ກຽມສ້າງເຂດເສດຖະກິດອຸສາຫະກຳຢູ່ອັດຕະປື

ພິທີເຊັນສັນຍາຮ່ວມມືການສໍາຫຼວດອອກແບບວາງແຜນ ແລະພັດທະນາໂຄງການດ້ານກະສິກຳສະອາດ, ພະລັງງານສະອາດ ແລະ ເຂດເສດຖະກິດອຸດສະຫະກໍາຊື່ງທັງໝົດເປັນໂຄງການຂອງບໍລີສັດດອກຈໍາປາຄໍາຢູ່ແຂວງອັດຕະປືເມື່ອວັນທີ 29 ກໍລະກົດ 2022 ນີ້ທີ່ໂຮງແຮມດອກຈໍາປາແຂວງອັດຕະປື ໄດ້ມີພິທີເຊັນສັນຍາຮ່ວມມື,ກ່ຽວກັບການສໍາຫຼວດອອກແບບ,ວາງແຜນ ແລະ ພັດທະນາໂຄງການດ້ານກະສິກຳສະອາດ,ພະລັງງານສະອາດ ແລະ ເຂດເສດຖະກິດອຸດສະຫະກໍາ ລະຫວ່າງ ບໍລິສັດ ດອກຈໍາປາຄໍາ (DOKCHAMPAKHAM) ສປປ ລາວ ກັບບໍລິສັດ ແວວພາວເວີ ກຣຸບ (Wealth Power Group) ຈາກ ສສ.ຫວຽດນາມ,ໂດຍເປັນກຽດເຂົ້າຮ່ວມມີທ່ານ ເລັດ ໄຊຍະພອນ ເຈົ້າແຂວງອັດຕະປື,ມີທ່ານ ຫວັດສະດີ ຂຸມເພັດຊະວົງ ປະທານບໍລິສັດ ດອກຈໍາປາຄໍາ,ມີທ່ານ ຫງ່ຽນ ວັນກຸ໋ຍງ໋ອກປະທານ ບໍລິສັດ ແວວຟາວເວີກຣູບ ພ້ອມດ້ວຍຄະນະນໍາຂອງແຂວງ, ບັນດາທ່ານເຈົ້າເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ບໍລິສັດ ດອກຈໍາປາຄໍາ ໃນນາມເຈົ້າຂອງໂຄງການທີ່ໄດ້ຕົກລົງນຳໂຄງການຮ່ວມມື ມີ 3 ພາກສ່ວນຄື:1) ໂຄງການ ກະສິກຳສະອາດ ລວມມີເນື້ອທີ່ທັງໝົດ 68,000 ເຮັກຕາ,2) ໂຄງການພະລັງງານສະອາດ ມີກໍາລັງຕິດຕັ້ງ 6,045 ເມັກກາວັດ (ປະກອບມີ:ພະລັງງານແສງຕາເວັນ, ພະລັງງານລົມ, ພະລັງານຄວາມຮ້ອນໃຕ້ພິພົບ ແລະພະລັງງານຈາກຖ່ານອັດແມັດ) ເນື້ອທີ່ມີ 7,651 ເຮັກຕາ ແລະ3) ໂຄງການເຂດເສດຖະກິດ-ອຸດສະຫະກໍາມີເນື້ອທີ່ທັງໝົດ1,100 ເຮັກຕາ (ປະກອບມີ: ເຂດໂຮງງານ 700 ເຮັກຕາ, ເຂດຕົວເມືອງທັນສະໄໝມີ 300 ເຮັກຕາ ແລະ ເຂດສູນຂົນສົ່ງ, ສູນຂາຍສົ່ງສີນຄ້າ ແລະ ສາງສີນຄ້າ ມີ 100 ເຮັກຕາ) ທັງໝົດ ແມ່ນ ເປັນໂຄງການຂອງບໍລິສັດດອກຈໍາປາຄໍາ ນໍາມາຮ່ວມມື ກັບ ບໍລິສັດແວວພາວເວີຈະນຳທືນ,ເຕັກໂນໂລຢີ ທີ່ກ້າວໜ້າ-ທັນສະໄໝ ແລະ ການຕະຫລາດນຳມາຮ່ວມນໍາໃຂເຂົ້າໃນໂຄງການ ໃນນັ້ນ ເຊິ່ງໃນເບື້ອງຕົ້ນແຂວງອັດຕະປື ຈະອະນຸມັດໃຫ້ມີການລົງທຶນກ່ອນໃນເນື້ອທີ່ 500 ເຮັກຕາ, ສ່ວນທີ່ເຫຼືອແມ່ນແຂວງສະໜັບສະໜູນໃຫ້ອະນຸມັດຈາກລັດຖະບານ. ລະບົບການຈັດຕັ້ງປະຕິບັດໂຄງການຈະໄດ້ນໍາເອົາພະນັກງານ,ຊ່ຽວຊານນັກວິທະຍາສາດ, ເຕັກໂນໂລຢີມາຮ່ວມສຶກສາສໍາຫຼວດ ແລະ

ວາງແຜນພັດທະນາເປັນແຕ່ລະໂຄງການໃນ 3 ພາກສ່ວນ ມີ 21 ໂຄງການໂດຍຈະໄດ້ຈັດຕັ້ງປະຕິບັດຕາມຮູບແບບພື້ນຖານຂອງສັນຍາເດີມທີ່ໄດ້ປຶກສາຜ່ານແລ້ວ ,ເຊິ່ງຈະຊັບຊ້ອນພະນັກງານ ແລະ ກໍາມະກອນທີ່ເປັນຄົນລາວເຂົ້າໃນໂຄງການປະມານ 70% ແລະ ຄົນຕ່າງປະເທດ 30% ຕາມກົດໝາຍແຮງງານຂອງລາວ, ໂດຍທາງບໍລິສັດຈະໄດ້ມີການຈັດຝຶກອົບຮົມສີມືແຮງງານ ແລະ ພະນັກງານຂອງຝ່າຍລາວໃຫ້ສາມາດປະຕິບັດວຽກເປັນຄູ່ຮ່ວມມືພັດທະນາໄປດ້ວຍກັນ.ເຊິ່ງຖ້າຫາກໂຄງການດັ່ງກ່າວໄດ້ຮັບການຈັດຕັ້ງປະຕິບັດຈະນໍາຜົນປະໂຫຍດມາໃຫ້ລັດຖະບານພ້ອມທ້ອງຖີ່ນແຂວງ, ເມືອງ, ບ້ານ ແລະ ປະຊາຊົນບ່ອນທີ່ຕັ້ງຂອງໂຄງການ.
ໂອກາດດັ່ງກ່າວ, ບໍລິສັດສອງຝ່າຍພ້ອມກັນລົງນາມເຊັນສັນຍາໂດຍ ທ່ານ ຫວັດສະດີ ຂຸມເພັດຊະວົງ (ບໍລິສັດ ດອກຈໍາປາຄໍາ)ແລະ ທ່ານ ນາງເຈີ໋ນ ທິ ເຮືອງຮ່າ (ບໍລິສັດ ແວວພາວເວີ ກຣຸບ)

ເພື່ອເປັນຫຼັກຖານໃນການຈັດຕັ້ງປະຕິບັດເບື້ອງຕົ້ນໂດຍຊ້ອງໜ້າທ່ານເຈົ້າແຂວງອັດຕະປືພ້ອມດ້ວຍບັນດາທ່ານເຈົ້າເມືອງ ແລະພາກສ່ວນທີ່ກ່ຽວຂ້ອງເຂົ້າຮ່ວມເປັນສັກຂີພິຍານ.

แชร์