ລົດໄຟ ລາວ-ຈີນ ສາມາດຂົນສົ່ງຜູ້ໂດຍສານໄດ້ 7 ແສນກວ່າຄົນ

ນັບແຕ່ໂຄງການທາງລົດໄຟ ລາວ-ຈີນ ໄດ້ເປີດໃຫ້ບໍລິການແຕ່ຕົ້ນເດືອນທັນວາ 2021 ເປັນຕົ້ນມາ ຮອດວັນທີ 2 ສິງຫາ 2022 ນີ້, ສາມາດຂົນສົ່ງຜູ້ໂດຍສານໄດ້ທັງໝົດ 701.600 ເທື່ອຄົນ, ສາມາດຂົນສົ່ງສິນຄ້າ ໄດ້ທັງໝົດ 1.027.000 ໂຕນ, ໃນນັ້ນ, ສິນຄ້າຈາກ ສປປ ລາວ ສົ່ງໄປ ສປ ຈີນ ມີ 773.400 ໂຕນ ເຊິ່ງປະກອບມີແຮ່ເຫລັກ, ແຮ່ເກືອກາລີ, ຖ່ານດຳ, ຢາງພາລາ, ແປ້ງມັນຕົ້ນ ແລະ ອື່ນໆ, ສ່ວນສິນຄ້າຈາກ ສປ ຈີນ ເຂົ້າມາ ສປປ ລາວ ມີທັງໝົດ 253.600 ໂຕນ, ມີປຸຍ, ເຄື່ອງໄຟຟ້າ, ເຄື່ອງນຸ່ງຫົ່ມ ແລະອື່ນໆ.

ທ່ານ ດາວຈິນດາ ສີຫາລາດ ຮອງຜູ້ອຳນວຍການໃຫຍ່ບໍລິສັດທາງລົດໄຟ ລາວ-ຈີນ ລາຍງານໃຫ້ຮູ້ ໃນວັນທີ 3 ສິງຫາ 2022 ນີ້ວ່າ: ນັບແຕ່ເປີດບໍລິການແລ່ນລົດໄຟ ຢ່າງເປັນທາງການ ບໍລິສັດທາງລົດໄຟ ລາວ-ຈີນ ຈຳກັດ ໄດ້ເອົາໃຈໃສ່ ດ້ານວຽກງານການບໍລິການໄດ້ໃນລະດັບສູງ, ສະໝໍ່າສະເໝີ ແລະ ມີຜົນປະໂຫຍດສູງສຸດຕໍ່ຜູ້ມາໃຊ້ບໍລິການໂດຍມີການປັບປຸງຂອດການບໍລິການ, ຄຸນນະພາບການບໍລິການໃຫ້ສູງຂຶ້ນ. ສຳລັບໃນໄລຍະເວລາທີ່ມີຜູ້ໂດຍສານເປັນຈຳນວນຫລາຍ (ໃນຊ່ວງທີ່ມີແທດສະການ) ບໍລິສັດກໍໄດ້ເພີ່ມຖ້ຽວລົດໄຟດ້ວຍການເອົາລົດໄຟອີເອັມຢູ່ສອງຄັນຕໍ່ໃສ່ກັນເພື່ອໃຫ້ສາມາດຂົນສົ່ງຜູ້ ໂດຍສານໃຫ້ໄດ້ຫລາຍຂຶ້ນ,ພ້ອມກັນນັ້ນກໍໄດ້ມີການແຕ່ງຕັ້ງພະນັກງານບໍລິສັດທາງລົດໄຟ ລາວ-ຈີນ ຈຳກັດ ມາຊ່ວຍສະຖານີ ແລະເປັນພະນັກງານບໍລິການເທິງລົດໄຟ.

ທ່ານ ດາວຈິນດາ ສີຫາລາດ ກ່າວອີກວ່າ: ບໍລິສັດທາງລົດໄຟ ລາວ-ຈີນ ຍັງໄດ້ສືບຕໍ່ຈັດຕັ້ງປະຕິບັດວຽກງານຈໍານວນໜຶ່ງທີ່ຍັງບໍ່ທັນສຳເລັດໃນໄລຍະການກໍ່ສ້າງເປັນຕົ້ນແມ່ນການແກ້ໄຂຮ່ອງລະບາຍນໍ້າ, ປັບປຸງລະບົບໄຟຟ້າການເດີນລົດ, ພ້ອມທັງຈະຂະຫຍາຍຊ່ອງບໍລິການຂາຍປີ້ລົດໄຟ,ສ້າງສິ່ງອຳນວຍຄວາມສະດວກຕ່າງໆຢູ່ນອກອາຄານສະຖານີເປັນຕົ້ນຫ້ອງນໍ້າ, ບ່ອນຈອດລົດ ແລະອື່ນໆ.

ບໍລິສັດທາງລົດໄຟ ລາວ-ຈີນ ຈຳກັດ ຍັງໄດ້ໃຫ້ຄວາມສຳຄັນສູງຕໍ່ຄວາມປອດໄພຂອງການເດີນລົດໄຟ, ນອກຈາກໄດ້ເອົາໃຈໃສ່ໃນການກວດກາ, ສ້ອມແປງທີ່ເປັນວຽກງານທາງດ້ານເຕັກນິກຂອງທາງລົດໄຟແລ້ວຍັງໄດ້ມີການປະສານສົມທົບກັບກະຊວງປ້ອງກັນປະເທດ, ກະຊວງປ້ອງກັນຄວາມສະຫງົບ ແລະກະຊວງໂຍທາທິການ ແລະຂົນສົ່ງ ເພື່ອພ້ອມກັນຕ້ານ ແລະສະກັດກັ້ນປະກົດການຫຍໍ້ທໍ້ຕ່າງໆ ທີ່ຈະມີຜົນກະທົບເຖິງຄວາມປອດໄພໃນການເດີນລົດໄຟ.

แชร์