ສວນຈຳປາມຸງຄຸນ ກຽມຫຼາຍກິດຈະກຳຕ້ອນຮັບປີທ່ອງທ່ຽວລາວ-ຈີນ

  ເພື່ອເປັນການປະກອບສ່ວນໃນການດຶງດູດນັກທ່ອງທ່ຽວໃຫ້ເຂົ້າມາທ່ຽວລາວຫຼາຍຂຶ້ນ, ເນື່ອງໃນໂອກາດລາວເຮົາເປີດປີທ່ອງທ່ຽວລາວ-ຈີນ ແລະ ທັງເປັນການເຊີນຊວນຄົນລາວເຂົ້າຊົມ, ຮຽນຮູ້ກ່ຽວກັບດອກໄມ້ປະຈຳຊາດລາວ ແລະ ກຽມໃສ່ປີໃໝ່ລາວໃກ້ຈະມາເຖິງນີ້, ສວນຈຳປາມຸງຄຸນໄດ້ກຽມກິດຈະກຳຫຼາກຫຼາຍເອົາໃຈນັກທ່ອງທ່ຽວທີ່ຈະເຂົ້າມາຊ່ວງວັນ ທີ 5-7 ເມສານີ້.

  ທ່ານ ນາງ ອຸທະກີ ຈຸນລາມະນີ-ຄຳຜຸຍ ອຳນວຍການສວນຈຳປາມຸງຄຸນໃຫ້ສຳພາດກັບທີມຂ່າວເສດຖະກິດ-ສັງຄົມວ່າ: ສວນຈຳປາມຸງຄຸນໄດ້ເລີ່ມເປີດໃຫ້ມວນຊົນເຂົ້າຊົມຢ່າງເປັນທາງການນັບແຕ່ປີ 2015 ເປັນຕົ້ນມາຊຶ່ງຕະຫຼອດໄລຍະ 4 ປີຂອງການເປີດໃຫ້ສັງຄົມເຂົ້າຊົມ ແລະຮຽນຮູ້ກ່ຽວກັບຊະນິດພັນຂອງດອກຈຳປາຈຳນວນ 250 ສາຍພັນນັ້ນ, ເຫັນວ່າສັງຄົມໃຫ້ຄວາມສົນໃຈຫຼາຍ ຊຶ່ງສະແດງອອກຜ່ານຕົວເລກນັກທ່ອງທ່ຽວທີ່ເຂົ້າມາໃນແຕ່ລະປີ, ສະເພາະປີນີ້ແມ່ນຈະພິເສດກວ່າທຸກປີເນື່ອງຈາກວ່າປະເທດເຮົາໄດ້ເປີດປີທ່ອງທ່ຽວລາວ-ຈີນ ດັ່ງນັ້ນສວນຈຳປາມຸງຄຸນກໍໄດ້ກຽມຫຼາຍກິດຈະກຳເປັນຕົ້ນແມ່ນສ້າງເງື່ອ ນໄຂໃຫ້ຜູ້ເຂົ້າຊົມສາມາດເຂົ້າເຖິງທຸກຕົ້ນ,ຈັບໄດ້ແຕ່ຫ້າມເດັດດອກຈຳປາ,ສ້າງຈຸດຖ່າຍຮູບເພີ່ມຫຼານຈຸດເພື່ອຕອບຮັບປີທ່ອງທ່ຽວນີ້ ແລະ ທີ່ສຳຄັນໃນລະ ຫວ່າງ ວັນທີ 5-7 ເມສາ 2019 ທີ່ຈະມາເຖິງ ນີ້ ຊຶ່ງເປັນໄລຍະເທສະການເປີດໃຫ້ເຂົ້າ ຊົມສວນກໍຄືລະດູການດອກຈຳປາບານ, ທາງສວນຈະໄດ້ຈັດກິດຈະກຳຫຼາກຫຼາຍ ເຊັ່ນ: ສ້າງບັນຍາກາດຫຼີ້ນບຸນປີໃໝ່,ມີການຫົດນ້ຳ, ຟ້ອນລຳວົງລາວ, ຄ້ອງພວງມາໄລທີ່ເຮັດຈາກດອກຈຳປາໃຫ້ແຂກທຸກຄົນທີ່ເຂົ້າມາທ່ຽວໃນສວນ, ມີພິທີສູ່ຂວັນຕ້ອນຮັບປີໃໝ່ລາວ, ນອກຈາກນັ້ນຍັງມີກິດຈະກຳບໍລິການໃຫ້ນຸ່ງຊຸດລາວເດີມ, ໂດຍກິດຈະກຳນີ້ແມ່ນຈະມີໃຫ້ບໍລິການຈົນກວ່າຈະໝົດລະດູການຂອງດອກຈຳປາບານ.

  ສວນຈຳປາມຸງຄຸນເປັນອີກໜຶ່ງສະຖານທີ່ທີ່ເໝາະສົມແກ່ການທ່ອງທ່ຽວ, ເນື່ອງດ້ວຍສະຖານທີ່ຕັ້ງບໍ່ໄກ, ຈຸດທີ່ຕັ້ງຢູ່ລະຫວ່າງກາງເສັ້ນທາງລົດໄຟລາວ-ຈີນ ແລະເຂດເສດຖະກິດພິເສດ, ດັ່ງນັ້ນຈຶ່ງໝັ້ນໃຈວ່າການເປີດງານເທສະການຈຳປາບານປີນີ້ບວກກັບປີທ່ອງທ່ຽວ ລາວ-ຈີນ ນີ້ຈະສາມາດດຶງດູດແຂກທັງພາຍ ໃນ ແລະ ຕ່າງປະເທດເຂົ້າມາຫຼາຍສົມຄວນ, ທັງນີ້ກໍເພາະວ່າສວນຈຳປາມຸງຄຸນໄດ້ມີຕູບໃຫ້ບໍລິການທັງໝົດ 40 ຕູບ ແລະ ຕູບໃຫຍ່ອີກ 2 ຕູບ, ມີອາຫານ ແລະເຄື່ອງດື່ມຄົບຊຸດ, ສະຖານທີ່ຈອດລົດກວ້າງຂວາງ, ທີ່ສຳຄັນທາງສວນເກັບຄ່າບຳລຸງຮັກສາຕົ້ນຈຳປາພຽງແຕ່ 5 ພັນກີບຕໍ່ຄົນສະເພາະເຂົ້າຊົມ ສວນ, ສ່ວນພະສົງ, ຄົນພິການ ແລະເດັກຕ່ຳກວ່າ 10 ປີ ແມ່ນຈະບໍ່ໄດ້ເສຍຄ່າ.

ຂ່າວ: ປັອກ    

แชร์