ລົງນາມບົດບັນທຶກ ລະຫວ່າງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ

ໃນວັນທີ 3 ສິງຫາ ນີ້ ທີ່ ອົງການໄອຍະການປະຊາຊົນສູງສຸດ ໄດ້ຈັດພິທີລົງນາມບົດບັນທຶກການກຳນົດກົນໄກປະສານງານໃນການຈັດຕັ້ງປະຕິບັດບົດບັນທຶກຮ່ວມ 4 ພາກສ່ວນ ກ່ຽວກັບການດໍາເນີນຄະດີຕາມຂະບວນຍຸຕິທໍາ ຄັ້ງທີ VI ລະຫວ່າງ ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ໂດຍໃຫ້ກຽດເປັນປະທານຮ່ວມຂອງ ທ່ານ ນາງ ວຽງທອງ ສີພັນດອນ ຄະນະເລຂາທິການສູນກາງພັກ ປະທານສານປະຊາຊົນສູງສຸດ ແລະ ທ່ານ ໄຊຊະນະ ໂຄດພູທອນ ກໍາມະການສູນກາງພັກ ຫົວໜ້າອົງການໄອຍະການປະຊາຊົນສູງສຸດ, ມີຮອງຫົວໜ້າອົງການໄອຍະການປະຊາຊົນສູງສຸດ, ຮອງປະທານສານປະຊາຊົນສູງສຸດ, ບັນດາຫົວໜ້າກົມ, ຫ້ອງການ, ຄະນະປະສານງານ ແລະ ພະນັກງາານຫຼັກແຫຼ່ງທັງສອງຝ່າຍເຂົ້າຮ່ວມ.

 ບົດບັນທຶກດັ່ງກ່າວ, ໄດ້ຜ່ານການຄົ້ນຄວ້າ, ປຶກສາຫາລື ແລະ ເປັນເອກະພາບກັນ ຊຶ່ງມີ 13 ຂໍ້ ຄື: 1. ກອງປະຊຸມຂອງຄະນະປະສານງານຮ່ວມຈັດຂຶ້ນຢ່າງໜ້ອຍສາມເດືອນຕໍ່ຄັ້ງ ໂດຍມີການປ່ຽນຜຽນກັນ ຊຶ່ງໃນປີທໍາອິດ ອົງການໄອຍະການປະຊາຊົນ ຈະເປັນເຈົ້າພາບຈັດກອງປະຊຸມ ໃນກໍລະນີຈໍາເປັນ ແລະ ຮີບດ່ວນນັ້ນອາດຈະຈັດຂຶ້ນກ່ອນກໍານົດເວລາກໍໄດ້; 2. ເນື້ອໃນທີ່ຈະນໍາມາປະຊຸມຮ່ວມ ແມ່ນບັນຫາຄວາມເຂົ້າໃຈທາງດ້ານກົດໝາຍທີ່ບໍ່ທັນເປັນເອກະພາບກັນ, ການສັ່ງຟ້ອງ ຫຼື ບັນຫາການດໍາເນີນຄະດີ (ອາຍາ, ແພ່ງ, ແຮງງານ, ການຄ້າ, ຄອບຄົວ, ເດັກ ແລະ ປົກຄອງ) ທີ່ມີຄວາມຫຍຸ້ງຍາກສັບສົນ, ຄະດີລາຍໃຫຍ່ ຫຼື ຄະດີທີ່ພົວພັນກັບການຮ່ວມມືສາກົນ ຫຼື ຄະດີທີ່ສັງຄົມໃຫ້ຄວາມສົນໃຈ, ການກໍານົດເຫດການຂອງຄະດີ, ການຕີຄວາມໝາຍຂອງກົດໝາຍ ແລະ ບັນຫາອື່ນໆທີ່ຕິດພັນກັບການປະຕິບັດໜ້າທີ່ຮ່ວມກັນ; 3. ໃຫ້ແຕ່ລະພາກສ່ວນເປັນເຈົ້າການ ສັງລວມບັນຫາຕ່າງໆ ໃນການຈັດຕັ້ງປະຕິບັດຕົວຈິງ ເພື່ອນໍາສະ                   ເໜີຄະນະປະສານງານ ຈັດກອງປະຊຸມໃນເວລາອັນຄວນ; 4. ການເຂົ້າຮ່ວມກອງປະຊຸມ ນອກຈາກຄະນະປະສານງານແລ້ວ ອາດຈະເຊີນພາກສ່ວນອື່ນເຂົ້າຮ່ວມປະຊຸມນໍາກັນກໍໄດ້; 5. ໃຫ້ແຕ່ລະພາກສ່ວນ ກໍານົດກົນໄກໃນການສະຫຼຸບລາຍງານສະຖິຕິຄະດີອາຍາ, ແພ່ງ, ແຮງງານ, ການຄ້າ, ຄອບຄົວ, ເດັກ ແລະ ປົກຄອງ ລະຫວ່າງ ອົງການໄອຍະການປະຊາຊົນ ແລະ ສານປະຊາຊົນ ແຕ່ສູນກາງຮອດທ້ອງຖິ່ນຕາມລະບົບສາຍຕັ້ງ ຢ່າງເປັນເອກະພາບໃນຂອບເຂດທົ່ວປະເທດ; 6. ໃຫ້ຫ້ອງການອົງການໄອຍະການປະຊາຊົນສູງສຸດ ແລະ ຫ້ອງການສານປະຊາຊົນສູງສຸດ ສົມທົບກັບກົມທີ່ກ່ຽວຂ້ອງ ເພື່ອຄົ້ນຄວ້າຮ່າງແບບຟອມ, ເກັບກໍາ ແລະ ລາຍງານສະຖິຕິ ໃຫ້ລະອຽດ, ຄົບຖ້ວນ. ພ້ອມທັງອອກແຈ້ງການໃຫ້ທ້ອງຖິ່ນເປັນບ່ອນອີງໃນການຈັດຕັ້ງປະຕິບັດ; 7. ກໍານົດເອົາວັນທີ 20 ຂອງທຸກໆເດືອນເປັນມື້ປິດໂຕເລກ ແລະ ສະຫຼຸບເຂົ້າບັນຊີສະຖິຕິລາຍງານສາຍຕັ້ງຂອງຕົນ ຢ່າງເປັນປົກກະຕິ ແລະ ທັນເວລາ; 8. ໃຫ້ຄະນະປະສານງານຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ ຄົ້ນຄວ້າ  ແລະ ສ້າງນິຕິກໍາຮ່ວມ ກ່ຽວກັບການດໍາເນີນຄະດີ ຂອງອົງການໄອຍະການປະຊາຊົນ ແລະ ສານປະຊາຊົນ ທີ່ເຫັນວ່າ ການຈັດຕັ້ງປະຕິບັດຜ່ານມາຍັງບໍ່ທັນເປັນເອກະພາບກັນ ຕາມທີ່ກໍານົດໄວ້ໃນບົດບັນທຶກກອງປະຊຸມຮ່ວມ 4 ພາກສ່ວນ ກ່ຽວກັບການດໍາເນີນຄະດີຕາມຂະບວນຍຸຕິທໍາ ຄັ້ງທີ VI, ລົງວັນທີ 15 ກໍລະກົດ 2021 ເພື່ອເປັນເຄື່ອງມື, ບ່ອນອີງ ໃຫ້ແກ່ພະນັກງານສອງອົງການປະຕິບັດໃຫ້ຖືກຕ້ອງ ແລະ ເປັນເອກະພາບກັນໃນຂອບເຂດທົ່ວປະເທດ; 9. ສໍາລັບນິຕິກໍາສະເພາະທີ່ແຕ່ລະພາກສ່ວນ ໄດ້ອອກນັ້ນ ສົ່ງໃຫ້ແກ່ກັນຊາບເປັນປົກກະຕິ; 10. ໃຫ້ຄະນະປະສານງານສອງພາກສ່ວນ ເປັນຜູ້ສັງລວມບົດບັນທຶກກອງປະຊຸມຮ່ວມແຕ່ລະຄັ້ງ ແລະ ນິຕິກໍາຮ່ວມອື່ນໆ ເພື່ອສ້າງເປັນຄູ່ມືຝຶກອົບຮົມໃຫ້ຖັນແຖວພະນັກງານໄອຍະການ ແລະ ຜູ້ພິພາກສາ ກໍຄືວິຊາການຂອງສອງພາກສ່ວນ ແຕ່ສູນກາງຮອດທ້ອງຖິ່ນ; 11. ໃຫ້ມີການຈັດຕັ້ງການຝຶກອົບຮົມຮ່ວມກັນທາງດ້ານວິຊາການກົດໝາຍ, ການດໍາເນີນຄະດີໃຫ້ພະນັກງານສອງອົງການມີຄວາມເຂົ້າໃຈຖືກຕ້ອງ ແລະ ປະຕິບັດເອກະພາບກັນຕາມກົດໝາຍ; 12. ງົບປະມານໃນການຝຶກອົບຮົມແຕ່ລະຄັ້ງ ໃຫ້ສອງພາກສ່ວນຮັບຜິດຊອບຮ່ວມກັນ; 13. ແຕ່ງຕັ້ງຄະນະປະສານງານຮ່ວມໃນການປະຕິບັດບົດບັນທຶກສະບັບນີ້ (ຄະນະປະສານງານຮ່ວມ ລະຫວ່າງ ອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ; ຄະນະປະສານງານຮ່ວມ ລະຫວ່າງ ອົງການໄອຍະການປະຊາຊົນພາກ ແລະ ສານປະຊາຊົນພາກ; ຄະນະປະສານງານຮ່ວມ ລະຫວ່າງ ອົງການໄອຍະການປະຊາຊົນແຂວງ, ນະຄອນຫຼວງ ແລະ ສານປະຊາຊົນແຂວງ, ນະຄອນຫຼວງ; ຄະນະປະສານງານຮ່ວມ ລະຫວ່າງ ອົງການໄອຍະການປະຊາຊົນເຂດ ແລະ ສານປະຊາຊົນເຂດ); ມອບໃຫ້ຫ້ອງການອົງການໄອຍະການປະຊາຊົນສູງສຸດ ແລະ ຫ້ອງການສານປະຊາຊົນສູງສຸດ ອອກແຈ້ງການໃຫ້ບັນດາກົມ, ຄະນະສານທີ່ກ່ຽວຂ້ອງຂອງອົງການໄອຍະການປະຊາຊົນສູງສຸດ ແລະ ສານປະຊາຊົນສູງສຸດ, ອົງການໄອຍະການປະຊາຊົນ ແລະ ສານປະຊາຊົນຂັ້ນທ້ອງຖິ່ນ ຕາມລະບົບສາຍຕັ້ງ ເພື່ອນຳເອົາເນື້ອໃນບົດບັນທຶກຮ່ວມສະບັບນີ້ ໄປຄົ້ນຄວ້າເຊື່ອມຊຶມ ແລະ ຈັດຕັ້ງຜັນຂະຫຍາຍເຂົ້າສູ່ວຽກງານຕົວຈິງຂອງຕົນ ແລະ ຈັດຕັ້ງປະຕິບັັດໃຫ້ມີປະສິດທິຜົນ; ອົງການໄອຍະການປະຊາຊົນ ແລະ ສານປະຊາຊົນ ແຕ່ລະຂັ້ນຕ້ອງຍົກສູງຄວາມຮັບຜິດຊອບ ແລະ ເປັນເຈົ້າການຈັດຕັ້ງປະຕິບັດຢ່າງເຄັ່ງຄັດ, ພ້ອມທັງສະຫຼຸບ, ຖອດຖອນບົດຮຽນໃນການປະຕິບັດເປັນແຕ່ລະໄລຍະ, ໃນເວລາປະຕິບັດຕົວຈິງ ພົບບັນຫາໃດຫຍຸ້ງຍາກ ຕ້ອງລາຍງານຂໍທິດຊີ້ນໍາຕາມສາຍຕັ້ງຂອງຕົນຢ່າງວ່ອງໄວ, ທັນການ; ຄະນະປະສານງານສອງພາກສ່ວນເປັນເຈົ້າການຈັດຕັ້ງຜັນຂະຫຍາຍ, ປະ ສານງານກັບພາກສ່ວນທີ່ກ່ຽວຂ້ອງ ເພື່ອຈັດຕັ້ງປະຕິບັດໃຫ້ປະກົດຜົນເປັນຈິງ.

ການລົງນາມບົດບັນທຶກຮ່ວມສະບັບນີ້ ເປັນການຈັດຕັ້ງຜັນຂະຫຍາຍບົດບັນທຶກຮ່ວມ 4 ພາກສ່ວນ ເຂົ້າສູ່ໜ້າວຽກຕົວຈິງກ່ຽວກັບການສັ່ງຟ້ອງ, ການຕັດສິນ, ພິພາກສາຄະດີອາຍາ ແລະ ການຕິດຕາມກວດກາ ແລະ ການຕັດສິນ, ພິພາກສາຄະດີທາງແພ່ງ ເພື່ອໃຫ້ການດຳເນີນຄະດີຂອງອົງການໄອຍະການປະຊາຊົນ ແລະ ສານປະຊາຊົນມີຄວາມເປັນເອກະພາບ, ໂປ່ງໃສ, ວ່ອງໄວ, ຖືກຕ້ອງ ແລະ ຮັບປະກັນຄວາມຍຸຕິທໍາໃນສັງຄົມ ແນໃສ່ສະກັດກັ້ນປະກົດການຫຍໍ້ທໍ້ທີ່ເກີດຂຶ້ນໃນການດໍາເນີນຄະດີ, ປົກປ້ອງສິດ ແລະ ຜົນປະໂຫຍດ ຂອງລັດ, ສັງຄົມ ແລະ ບຸກຄົນ, ເຮັດໃຫ້ສັງຄົມມີຄວາມສະຫງົບ, ຍຸຕິທຳ ຕາມທິດສ້າງລັດທີ່ປົກຄອງດ້ວຍກົດໝາຍຢ່າງສັກສິດ.

ໃນໂອກາດດັ່ງກ່າວ, ທ່ານ ນາງ ວຽງທອງ ສີພັນດອນ ໄດ້ໃຫ້ກຽດໂອ້ລົມຕໍ່ຄະນະພັກ-ຄະນະນໍາ, ພະນັກງານຫຼັກແຫຼ່ງ ອົງການໄອຍະການປະຊາຊົນທົ່ວປະເທດ ຊຶ່ງກ່ອນອື່ນທ່ານໄດ້ຍ້ອງຍໍ ຊົມເຊີຍຜົນສໍາເລັດຂອງ ອົງການໄອຍະການປະຊາຊົນໃນຊຸມປີຜ່ານມາ, ຮຽກຮ້ອງໃຫ້ອົງການໄອຍະການປະຊາຊົນ ພາຍໃຕ້ການນຳພາຂອງອົງຄະນະພັກອົງການໄອຍະການປະຊາຊົນສູງສຸດ ສືບຕໍ່ເພີ່ມທະວີ ການຊີ້ນໍາ-ນຳພາ, ເຮັດລ້ອນໜ້າທີ່ຂອງຕົນ, ປະຕິບັດວາລະແຫ່ງຊາດເຂົ້າໃນວຽກງານໄອຍະການປະຊາຊົນ, ເອົາໃສ່ໃຈວຽກງານປະສານສົມທົບກັບສານປະຊາຊົນ, ອົງການຈັດຕັ້ງອື່ນໆ ທີ່ກ່ຽວຂ້ອງຢ່າງມີຜົນສໍາເລັດ, ກໍາແໜ້ນແນວທາງການຕ່າງປະເທດຂອງພັກ, ມີສະຕິລະວັງຕົວ, ພ້ອມກັນເຮັດໃຫ້ອົງການໄອຍະການປະຊາຊົນ ເຕີບໃຫຍ່ ເຂັ້ມແຂງຢ່າງບໍ່ຢຸດຢັ້ງ.

แชร์