ສະຫລອງສັບປະດາ ສາກົນລ້ຽງລູກດ້ວຍນໍ້ານົມແມ່ ແລະວັນໂພຊະນາການແຫ່ງຊາດ ປະຈຳປີ 2022

ໃນວັນທີ 3 ສິງຫາ 2022 ກະຊວງສາທາລະນະສຸກ ແລະສະຫະພາບເອີຣົບ, ອົງການອຸຍນີເຊບຈັດງານສະເຫລີມສະຫລອງສັບປະດາສາກົນລ້ຽງລູກດ້ວຍນໍ້ານົມແມ່ ແລະ ວັນໂພຊະນາການແຫ່ງຊາດໂດຍການເປັນປະທານຂອງທ່ານ ບຸນແຝງ ພູມມະໄລສິດ ລັດຖະມົນຕີກະຊວງສາທາລະນະສຸກ,ມີຜູ້ຕ່າງໜ້າອົງການຈັດຕັ້ງສາກົນ, ມີບັນດາພະນັກງານແພດໝໍ, ນັກສຶກສາແພດ, ເຂົ້າຮ່ວມ.

ໂອກາດນີ້, ທ່ານ ເກດເກສອນ ພຣະສີສົມບັດ ຮອງຫົວໜ້າກົມອະນະໄມ ແລະສົ່ງເສີມສຸຂະພາບກະຊວງສາທາລະນະສຸກໄດ້ກ່າວວ່າ: ໂພຊະນາການມີຄວາມໝາຍກວ້າງຂວາງ ແລະຄວາມໝາຍທີ່ຕ່າງຈາກຄໍາວ່າອາຫານຊຶ່ງອາຫານທີ່ເຮົາບໍລິໂພກຢູ່ທຸກໆມື້ບາງຢ່າງມີຄຸນປະໂຫຍດ ແລະບໍ່ມີຄຸນປະໂຫຍດແຕກຕ່າງກັນ, ມີອາຫານຫຼາຍຊະນິດ ທີ່ບໍລິໂພກແລ້ວພຽງແຕ່ເຮັດໃຫ້ອີ່ມ ແຕ່ບໍ່ມີຄຸນປະໂຫຍດ ແລະ ອາດຈະໃຫ້ໂທດຕໍ່ຮ່າງກາຍ ການໄດ້ຮັບສານອາຫານທີ່ພຽງພໍ ທາງດ້ານປະລິມານ ແລະ ຄຸນະພາບ ເປັນສິ່ງທີ່ຈຳເປັນທີ່ສຸດຕໍ່ຮ່າງກາຍຄົນ ເພື່ອໃຫ້ມີສຸຂະພາບທີ່ແຂງແຮງ ປາສະຈາກໂລກໄພໄຂ້ເຈັບຕ່າງໆ, ປະຊາຊົນທີ່ໄດ້ບໍລິໂພກອາຫານທີ່ດີຍ່ອມມີພາວະໂພຊະນາການທີ່ສົມບູນ, ມີຄຸນນະພາບຊີວິດທີ່ດີ, ເປັນຊັບພະຍາກອນອັນລໍ້າຄ່າຂອງປະເທດຊາດ. ນອກນີ້, ໃນແຜນພັດທະນາເສດຖະກິດ-ສັງຄົມແຫ່ງຊາດ ໂພຊະນາການມີບົດບາດສຳຄັນເນື່ອງຈາກວ່າຕົວຊີ້ວັດດ້ານໂພຊະນາການເປັນສິ່ງທີ່ບົ່ງບອກສະຖານະພາບຂອງການພັດທະນາເສດຖະກິດ-ສັງຄົມຂອງປະເທດຊາດ,ຖ້າປະຊາຊົນໃຫ້ຄວາມສົນໃຈມີຄວາມເຂົ້າໃຈ ແລະຮູ້ຄວາມສຳຄັນເລື່ອງໂພຊະນາການສາມາດນຳເອົາຄວາມຮູ້ໄປໃຊ້ໃຫ້ເປັນປະໂຫຍດໃນຊີວິດປະຈໍາວັນຂອງຕົນເອງ ແລະ ຄອບຄົວແລ້ວຈະເປັນກຳລັງສຳຄັນໃນການແກ້ໄຂ ແລະຫລຸດຜ່ອນບັນຫາໂພຊະນາການທີ່ບໍ່ດີລົງໄດ້ໂດຍສະເພາະການຂາດສານອາຫານ ແລະໂພຊະນາການເກີນ.

ທ່ານ ນາງ ພອນສະຫວັນ ແກ້ວນະຄອນ ຫົວໜ້າສູນໂພສະນາການ ກະຊວງສາ ທາລະນະສຸກ ໄດ້ຍົກໃຫ້ເຫັນເຖິງຄຸນປະໂຫຍດຂອງນໍ້ານົມແມ່ມີສານອາຫານທີ່ຈໍາເປັນທີ່ສຸດສໍາລັບເດັກອ່ອນ ແລະ ເດັກນ້ອຍ ເພາະຈະຊ່ວຍໃຫ້ເດັກນ້ອຍມີພູມຕ້ານທານຕໍ່ກັບເຊື້ອພະຍາດ, ຫຼຸດຜ່ອນອັດຕາການເຈັບເປັນ, ການຕາຍຂອງເດັກຫລັງເກີດ. ພ້ອມທັງ ສາ ມາຊ່ວຍຫຼຸດຜ່ອນອັດຕາການຂາດສານອາຫານຂອງເດັກນ້ອຍ. ຜົນການສຳຫຼວດດັດສະນີໝາຍຂອງສັງຄົມລາວປີ 2012 ອັດຕາການລ້ຽງລູກດ້ວຍນໍ້ານົມແມ່ພຽງຢ່າງດຽວ ແຕ່ເດັກແລກເກີດ ຈົນຮອດອາຍຸ 6 ເດືອນ ມີ 40% ແລະ ເພີ່ມຂຶ້ນໃນປີ 2017 ເປັນ 45%.

ທ່ານ ບຸນແຝງ ພູມມະໄລສິດ ໄດ້ກ່າວວ່າ: ການສະເຫຼີມສະຫຼອງ ສັບປະດາສາກົນຂອງການລ້ຽງລູກດ້ວຍນົມແມ່ ແມ່ນຈັດຂຶ້ນໃນອາທິດທໍາອິດຂອງທຸກໆເດືອນສິງຫາໂດຍຫົວຂໍ້ “ຜັນຂະຫຍາຍການສຶກສາ ແລະ ການສະໜັບສະໜູນສຳລັບການລ້ຽງລູກດ້ວຍນົມແມ່” ເພື່ອຊີ້ໃຫ້ເຫັນເຖີງຄວາມສໍາຄັນຂອງການຮ່ວມມືລະຫວ່າງ ພາກສ່ວນກ່ຽວຂ້ອງທຸກຄົນ ໃນທົ່ວສັງຄົມເພື່ອປົກປ້ອງ, ສົ່ງເສີມ ແລະສະໜັບສະໜູນການລ້ຽງລູກດ້ວຍນົມແມ່ ໃນ ສປປ ລາວ, ນໍ້ານົມແມ່ສາມາດໃຫ້ໂພຊະນາການ ແລະ ພູມຄຸ້ມກັນຢ່າງສົມບູນແບບໃຫ້ເເກ່ເດັກ ແລະສາມາດຊ່ວຍປ້ອງກັນການຕິດເຊື້ອຕ່າງໆ, ພ້ອມຍັງສົ່ງເສີມຄວາມຜູກພັນລະຫວ່າງແມ່ ແລະເດັກ. ຄຸນປະໂຫຍດຂອງນໍ້ານົມແມ່ ແມ່ນໄດ້ຮັບການຄົ້ນຄວ້າຢ່າງດີ ແລະຫຼັກຖານຕ່າງໆນຍັງສະແດງໃຫ້ເຫັນວ່າເດັກນ້ອຍທີ່ກິນນົມແມ່ມີໂອກາດຢ່າງນ້ອຍ 6 ເທົ່າໃນການຢູ່ລອດໃນໄລຍະຕົ້ນເດືອນ ເມື່ອທຽບໃສ່ເດັກນ້ອຍທີ່ບໍ່ໄດ້ກິນນົມແມ່.”

ທ່ານ ບຸນແຝງ ພູມມະໄລສິດ ຍັງກ່າວອີກວ່າ: ມາດຕະການຫຼູດຜ່ອນການລະບາດຂອງພະຍາດ ໂຄວິດ-19 ໄດ້ສົ່ງຜົນກະທົບຕໍ່ການໃຫ້ບໍລິການດ້ານໂພຊະນາການສໍາລັບເດັກໃນ ສປປ ລາວ ເເລະຜົນສໍາເລັດຕ່າງໆທີ່ ສປປ ລາວ ໄດ້ບັນລຸໃນສໍາລັບໂພຊະນາການຂອງເດັກໃນໄລຍະທີ່ຜ່ານມາ. ການປິດປະເທດ ແລະມາດຕະການຮັກສາໄລຍະຫ່າງ ເຮັດໃຫ້ພໍ່ແມ່ ແລະ ຜູ້ປົກຄອງບໍ່ສາມາດເຂົ້າເຖິງໂອກາດໃນການຮັບຄໍາປຶກສາຊ່ຽວຊານ. ນອກຈາກນັ້ນ, ການໄດ້ຮັບຂໍ້ມູນຂ່າວສານທີ່ບໍ່ຖືກຕ້ອງກ່ຽວກັບໂຄວິດ-19 ແລະການຕະຫຼາດສໍາລັບສິ່ງທົດແທນນໍ້ານົມແມ່ສົ່ງຜົນກະທົບດ້ານລົບຕໍ່ການຕັດສິນໃຈຂອງພໍ່ແມ່ໃນການໃຫ້ອາຫານລູກ ແລະສຸຂະພາບຂອງເດັກນ້ອຍ.

แชร์