ເຜີຍແຜ່ລະບົບຖານຂໍ້ມູນຂ່າວສານດ້ານການຕະຫຼາດສິນຄ້າກະສິກຳຢູ່ລາວ

ກອງປະຊຸມເຜີຍແຜ່ ລະບົບຖານຂໍ້ມູນຂ່າວສານ ທາງດ້ານການຕະຫລາດຂອງສິນຄ້າກະສິກຳຢູ່ ສປປ ລາວ ຈັດຂຶ້ນໃນວັນທີ 2 ສິງຫາ 2022 ຢູ່ແຂວງບໍລິຄຳໄຊ ໂດຍການຮ່ວມມື ລະຫວ່າງ ກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ ກັບ ພະແນກ ອຸດສາຫະກຳ ແລະ ການຄ້າ ແຂວງບໍລິຄຳໄຊ ພາຍໃຕ້ໂຄງການຜະລິດກະສິກຳເປັນສິນຄ້າ ຢູ່ ສປປ ລາວ.

ກອງປະຊຸມຄັ້ງນີ້, ໄດ້ຮັບຟັງການສະເໜີຜົນສໍາເລັດໃນການສ້າງ ແລະ ພັດທະ ນາລະບົບຖານຂໍ້ມູນ ຕະຫລາດສິນຄ້າກະສິກໍາຂອງລາວ (LAO-AMIS) ແລະ ການນໍາໃຊ້ລະບົບຈາກຊ່ຽວຊານພາຍໃນ ໃຫ້ແກ່ຂະແໜງການພາກລັດ (ອຸດສາຫະກໍາ ແລະ ການຄ້າ, ກະສິກໍາ ແລະ ປ່າໄມ້) ແລະ ຜູ້ປະກອບການທຸລະກິດຢູ່ພາຍໃນແຂວງເປົ້າໝາຍຂອງໂຄງການ, ພ້ອມທັງຮອງການເກັບກໍາຂໍ້ມູນຂ່າວສານກ່ຽວກັບ ສິນຄ້າກະສິກຳເຊັ່ນ: ເຂົ້າ, ສາລີ ແລະ ພືດຜັກ ຢູ່ ສປປ ລາວ, ເປັນຂໍ້ມູນພື້ນຖານທີ່ນໍາໃຊ້ເຂົ້າໃນການວິເຄາະ ແລະ ຄາດຄະເນຕະຫລາດຂອງສິນຄ້າກະສິກຳ ຢູ່ພາຍໃນປະເທດ ແລະ ສາກົນ; ເພື່ອສະໜອງຂໍ້ມູນດ້ານການຕະຫລາດກ່ຽວກັບ ສິນຄ້າກະສິກໍາ (ລາຄາ, ປະລິມານ ແລະ ຄຸນນະ ພາບ) ແລະ ຂໍ້ມູນອື່ນໆທີ່ກ່ຽວຂ້ອງໃຫ້ກະສິກອນ ກຸ່ມຜູ້ຜະລິດ, ກຸ່ມຜູ້ປະກອບການໂຮງສີ/ໂຮງງານປຸ່ງແຕງ ແລະ ທຸກໆພາກສ່ວນກ່ຽວຂ້ອງກັບຕ່ອງໂສ້ສິນຄ້າກະສິກໍາ. ພ້ອມນີ້ກອງປະຊຸມ ຍັງໄດ້ແນະນໍາແບບຟອມການເກັບກໍາຂໍ້ມູນແຕ່ລະງວດ, ແຕ່ລະໄລຍະ ລວມເຖິງການປ້ອນຂໍ້ມູນ, ການແກ້ໄຂຂໍ້ມູນ ແລະ ການນໍາໃຊ້ຂໍ້ມູນໃນລະບົບດັ່ງກ່າວ ເພື່ອໃຫ້ເກີດປະໂຫຍດສູງສຸດ.

ກອງປະຊຸມຄັ້ງນີ້, ຈັດຂຶ້ນໂດຍການເປັນປະທານຮ່ວມຂອງ ທ່ານ ດາລາ ອິນດາວົງ ຮອງຫົວໜ້າ ກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ, ທ່ານ ໂພສອນ ທະລາພອນ ຮອງຫົວຫນ້າພະແນກອຸດສາຫະກໍາ ແລະ ການຄ້າ ແຂວງບໍລິຄໍາໄຊ ແລະ ທ່ານ ສົມຫວັງ ແກ້ວວົງວິຈິດ ຮອງຫົວຫນ້າພະແນກກະສິກໍາ ແລະ ປ່າໄມ້ ແຂວງ ບໍລິຄໍາໄຊ, ມີພາກສ່ວນທີ່ກ່ຽວຂ້ອງ ເຂົ້າຮ່ວມ.

แชร์