ຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດຢູ່ແຂວງຄຳມ່ວນ

ກອງປະຊຸມຈັດຕັ້ງຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດໃຫ້ແກ່ພະນັກງານອົງການໄອຍະການປະຊາຊົນ ແລະ ເຈົ້າໜ້າທີ່ຕຳຫຼວດ 3 ແຂວງພາກກາງຈັດຂຶ້ນໃນວັນທີ 1 ສິງຫາ 2022 ຢູ່ທີ່ສະໂມສອນແຂວງຄຳມ່ວນໂດຍການເປັນປະທານຂອງ ທ່ານ ບຸນທັນ ບຸນທະວິໄລ ຮອງຫົວໜ້າອົງການໄອຍະການປະຊາຊົນສູງສຸດ, ເຂົ້າຮ່ວມມີ ທ່ານ ພັອ. ບົວພັນ ຟອງມະນີ ຮອງກົມໃຫຍ່ຕຳຫລວດ ຫົວໜ້າກົມຕຳຫລວດສະກັດກັ້ນ ແລະຕ້ານຢາເສບຕິດ, ທ່ານ ຄຳແດງ ສີບຸນເຮືອງ ຫົວໜ້າອົງການໄອຍາການປະຊາຊົນແຂວງຄຳມ່ວນ, ມີບັນດາພະນັກງານໄອຍະການປະຊາຊົນ ແລະເຈົ້າໜ້າທີ່ຕຳຫລວດຈາກແຂວງ ບໍລິຄຳໄຊ, ສະຫວັນນະເຂດ ແລະຄຳມ່ວນ.

ໃນວາລະກອງປະຊຸມບັນດາຜູ້ເຂົ້າຮ່ວມໄດ້ຮັບຟັງການບັນຍາຍ ແລະແລກປ່ຽນບົດຮຽນໃນຫົວຂໍ້ທີ່ສຳຄັນຄື: ບົດບາດຂອງໄອຍະການໃນການດໍາເນີນຄະດີຢາເສບຕິດ (ຈັບກຸມຄະດີຢາເສບຕິດ) ການກວດຢຶດຊັບສິນລວມທັງຫລັກການດໍາເນີນຄະດີຂອງຣາຊະອານາຈັກໄທ ຈາກ ທ່ານ ນາງ ພູວິຊະຍາ ເຫລືອງທິຣະກຸນ ໄອຍະການປະຈຳສຳນັກງານໄອຍະການສູງສຸດ ( ສຳນັກງານຄະດີຢາເສບຕິດ ) ແຫ່ງຣາຊະອານາຈັກໄທ ( ຜ່ານທາງໄກ ), ການດຳເນີນຄະດີຢາເສບຕິດຂອງເຈົ້າໜ້າທີ່ຕຳຫລວດສະກັດກັ້ນ ແລະ ຕ້ານຢາເສບຕິດ ສປປ ລາວ ແລະ ການຕິດຕາມກວດກາການດຳເນີນຄະດີຢາເສບຕິດ, ຂັ້ນຕອນການສັ່ງຟ້ອງຂອງອົງການໄອຍະການປະຊາຊົນ. ຈຸດປະສົງໃນການຈັດປະຊຸມຄັ້ງນີ້ເພື່ອແນໃສ່ພັດທະນາຂີດຄວາມສາມາດຂອງພະນັກງານໄອຍາການ ແລະ ເຈົ້າໜ້າທີ່ອົງການສືບສວນ - ສອບສວນ ແລະ ເພື່ອຮັບປະກັນຄຸນນະພາບໃນການເຄື່ອນໄຫວປະຕິບັດໜ້າທີ່ການດຳເນີນຄະດີຢາເສບຕິດໃຫ້ມີແບບແຜນວິທີເຮັດວຽກທີ່ມີວິທະຍາສາດເໝາະກັບຕົວຈິງພ້ອມທັງສ້າງຄວາມເຂົ້າໃຈ ແລະຄວາມເປັນເອກະພາບໃຫ້ແກ່ພາກສ່ວນກ່ຽວຂ້ອງໃນການປະຕິບັດໜ້າທີ່ດຳເນີນຄະດີຢາເສບຕິດ, ການແກ້ໄຂບັນຫາຢາເສບຕິດໃຫ້ເລິກເຊິ່ງດ້ວຍຄວາມໜັກແໜ້ນທາງດ້ານຫລັກການຂອງກົດໝາຍ ແລະ ຮັດກຸມທາງດ້ານຂໍ້ມູນຫລັກຖານ, ຮັບປະກັນໃຫ້ການດຳເນີຄະດີ, ການສັ່ງຟ້ອງຜູ້ຖຶກຫາຂື້ນສານ, ການຍຶດຊັບ, ອາຍັດຊັບທີ່ພົວພັນກັບຄະດີໃຫ້ມີຄວາມໂປ່ງໃສຍຸຕິທຳ ແລະ ຖຶກຕ້ອງຕາມກົດໝາຍ, ພ້ອມທັງຮັບປະກັນໃຫ້ໄດ້ 3 ຫລັກການຂອງການຈັດຕັ້ງປະຕິບັດວາລະແຫ່ງຊາດຄື: ຄວາມເດັດຂາດ, ຄວາມໂປ່ງໃສ ແລະເປັນມືອາຊີບ, ເຮັດໃຫ້ປະຊາຊົນບັນດາເຜົ່າເຊື່ອໜັ້ນຕໍ່ການປະຕິບັດໜ້າທີ່ໃນການດຳເນີນຄະນດີຕາມຂະບວນການຍຸດຕິທຳນັບມື້ນັບຫລາຍຂື້ນ. ກອງປະຊຸມຈະໄດ້ດຳເນີນໄປ 2 ວັນ, ນັບແຕ່ວັນທີ 1–2 ສິງຫາ ຈິ່ງຈະສໍາເລັດເຊິ່ງກອງປະຊຸມໄດ້ຮັບການສະຫນັບສະໜູນໂດຍສະຖານເອກອັກຄະຣາຊະທູດໄທປະຈຳລາວ.

แชร์