ໂຄວິດຍັງເປັນໄພຮ້າຍ ຮຽກຮ້ອງທຸກຄົນຕ້ອງສັກວັກຊິນ

ວັນທີ 3 ສິງຫາ 2022 ທີ່ເມືອງວັງວຽງ ແຂວງວຽງຈັນໄດ້ມີກອງປະຊຸມຝຶກອົບຮົມວຽກງານໂຄສະນາເພື່ອເພີ່ມອັດຕາປົກຄຸມການສັກວັກຊິນກັນພະຍາດໂຄວິດ-19 ແລະວັກຊິກພາກປົກກະຕິໃຫ້ແກ່ສື່ມວນຊົນຂັ້ນສູນກາງ ແລະ ແຂວງພາກກາງໂດຍເຂົ້າຮ່ວມຂອງທ່ານ ວິສິດ ຄຳລືຊາ ຫົວໜ້າສູນສື່ສານເພື່ອສຸຂະພາບ ແລະ ສຸຂະສຶກສາ, ມີບັນດາຜູ້ຕາງໜ້າສາທາແຂວງຈຳປາສັກ ແລະແຂວງພາກກາງພ້ອມດ້ວຍສື່ມວນຊົນແລະພາກສ່ວນກ່ຽວຂ້ອງເຂົ້າຮ່ວມ.

ຈຸດປະສົງເພື່ອແລກປ່ຽນ ແລະຖອດຖອນບົດຮຽນການປຸກລະດົມ ແລະໂຄສະນາສະພາບການຄວບຄຸມພະຍາດ ແລະການສັກວັກຊິນກັນພະຍາດໂຄວິດຜ່ານທາງສື່ມວນຊົນ, ສື່ອອນລາຍ ແລະທາງຊຸມຊົນຂັ້ນສູນກາງຈົນຮອດທ້ອງຖິ່ນໃນໄລຍະຜ່ານມາ, ເພື່ອວາງແຜນໂຄສະນາ ແລະປຸກລະດົມການສັກວັກຊິນກັນພະຍາດໂຄວິ-19 ຜ່ານສື່ມວນຊົນແຕ່ສູນກາງຮອດທ້ອງຖິ່ນ.

ສຳລັບຕົວເລກການຕິດເຊື້ອພະຍາດໂຄວິດ-19 ຢູ່ປະເທດລາວເຮົາ ມາຮອດວັນທີ 28 ກໍລະກົດ 2022 ທົ່ວປະເທດມີຜູ້ຕິດເຊື້ອທົງໝົດ 211.061 ກໍລະນີ (ພາຍໃນ 194.988 ກໍລະນີ ແລະນຳເຂົ້າ 16.063 ກໍລະນີ), ສ່ວນອັດຕາການສັກວັກຊິນເຂັມທີ1 ມີທັງໝົດ 5,87 ລ້ານຄົນ ເທົ່າກັບ 80,1%, ເຂັມຄສັກຄົບ 5,2ລ້ານຄົນ ເທົ່າກັບ 71%.

ທ່ານ ດຣ ທອງຄຳ ພັດຫະວົງ ຕາງໜ້າສູນສຸຂະພາບແມ່ ແລະເດັກ ກ່າວວ່າ:  ສິ່ງທ້າທ້າຍການນໍາໃຊ້ວັກຊີນໂຄວິດ-19 ຍັງບໍ່ໄປຕາມຄາດໝາຍທີ່ວາງໄວ້ຕົວເລກການສັກວັກຊິນ2 ເດືອນຜ່ານມາ ເດືອນ 6-7/2022 ບໍ່ເພີ່ມຂຶ້ນຫຼາຍ, ພໍ່ແມ່ຜູ້ປົກຄອງຈໍານວນໜຶ່ງບໍ່ອະນຸຍາດໃຫ້ລູກຫຼານມາຮັບວັກຊິນກຸ່ມເດັກນ້ອຍອາຍຸ 6-11 ປີ ເຂັມຄົບໄດ້ພຽງ 54,3%, ພາກສ່ວນທີ່ກ່ຽວຂ້ອງຕ່າງໆ ຍັງບໍ່ເປັນເຈົ້າການກັບສະຖິຕິເປົ້າໝາຍ ແລະນໍາພາການສັກວັກຊິນຢ່າງເປັນຂະບງນເທື່ອໂດຍສະເພາະເຂັມກະຕຸ້ນ, ການກວດບັດວັກຊິນ ເປັນມາດຕະການໜຶ່ງເພື່ອຊຸກຍູ້ໃຫ້ກຸ່ມເປົ້າໝາຍໄດ້ຮັບວັກຊິນ, ແຕ່ເຫັນວ່າຍັງບໍ່ເຫັນກວດບັດດັ່ງກ່າວຢ່າງເຄັ່ງຄັດໃນສະຖານທີ່ຕ່າງໆເຊັ່ນ: ຮ້ານຄ້າ, ຮ້ານອາຫານ, ລົດໂດຍສານ ແລະໂຮງຮຽນ.

ສ່ວນແຜນ 5 ເດືອນທ້າຍປີ 2022 ສຸມໃສ່ເລັ່ງສັກວັກຊິນໃນກຸ່ມເປົ້າໝາຍໃຫ້ໄປຕາມຄາດໝາຍກາຍ 80% ທຸກແຂວງໃນປີ 2022, ເຄື່ອນທີ່ສັກວັກຊິນກັນພະຍາດໂຄວິດ-19 ເຂັມກະຕຸ້ນໃຫ້ພະນັກງານລັດຖະກອນກໍາລັງປ້ອງກັນຊາດ, ປ້ອງກັນຄວາມສະຫງົບ, ຜູ້ສູງອາຍຸດ້ວຍວິທີເຄື່ອນທີ່ບໍລິການສັກວັກຊິນບັນດາກະຊວງ. ສະຖາບັນການສຶກສາ, ສໍານັກງານອົງການໂຮງງານ, ໂຮງຮຽນຜູ້ພາດໂອກາດໃນຂອບເຂດທົ່ວປະເທດ, ຂະຫຍາຍກຸ່ມເປົ້າໝາຍໃໝ່ ເດັກ 3-5 ປີ ໃນເດືອນກັນຍາ 2022, ເລັ່ງສຸ່ມໃສ່ອັດຕາການປົກຄຸມທີ່ກະຕຸ້ນໃຫ້ໄດ້ 50% ຂອງປະຊາກອນທັງໝົດໂດຍນໍາໃຊ້ວັກຊິນທີ່ມີຢູ່ໃນປະຈຸບັນເພື່ອຫຼີກລ່ຽງບໍ່ໃຫ້ວັກຊິນໝົດອາຍຸກ່ອນການນໍາໃຊ້ໃນທ້າຍປີ, ສ່ວນການສັກວັກຊິນປົກກະຕິ ແລະວັກຊິນຄວິດ-19 ເວລາເຄື່ອນທີ່ລົງບ້ານ, ພ້ອມນັ້ນສາທາລະນະສຸກຍັງຮຽກຮ້ອງທຸກຄົນໃນສັງຄົມໃຫ້ໄດ້ຮັບການສັກວັກຊິນໄດ້ຕາມລະດັບຄາດໝາຍເພື່ອຫຼີກລຽງການເສຍຊີວິດເມື່ອຕິດພະຍາດໂຄວິດ-19 ເນື່ອງຈາກປະຈຸບັນຍັງມີການລະບາດຢູ່.

 

แชร์