ຮອງປະທານສະພາແຫ່ງຊາດ ຕິດຕາມກວດກາໂຄງການລົງທຶນຂອງລັດ ຢູ່ເມືອງພີນ ແລະເມືອງເຊໂປນ

ໃນວັນທີ 30-31 ກໍລະກົດນີ້, ທ່ານ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ພ້ອມດ້ວຍຄະນະໄດ້ລົງເຄື່ອນໄຫວຕິດຕາມກວດກາການຈັດຕັ້ງປະຕິບັດ ໂຄງການລົງທຶນຂອງລັດຢູ່ເຂື່ອນໄຟຟ້າເຊລະນອງ 1 ເມືອງພີນ ແລະບໍລິສັດຊັນເປເປີ ເມືອງເຊໂປນ ແຂວງສະຫວັນນະເຂດ ເຂົ້າຮ່ວມມີທ່ານ ກົງແກ້ວ ມີວໍລະຈັກ ປະທານສະພາປະຊາຊົນແຂວງພ້ອມດ້ວຍສະມາຊິກສະ ພາແຫ່ງຊາດ(ສສຊ) ປະຈຳເຂດເລືອກຕັ້ງ ແລະສະມາຊິກສະພາປະຊາຊົນແຂວງ (ສສຂ) ປະຈຳເຂດເລືອກຕັ້ງເມືອງ.

ການເຄື່ອນໄຫວເຮັດວຽກຄັ້ງນີ້ທ່ານຮອງປະທານສະພາແຫ່ງຊາດໄດ້ຮັງຟັງການລາຍງານໂດຍຫຍໍ້ຈາກທັງສອງພາກສ່ວນໂດຍສະເພາະເຂື່ອນໄຟຟ້າເຊລະນອງ 1 ເປັນໜຶ່ງໃນບັນດາໂຄງການທີ່ນອນໃນແຜນພັດທະນາເສດຖະກິດ-ສັງຄົມ ທີ່ໄດ້ຮັບອະນຸຍາດຈາກລັດຖະບານ ສປປ ລາວ ໂດຍມີການລົງທຶນຈາກພາກເອກະຊົນ. ເຂື່ອນດັ່ງກ່າວ ມີກຳລັງຕິດຕັ້ງ 70 MW ເປັນເຂື່ອນແບບ RCC Gravity Dam ມີລວງສູງ 64,5 ແມັດ, ລວງຍາວຂອງສັນເຂື່ອນ 469,3 ລວງກ້ວາງຂອງສັນເຂື່ອນ 6 ແມັດ, ເນື້ອທີ່ອ່າງໂຕ່ງນໍ້າ 2.879 km ແລະ ມີເນື້ອທີ່ອ່າງເກັບນໍ້າ 28.526 ກິໂລຕາແມັດ ເຊິ່ງສາມາດກັກເກັບນໍ້າໄດ້ທັງໝົດ 880.940.000 ແມັດກ້ອນ ໃຊ້ເວລາການກໍ່ສ້າງ 60 ເດືອນ ແລະ ສາມາດຜະລິດກະແສໄຟຟ້າສະເລ່ຍ 268,23 Gwh ຕໍ່ປີ ເພື່ອສະໜອງໄຟຟ້າໃຫ້ແກ່ຜູ້ຊົມໃຊ້ພາກໃຕ້ຂອງລາວ ເຮັດໃຫ້ລະບົບໄຟຟ້າໃນເຂດພາກໃຕ້ມີສະຖຽນລະພາບ ແລະຍັງສາມາດສົ່ງຂາຍອອກນອກປະເທດ. ໂຄງການນີ້ມີໄລຍະສຳປະທານ 25 ປີ ເຊິ່ງໂຄງການໄດ້ດຳເນີການຜະລິດໄຟຟ້າໃນທ້າຍປີ 2019 ລວມມູນຄ່າການກໍ່ສ້າງທັງໝົດ 163.360.000 USD. ສຳລັບການກໍ່ສ້າງສິ່ງອຳນວຍຄວາມສະດວກຕ່າງໆ ໂຄງການໄດ້ສ້າງທາງແຕ່ບ້ານປາຈາຕຽນ ຫາ ບ້ານຈັດສັນ ກ້ວາງ 6 ແມັດ, ຍາວ 7.5 ກິໂລແມັດ ແລະ ສ້າງທາງຕັດເປັນຕາຜ້າຢູ່ພາຍໃນແຕ່ລະບ້ານ, ບຸກເບີກເນື້ອທີ່ປຸກສ້າງເຮືອນໃຫ້ປະຊາຊົນ ທີ່ຖືກຜົນກະທົບຈໍານວນ 88 ຫລັງ, ໃນນັ້ນມີສອງບ້ານຄື: ບ້ານລອຍນ້ຳ 32 ຫລັງ ແລະບ້ານລະເບົານາ 56 ຫລັງ. ນອກນັ້ນ, ຍັງໄດ້ສ້າງໂຮງຮຽນອະນຸບານ, ປະຖົມ, ມັດທະຍົມ, ຫ້ອງການບ້ານ, ເຮືອນພັກຄູ ແລະ ອື່ນໆ.

ສ່ວນບໍລິສັດ ຊັນເປເປີ ໂຮນດິ້ງລາວ ຈຳກັດ ໄດ້ຈົດທະບຽນຢູ່ລາວໃນປີ 2008, ໄດ້ເຊັນສັນຍາວ່າດ້ວຍການພັດມະນາໂຄງການປູໄມ້ອຸດສາຫະກຳ ແລະສ້າງຕັ້ງໂຮງງານຜະລິດເຫຍື່ອເຈ້ຍ ແລະ ເຈ້ຍຄົບວົງຈອນກັບລັດຖະບານລາວໃນປີ 2009; ປັດຈຸບັນການລົງທຶນໃນລາວບັນລຸໄດ້ 9.139,4 ຕື້ກີບ (ເທົ່າກັບ 1 ຕື້ໂດລາສະຫະລັດ), ເນື້ອທີ່ປູກໄມ້ມີ 38.823 ເຮັກຕາ ແລະ ບັນລຸສະມັດຕະພາບການຜະລິດເຈ້ຍ ແລະ ເຫຍື່ອເຈ້ຍໄດ້ 1.500.000 ໂຕນ/ປີ. ບໍລິສັດ ໄດ້ເລີ່ມຈັດຕັ້ງປະຕິບັດໂຄງການປູກໄມ້ ຜະລິດເຫຍື່ອ ແລະ ເຈ້ຍຄົບວົງຈອນໃນປີ 2008 ແລະ ໄດ້ປະຕິບັດຢ່າງຈິງຈັງໃນຮູບແບບ 2+3 ແລະ 1+4 ແບບຮ່ວມມືກັບປະຊາຊົນ, ຊຸກຍູ້ ແລະ ສົ່ງເສີມ ໃຫ້ປະຊາຊົນປູກໄມ້ວິກເພື່ອຫລຸດພົ້ນອອກຈາກຄວາມທຸກຍາກ; ປັດຈຸບັນໄດ້ສຳເລັດເນື້ອທີ່ປູກໄມ້ 38.823 ເຮັກຕາ, ໃນນັ້ນມີເນື້ອທີ່ປູກໄມ້ຮ່ວມມືກັບປະຊາຊົນກວມ 9 ພັນເຮັກຕາ; ບໍລິສັດຍັງຮັບຊື້ໄມ້ໃນລາຄາ 360.000ກີບ/ໂຕນ, ເຮັກຕາໜຶ່ງໄດ້ໄມ້ປະມານ 150 ໂຕນ, ຄິດເປັນເງິນໄດ້ 54 ລ້ານກີບ. ສາມາດສົ່ງເສີມການພັດທະນາເສດຖະກິດທ້ອງຖິ່ນຍົກສູງລະດັບຊີວິດການເປັນຢູ່ຂອງປະຊາຊົນ ແລະນຳໃຊ້ດິນເປົ່າຫວ່າງເພື່ອພັດທະນາໃຫ້ເກີດຜົນປະໂຫຍດ.

ຈາກນັ້ນ, ທ່ານ ນາງ ສູນທອນ ໄຊຍະຈັກ ກໍໄດ້ສະແດງຄວາມຊົມເຊີຍທີ່ໂຄງການເຂື່ອນໄຟຟ້າເຊລະນອງ 1 ທີ່ໄດ້ມີການຊົດເຊີຍໃຫ້ພໍ່ແມ່ປະຊາຊົນທີ່ຖືກຜົນກະທົບ, ແຕ່ກໍຍັງມີຄວາມເປັນຫວ່ງກ່ຽວກັບຜົນກະທົບທາງດ້ານສິ່ງແວດລ້ອມຊີວະນາໆພັນ, ປູປານານໍ້າຢາກໃຫ້ສະພາບກັບມາສົມບູນຄືເກົ່າ; ພ້ອມເນັ້ນໃຫ້ເອົາໃຈໃສ່ຕື່ມກ່ຽວກັບຄອບຄົວ ທີ່ຖືກຜົນກະທົບຈາກການກໍ່ສ້າງເຂື່ອນ ໃນເມື່ອໄດ້ມີການຈັດສັນທີ່ຢູ່ອາໄສທີ່ໝັ້ນຄົງໃຫ້ພວກເຂົາເຈົ້າແລ້ວ ກໍຢາກໃຫ້ຊ່ວຍສ້າງວຽກເຮັດງານທຳແບບຖາວອນ ໃຫ້ພວກເຂົາເຈົ້າ ສາມາດກຸ້ມຢູ່ກຸ້ມກິນດ້ວຍຕົນເອງ. ສຳລັບບໍລິສັດ ຊັນເປເປີ ໂຮນດິ້ງລາວ ຈຳກັດ ຂໍສະແດງຄວາມຊົມເຊີຍຕໍ່ຄວາມເອົາໃຈໃສ່ໃນການຍົກສູງຄຸນນະພາບຊີວິດການເປັນຢູ່ຂອງປະຊາຊົນໂດຍສະເພາະບໍລິສັດໄດ້ມີຮູບການຮ່ວມມື 2+3 ແລະ 1+4 ຖືວ່າເປັບຮູບການທີ່ແທດເໝາະກັບປະຊາຊົນໃນພື້ນທີ່ ປະຊາຊົນມີລາຍໄດ້ທີ່ສູງຂຶ້ນ; ສະແດງຄວາມຊົມເຊີຍທີ່ບໍລິສັດໄດ້ຈ່າຍພັນທະໃຫ້ລັດຖະບານລາວຢ່າງເປັນປົກກະຕິ, ໄດ້ມີສ່ວນຊ່ວຍໃຫ້ທ້ອງຖິ່ນພັດທະນາເສດຖະກິດ-ສັງຄົມດີຂຶ້ນເທື່ອລະກ້າວ;ພ້ອມນັ້ນ,ກໍຍັງມີຄວາມເຊື່ອໝັ້ນວ່າໃນຕໍ່ໜ້າການພັດທະນາສີມືແຮງງານຂອງຄົນລາວຈະໄດ້ຮັບການປັບປຸງດີຂຶ້ນເພາະບໍລິສັດໄດ້ຕັ້ງເປົ້າໝາຍໄວ້ໃນຕໍ່ໜ້າວ່າພະນັກງານຄົນລາວຈະໃຫ້ກວມ 90% ຂອງພະນັກງານທັງໝົດ ເຊິ່ງຈະເປັນການຊ່ວຍໃຫ້ແກ່ການສ້າງຊັບພະຍາກອນມະນຸດນອກຈາກເປັນແຮງງານໃນໄລຍະຕົ້ນແລ້ວ ກໍຢາກໃຫ້ມີຄວາມໝັ້ນຄົງຖາວອນ, ມີການພັດທະນາສີມືໄປເລື້ອຍໆ ເຮັດໃຫ້ແຮງງານລາວໄດ້ມີວຽກເຮັດງານທຳຢູ່ໃນປະເທດຂອງຕົນຫລຸດຜ່ອນການອອກໄປໃຊ້ແຮງງານຢູ່ຕ່າງປະເທດ.

ພາບ-ຂ່າວ: ກົງທະນູຄຳ ພິພັດເສລີ

แชร์