ທາບທາມສ້າງແຜນກໍານົດພະນັກງານນໍາພາ-ບັນຊາ ຂັ້ນສູນກາງຄຸ້ມຄອງ

ໃນວັນທີ 3 ສິງຫາ 2022  ທີ່ກະຊວງປ້ອງກັນປະເທດ ໄດ້ເປີດກອງປະຊຸມທາບທາມ ສ້າງແຜນກໍານົດພະນັກງານນໍາພາ-ບັນຊາ ຂັ້ນສູນກາງຄຸ້ມຄອງ ຂອງກະຊວງປ້ອງກັນປະເທດ ໂດຍການເປັນປະທານຂອງ ສະຫາຍ ພົນເອກ ຈັນສະໝອນ ຈັນຍາລາດ ກຳມະການກົມການເມືອງສູນກາງພັກ, ຮອງນາຍົກລັດຖະມົນຕີ, ລັດຖະ ມົນຕີກະຊວງປ້ອງກັນປະເທດ, ມີສະຫາຍ ນາງ ບຸດສະດີ ຖານະເມືອງ ກຳມະການສູນກາງພັກ, ຮອງຫົວໜ້າຄະນະຈັດຕັ້ງສູນກາງພັກ, ພ້ອມດ້ວຍບັນດາກຳມະການສູນກາງພັກ, ຄະນະປະຈຳພັກ-ຄະນະບໍລິຫານງານພັກກະຊວງ, ຄະນະພັກບັນດາກົມໃຫຍ່, ກອງພົນ, ກອງບັນຊາການເຫລົ່າຮົບ, ກອງບັນຊາການທະຫານແຂວງ, ກອງພັນໃຫຍ່, ວິທະຍາຄານ, ໂຮງຮຽນ, ໂຮງໝໍ, ຫົວໜ່ວຍທຸລະກິດທົ່ວກອງທັບ, ບັນດານາຍທະຫານຂັ້ນສູງ ເຂົ້າຮ່ວມ.

ສະຫາຍ ພົນເອກ ຈັນສະໝອນ ຈັນຍາລາດ ໄດ້ກ່າວເປີດກອງປະຊຸມວ່າ: ການ ດໍາເນີນກອງປະຊຸມທາບທາມ ສ້າງແຜນກຳນົດພະນັກງານນຳພາ-ບັນຊາ ຂັ້ນສູນກາງຄຸ້ມຄອງຢູ່ອົງຄະນະພັກກະຊວງປ້ອງກັນປະເທດໃນຄັ້ງນີ້ ສຸດທີ່ມີຄວາມໝາຍສໍາຄັນ,ເປັນການເລືອກເຟັ້ນເປົ້າໝາຍ ເພື່ອຈັດວາງເຂົ້າໃນໂຄງປະກອບຕຳແໜ່ງງານຂັ້ນຕ່າງໆຢູ່ໃນກະຊວງປ້ອງກັນປະເທດ ທີ່ສູນກາງຄຸ້ມຄອງ ແນໃສ່ຮັບປະກັນລັກສະນະສືບທອດປ່ຽນແທນຕໍ່ເນື່ອງໃນສະເພາະໜ້າ ແລະ ຍາວນານ, ທັງເປັນການກະກຽມບຸກຄະລະກອນໃຫ້ແກ່ກອງປະຊຸມໃຫຍ່ ຄັ້ງທີ VI ຂອງອົງຄະນະພັກກະຊວງປ້ອງກັນປະເທດ, ພ້ອມກັນນີ້ ກໍເປັນກອງປະຊຸມ ເພື່ອກວດກາ ແລະ ສະຫລຸບຕີລາຄາຄືນຜ່ານການຈັດ ຕັ້ງປະຕິບັດແຜນກໍານົດພະນັກງານນໍາພາ-ບັນຊາ ຂັ້ນສູນກາງຄຸ້ມຄອງຢູ່ອົງຄະນະພັກກະຊວງປ້ອງກັນປະເທດ ໃນຊຸມປີຜ່ານມາ.

ໂອກາດນີ້, ສະຫາຍລັດຖະມົນຕີກະຊວງປ້ອງກັນປະເທດ ຍັງໄດ້ເນັ້ນຕື່ມວ່າ: ວຽກງານສ້າງແຜນກຳນົດພະນັກງານ ມີຄວາມສໍາຄັນ ແລະ ຈໍາເປັນ ເປັນການປະຕິບັດແນວທາງຈັດຕັ້ງຂອງພັກ, ເປັນຂອດຕັດສິນເຖິງຜົນໄດ້ຜົນເສຍ ໃນການຈັດຕັ້ງປະຕິບັດແນວທາງແຜນນະໂຍບາຍລວມຂອງພັກ ແລະ ວຽກງານພະນັກງານ ກໍແມ່ນຂໍກຸນແຈທີ່ສໍາຄັນໃນຂະບວນວິວັດການຈັດຕັ້ງປະຕິບັດ ການນຳພາຂອງພັກ ຕໍ່ພາລະກິດປະຕິວັດກໍຄື ຜົນສຳເລັດວຽກງານຕົວຈິງ, ຍ້ອນແນວນັ້ນສູນກາງພັກ ກໍຄື ຄະນະພັກກະຊວງປ້ອງກັນປະເທດ ຍາມໃດກໍໃຫ້ຄວາມສໍາຄັນ ແລະ ເອົາໃຈໃສ່ຊີ້ນຳເປັນພິເສດ ໃນການສ້າງແຜນກຳນົດພະນັກງານ ເພື່ອຊອກໃຫ້ໄດ້ບັນດາເປົ້າໝາຍທີ່ມີເງື່ອນໄຂມາດຖານຄົບຖ້ວນ ຮັບປະກັນດ້ານປະລິມານ ແລະ ຄຸນນະພາບ, ທັງຈະເປັນພື້ນຖານໃຫ້ແກ່ການບໍາລຸງສ້າງພະນັກງານແຕ່ລະເປົ້າໝາຍໃນສະເພາະໜ້າ ແລະ ຍາວນານ, ທັງນີ້ ກໍເພື່ອຕອບສະໜອງກັບຄວາມຮຽກຮ້ອງຕ້ອງການ ຂອງໜ້າທີ່ການເມືອງຂອງກອງທັບໃນສະເພາະໜ້າ ແລະ ຍາວນານ ກໍຄື ພາລະກິດປ່ຽນແປງໃໝ່ຂອງພັກ.

ໃນວາລະກອງປະຊຸມຄັ້ງນີ້, ພວກເຮົາຈະໄດ້ຮັບຟັງການສະຫລຸບລາຍງານການ ຈັດຕັ້ງປະຕິບັດ ແຜນກຳນົດພະນັກງານນຳພາ-ບັນຊາຂັ້ນສູນກາງຄຸ້ມຄອງ ຢູ່ອົງຄະນະພັກກະຊວງປ້ອງກັນປະເທດ ໃນໄລຍະ 5 ປີ (2018-2022) ແລະ ທິດທາງແຜນການ 5 ປີ (2023-2027), ຜ່ານມະຕິຂອງກົມການເມືອງສູນກາງພັກ ສະບັບເລກທີ 030, 032/ກມສພ ລົງວັນທີ 03/01/2018 ວ່າດ້ວຍວຽກງານ ສ້າງແຜນກໍານົດ ແລະ ມາດຖານພະນັກງານນຳພາ-ຄຸ້ມຄອງ; ບົດແນະນໍາຂອງຄະນະຈັດຕັ້ງສູນກາງພັກ ສະບັບເລກທີ 292/ຄຈສພ, ລົງວັນທີ 26/4/2018 ກ່ຽວກັບການຈັດຕັ້ງປະຕິບັດມະຕິຂອງ ກົມການເມືອງສູນກາງພັກ ວ່າດ້ວຍມາດຕະຖານຂອງພະນັກງານນຳພາ-ຄຸ້ມຄອງ, ວຽກງານຄຸ້ມຄອງພະນັກງານ ແລະ ວຽກງານສ້າງແຜນກໍານົດພະນັກງານນໍາພາ-ຄຸ້ມຄອງ. ພ້ອມກັນນີ້ ຜູ້ແທນກອງປະຊຸມຈະໄດ້ໃຊ້ສິດປະຊາທິປະໄຕປ່ອນບັດທາບທາມເອົາພະນັກງານນຳພາ-ບັນຊາຂັ້ນສູນກາງຄຸ້ມຄອງ ຂອງກະຊວງປ້ອງກັນປະເທດ ເພື່ອບັນຈຸເຂົ້າໃນແຜນກໍານົດໃນຊຸມປີຕໍ່ໜ້າ.

ພ້ອມກັນນີ້, ສະຫາຍ ພົນເອກ ຈັນສະໝອນ ຈັນຍາລາດ ຍັງໄດ້ຮຽກຮ້ອງມາຍັງບັນດາສະຫາຍຜູ້ແທນເຂົ້າຮ່ວມກອງປະຊຸມຄັ້ງນີ້, ຈົ່ງພ້ອມກັນເຊີດຊູຄວາມຮັບຜິດຊອບການເມືອງຂອງຕົນ ໃນການໃຊ້ສິດປະຊາທິປະໄຕ ເຕັມສ່ວນ, ສຸມສະຕິປັນຍາໃນການຄົ້ນຄວ້າ, ຄັດເລືອກເອົາເປົ້າໝາຍຜູ້ທີ່ມີເງື່ອນໄຂມາດຖານ ຄົບຖ້ວນເຂົ້າໃນແຜນກຳນົດພະນັກງານນຳພາ-ບັນຊາຂັ້ນຍຸດທະສາດ ຂອງກະຊວງປ້ອງກັນປະເທດ.

แชร์