ລາວ-ຫວຽດນາມ ຕີລາຄາຄືນວຽກງານຊາຍແດນ 6 ເດືອນຕົ້ນປີ

ກອງປະຊຸມ ຄັ້ງທີ II ລະຫວ່າງຄະນະວິຊາການປະສົມຊາຍແດນ ລາວ-ຫວຽດນາມ ໄດ້ຈັດຂຶ້ນໃນລະວັນທີ 26-29 ກໍລະກົດຜ່ານມານີ້ທີ່ແຂວງຊຽງຂວາງ, ຄະນະວິຊາການຊາຍແດນ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ ນຳໂດຍ ສະຫາຍ ອານຸສິນ ຂັດຕິຍະລາດ, ຫົວໜ້າຫ້ອງການຄະນະກຳມະການຊາຍແດນແຫ່ງຊາດ, ກະຊວງການຕ່າງປະເທດ ເປັນຫົວໜ້າຄະນະ ແລະຄະນະວິຊາການຊາຍແດນ ແຫ່ງ ສາທາລະນະລັດ ສັງຄົມນິຍົມ ຫວຽດນາມ ນຳໂດຍ ສະຫາຍ ຫງວຽນ ແອງ ຢຸ້ງ, ຮອງປະທານຄະນະກໍາມະການຊາຍແດນແຫ່ງຊາດ, ກະຊວງການຕ່າງປະເທດ ສສ ຫວຽດນາມ.

ກອງປະຊຸມໄດ້ສັງເກດຕີລາຄາຄືນຂໍ້ສະດວກ ແລະຂໍ້ຫຍຸ້ງຍາກໃນການຈັດຕັ້ງປະຕິບັດວຽກງານຊາຍແດນໃນໄລຍະ 6 ເດືອນ ຕົ້ນປີ 2022,ໂດຍສະເພາະແມ່ນການຮ່ວມກັນລົງສໍາຫຼວດກວດກາ ແລະ ບູລະນະບັນດາຫຼັກໝາຍຊາຍແດນທີ່ເປ່ເພ, ການເຊາະເຈື່ອນຂອງຕາຝັ່ງ, ການເປີດ ແລະ ຍົກລະດັບດ່ານຊາຍແດນ ລາວ-ຫວຽດນາມ, ການແກ້ໄຂບັນຫາຜູ້ຍົກຍ້າຍຕັ້ງພູມລໍາເນົາຕາມລໍາພັງໃຈ ແລະ ແຕ່ງງານບໍ່ຖືກລະບຽບຕາມບໍລິເວນຊາຍແດນຂອງສອງປະເທດ, ເຫັນວ່າ ການປະຕິບັດວຽກງານ ໄດ້ຮັບໝາກຜົນມີປະສິດທິພາບດີສົມຄວນ, ສອງຝ່າຍໄດ້ເຮັດໜ້າທີ່ຢ່າງຕັ້ງໜ້າ ແລະ ມີຄວາມຮັບຜິດຊອບສູງ, ເຮັດໃຫ້ບໍລິເວນຊາຍແດນມີຄວາມສະຫງົບ ແລະ ເປັນລະບຽບຮຽບຮ້ອຍດີໂດຍພື້ນຖານ. ເຈົ້າໜ້າທີ່ຊາຍແດນນັບແຕ່ສູນກາງຫາທ້ອງຖິ່ນ ໄດ້ເປັນເຈົ້າການປະກອບສ່ວນຢ່າງຕັ້ງໜ້າ ແລະ ທັງເປັນຜົນງານອັນໃຫຍ່ຫຼວງເຂົ້າໃນການສະເຫຼີມສະຫຼອງປີແຫ່ງສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022 ກໍຄື ວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ (1962-2022), ວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ (1977-2022). ພ້ອມດຽວກັນນີ້,ຄະນະວິຊາການທັງສອງຝ່າຍກໍໄດ້ຮ່ວມກັນປຶກສາຫາລືວາງທິດທາງແຜນການຮ່ວມມືການຈັດຕັ້ງປະຕິບັດວຽກງານຊາຍແດນໃນ 6 ເດືອນທ້າຍປີ 2022, ສືບຕໍ່ລົງສໍາຫຼວດ ແລະ ບູລະນະສ້ອມແປງຫຼັກໝາຍຊາຍແດນທີ່ເປ່ເພໃຫ້ຄືນສູ່ສະພາບເດີມ, ນໍາສະເໜີລັດຖະບານທັງສອງປະເທດພິຈາລະນາຍົກລະດັບດ່ານຊາຍແດນ, ສົ່ງເສີມການຮ່ວມມືພັດທະນາເສດຖະກິດ ຂອງສອງຝ່າຍໃນບໍລິເວນຊາຍແດນ. ນອກຈາກນັ້ນ, ກໍຍັງໄດ້ປຶກສາຫາລືກ່ຽວກັບແຜນການກະກຽມກອງປະຊຸມເຜີຍແຜ່ນິຕິກໍາທີ່ສໍາຄັນເປັນຕົ້ນແມ່ນສັນຍາວ່າດ້ວຍລະບຽບການຄຸ້ມຄອງຊາຍແດນ ແລະດ່ານຊາຍແດນ ປີ 2016 ລະຫວ່າງ ສປປ ລາວ ແລະ ສສ ຫວຽດນາມ, ອານຸສັນຍາວ່າດ້ວຍເສັ້ນຊາຍແດນ ແລະຫຼັກໝາຍຊາຍແດນປະເທດ ລະຫວ່າງ ສປປ ລາວ ແລະ ສສ ຫວຽດນາມ ໃຫ້ບັນດາເຖົ້າແກ່ແນວໂຮມ, ນາຍບ້ານ ແລະ ປະຊາຊົນລຽບຕາມຊາຍແດນສອງຟາກ ລາວ-ຫວຽດນາມ ໃຫ້ຮັບຮູ້ຈະແຈ້ງ ແລະເຂົ້າໃຈຢ່າງເລິກເຊິ່ງກ່ຽວກັບວຽກງານຊາຍແດນ, ນະໂຍບາຍຂອງພັກ, ກົດໝາຍຂອງລັດ, ຊຶ່ງກອງປະຊຸມດັ່ງກ່າວຄາດວ່າຈະໄດ້ຈັດຂຶ້ນໃນ ເດືອນຕຸລາ ປີ 2022, ທີ່ ແຂວງເຫງະອານ, ສສ ຫວຽດນາມ.

ກອງປະຊຸມໄດ້ຈັດຂື້ນໃນທ່າມກາງບັນຍາກາດອັນສະຫງ່າລາສີແຫ່ງສາຍພົວພັນມິດຕະພາບ, ຄວາມສາມາຄີແບບພິເສດ,ຖານເພື່ອນມິດສະຫາຍອ້າຍນ້ອງ ແລະການຮ່ວມມືຮອບດ້ານລະຫວ່າງ ສອງພັກ, ສອງລັດ ແລະປະຊາຊົນສອງຊາດ ລາວ-ຫວຽດນາມ ໄດ້ຮັບການເພີ່ມພູນຄູນສ້າງພ້ອມທັງຂະຫຍາຍຕົວເຂົ້າສູ່ລວງເລິກ ແລະລວງກ້ວາງຢ່າງບໍ່ຢຸດຢັ້ງ.

ຂ່າວ: ກະຊວງການຕ່າງປະເທດ

แชร์