້າງຊາດ, ຄະນະທີ່ປຶກສາຕ່າງໆ, ຜູ້ຕາງໜ້າຈາກທະນາຄານ ແຫ່ງ ສປປ ລາວ ລວມທັງຄະນະປະຈຳແນວລາວສ້າງຊາດແຂວງໃນຂອບເຂດທົ່ວປະເທດ ເຂົ້າຮ່ວມແບບເຊິ່ງໜ້າ ແລະດ້ວຍລະບົບທາງໄກ.

ເພື່ອປະຕິບັດຕາມແຜນວຽກ 6 ເດືອນທ້າຍປີ ຂອງຄະນະປະຈຳ ສນຊ ແລະອີງໃສ່ສະພາບຄວາມຮຽກຮ້ອງຕ້ອງການຂອງສັງຄົມ ແລະການຊີ້ນຳຂອງກົມການເມືອງ ໃນການແກ້ໄຂສະພາບແນວຄິດຈິດໃຈຂອງປະຊາຊົນຊັ້ນຄົນຕ່າງໆ ອັນເນື່ອງຈາກມີຜົນກະທົບຂອງພະຍາດໂຄວິດ-19 ແລະ ຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ, ການຂາດແຄນນໍ້າມັນ ແລະ ຄ່າຄອງຊີບສູງ. ການສຳມະນາໃນຄັ້ງນີ້, ປະກອບມີ 4 ຫົວຂໍ້ສຳຄັນຄື: ປະສົບປະການ ແລະ ທິດທາງການແກ້ໄຂບັນຫານໍ້າມັນ ຢູ່ ສປປ ລາວ ໄລຍະສະເພາະໜ້າ ແລະ ຍາວນານ; ທິດທາງ ແລະ ວິທີການແກ້ໄຂເງິນເຟີ້, ການຂາດແຄນເງິນຕາ ແລະ ວິທີການປຸກລະດົມປະຊາຊົນຊັ້ນຄົນຕ່າງໆ ຜ່ານຜ່າຄວາມຫຍຸ້ງຍາກດ້ານເງິນຕາ; ວິທີການປຸກລະດົມຂົນຂວາຍປະຊາຊົນຊັ້ນຄົນຕ່າງໆ ຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ແລະຄ່າຄອງຊີບສູງຂອງສູນກາງແນວລາວສ້າງຊາດ ແລະຄວາມເຂົ້າໃຈຂອງຄະນະທີ່ປຶກສາເສດຖະກິດ ສນຊ ກ່ຽວກັບທິດທາງ ແລະວິທີການຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ ເງິນຕາ ແລະ ຄ່າຄອງຊີບສູງ ຂອງປະຊາຊົນຊັ້ນຄົນຕ່າງໆ.

ໂອກາດນີ້, ທ່ານປະທານ ສນຊ ໄດ້ໃຫ້ຮູ້ວ່າ: ປະເທດເຮົາປັດຈຸບັນມີຄວາມຫຍຸ້ງຍາກ 4 ບັນຫາຄື: ນໍ້າມັນບໍ່ພໍຮັບໃຊ້; ອັດຕາເງິນເຟີສູງ; ຂາດເງິນຕາຕ່າງປະເທດ ແລະ ຄ່າຄອງຊີບສູງທັງໝົດນີ້ແມ່ນສົ່ງຜົນກະທົບຕໍ່ການຜະລິດທຸລະກິດ ແລະ ຊີວິດການເປັນຢູ່ຂອງປະຊາຊົນລາວບັນດາເຜົ່າຕໍ່ກັບຜົນກະທົບດັ່ງກ່າວນັ້ນ, ສູນກາງແນວລາວສ້າງຊາດມີທິດທາງ ແລະວິທີການປຸກລະດົມຂົນຂວາຍປະຊາຊົນຊັ້ນຄົນຕ່າງໆຜ່ານຜ່າຄວາມຫຍຸ້ງຍາກດ້ານເສດຖະກິດ-ການເງິນ-ເງິນຕາ ແລະ ຄ່າຄອງຊີບສູງ.

ໃນຖານະເປັນອົງການແນວໂຮມໃນໄລຍະພົບຄວາມຫຍຸ້ງຍາກໄດ້ປະຕິບັດ 2 ພາລະ ບົດບາດສຳຄັນຄື:

- ປຸກລະດົມຂົນຂວາຍປະຊາຊົນຊັ້ນຄົນຕ່າງໆ ຈັດຕັ້ງປະຕິບັດແຜນນະໂຍບາຍແຜນວຽກ, ແຜນງານ, ໂຄງການຕ່າງໆຂອງລັດຢູ່ສູນກາງ ແລະທ້ອງຖິ່ນ, ເຕົ້າໂຮມກຳລັງແຮງຄວາມສາມັກຄີເປັນປຶກແຜ່ນຂອງປະຊາຊົນ;

- ຕ້ອງໄດ້ປຸກລະດົມຂະບວນການແຂ່ງຂັນສິນຄ້າລາວຜະລິດລາວໃຊ້ ແລະທ່ານຍັງໄດ້ຮຽກຮ້ອງໃຫ້ກຳມະການສູນກາງແນວລາວສ້າງຊາດເປັນແບບຢ່າງທາງດ້ານ ທຸລະກິດຂອງຕົນໃຫ້ປະສົບຜົນສຳເລັດ ແລະສຸມໃສ່ບາງໂຄງການໃໝ່ຂອງກຳມະການສູນກາງແນວລາວສ້າງຊາດທັງໝົດນັ້ນເພື່ອຄະນະປະຈຳ ສນຊ ຈະໄດ້ນຳເປັນ ທິດທາງ, ວິທີການ ໃນການປຸກລະດົມຂົນຂວາຍປະຊາຊົນ, ຊັ້ນຄົນຕ່າງໆ, ເພື່ອພ້ອມກັນຈັດຕັ້ງປະຕິບັດແຜນນະໂຍບາຍຂອງພັກ-ລັດ ໃຫ້ສອດຄ່ອງ ແລະເຕົ້າໂຮມ ຄວາມສາມັກຄີປອງດອງປະຊາຊົນລາວບັນດາເຜົ່າ.

แชร์