ໄດຊັນລາວ ເປີດນຳໃຊ້ເຕົາເຜົາບຳບັດຂີ້ເຫຍື່ອ

  ເພື່ອເປັນການປົກປັກຮັກສາສະພາບແວດລ້ອມພາຍໃນເທສະບານເມືອງປາກຊັນໃຫ້ມີຄວາມສະອາດຈົບງາມ ແລະສະອາດງາມຕາ, ມາໃນວັນທີ 23 ມີນາຜ່ານມານີ້ບໍລິສັດໄດຊັນລາວຈຳກັດ ສາຂາແຂວງບໍລິຄຳໄຊ ໄດ້ເປີດບໍລິການໂຮງເຕົາເຜົາບຳບັດຂີ້ເຫຍື້ອຂະໜາດນ້ອຍຢູ່ເຂດບ້ານໂພນສະອາດ ເມືອງປາກຊັນ, ໃຫ້ກຽດເຂົ້າຮ່ວມໂດຍທ່ານ ກອງແກ້ວ ໄຊສົງຄາມ ເຈົ້າແຂວງບໍລິຄຳໄຊ, ທ່ານ ສົມມາດ ພົນເສນາ ລັດຖະມົນຕີກະຊວງຊັບພະຍາກອນທຳມະຊາດ ແລະສິ່ງແວດລ້ອມ, ທ່ານ ທະເກະຊິ ຫິກິຮາລະ ເອກອັກຄະລາຊະທູດ ແຫ່ງປະເທດຢີ່ປຸ່ນ ປະຈຳລາວ. ພ້ອມດ້ວຍແຂກຖືກເຊີນ ແລະອຳນາດການປົກຄອງບ້ານອ້ອມຂ້າງເຂົ້າຮ່ວມ.

 ທ່ານ ນາງ ສີພອນ ເທບຄຳເຮືອງ ອຳນວຍການ ບໍລິສັດໄດຊັນລາວຈຳກັດ ໄດ້ລາຍງານວ່າ: ບໍລິສັດໄດຊັນລາວໄດ້ ກໍ່ຕັ້ງຂຶ້ນພາຍໃຕ້ຂໍ້ກຳນົດກົດລະບຽບເປີດກວ້າງຂອງລັດຖະບານແຫ່ງ ສປປ ລາວ ເພື່ອຍາດແຍ່ງການລົງທຶນພາກ ເອກະຊົນທັງພາຍໃນ ແລະຕ່າງປະເທດ, ຈາກນັ້ນບໍລິສັດໄດຊັນລາວຈຶ່ງໄດ້ຕົກລົງຍື່ນຄຳຮ້ອງຂໍສ້າງຕັ້ງບໍລິສັດຕາມ ຂັ້ນຕອນລະບຽບກົດໝາຍຂອງ ສປປ ລາວ ທຸກປະການ ໂດຍໄດ້ຮັບໃບອະນຸຍາດສ້າງຕັ້ງບໍລິສັດຈາກພາກສ່ວນກ່ຽວຂ້ອງເຊັ່ນ: ໃບທະບຽນເລກທີ 0892/ຈທວ ລົງວັນທີ 3 ກັນຍາ 2018 ຊຶ່ງ ມີສຳນັກງານໃຫຍ່ຕັ້ງຢູ່ນະຄອນຫຼວງ ວຽງຈັນ, ພ້ອມນີ້ກໍໄດ້ຮັບອະນຸຍາດໃຫ້ສ້າງຕັ້ງສາຂາແຂວງບໍລິຄຳໄຊ ໃບທະ ບຽນເລກທີ 222/ຈທວ ລົງວັນທີ 6 ກັນຍາ 2018 ຊຶ່ງມີສຳນັກງານຕັ້ງຢູ່ ບ້ານສີວິໄລ ເມືອງປາກຊັນ.

 ສຳລັບການເປີດນຳໃຊ້ໂຮງເຕົາເຜົາບຳບັດຂີ້ເຫຍື້ອຂະໜາດນ້ອຍທີ່ສ້າງຕັ້ງຂຶ້ນຢູ່ເມືອງປາກຊັນແຫ່ງນີ້ແມ່ນເປັນແຫ່ງທຳອິດຂອງແຂວງບໍລິຄຳໄຊ ກໍຄືແຫ່ງທຳອິດຂອງ ສປປ ລາວ ໂດຍໄດ້ຮັບອານຸມັດເຫັນດີ-ເຫັນພ້ອມຈາກອຳນາດການປົກຄອງແຂວງ ແລະກະຊວງທີ່ກ່ຽວຂ້ອງ. ໂຮງເຕົາເຜົາດັ່ງກ່າວມີເຄື່ອງຈັກສາມາດທຳການເຜົາໄໝ້ໄດ້ 5-7 ໂຕນຕໍ່ມື້ ສຳລັບເສດຝຸ່ນທີ່ເຫຼືອຈາກການເຜົາໄໝ້ສາມາດນຳໄປໃຊ້ເປັນປະໂຫຍດໄດ້ຕື່ມອີກ ແລະໃນຕໍ່ໜ້າທາງບໍລິສັດຍັງມີແຜນຈະຂະຫຍາຍໂຮງເຕົາເຜົາບຳບັດຂີ້ເຫຍື້ອຂະໜາດກາງ ຫຼື ຂະໜາດໃຫຍ່ທີ່ມີເຄື່ອງຈັກສາມາດບຳບັດ ໄດ້ 300-500 ໂຕນຕໍ່ມື້ຢູ່ແຂວງບໍລິຄຳໄຊຕື່ມອີກ.

ຂ່າວ: ວຽງສະຫວັນ      

แชร์