ລັດຖະມົນຕີກະຊວງ ການຕ່າງປະເທດລາວ-ອົດສະຕຣາລີ ສົນທະນາໂທລະສັບທາງໄກ

ໃນວັນທີ 27 ກໍລະກົດ 2022 ຜ່ານມາ, ຢູ່ກະຊວງການຕ່າງປະເທດ, ທ່ານ ສະເຫຼີມໄຊ ກົມມະສິດ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ໄດ້ສົນທະນາທາງໂທລະສັບກັບທ່ານ ນາງ ເພັນນີ ວອງ (Penny WONG), ລັດຖະມົນຕີກະຊວງການຕ່າງປະເທດ ແຫ່ງ ອົດສະຕຣາລີ ເພື່ອສືບຕໍ່ຮັດແໜ້ນສາຍພົວພັນມິດຕະພາບ ແລະການຮ່ວມມືອັນດີງາມລະຫວ່າງ ສອງປະເທດ ລາວ ແລະ ອົດສະຕຣາລີ.

ໃນໂອກາດດັ່ງກ່າວ, ທ່ານຮອງນາຍົກລັດຖະມົນຕີ,ລັດຖະມົນຕີກະຊວງການຕ່າງປະເທດ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍຕໍ່ ທ່ານ ນາງ ເພັນນີ ວອງ ທີ່ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງເປັນລັດຖະມົນຕີຕ່າງປະເທດ ອົດສະຕຣາລີ ຄົນໃໝ່ ແລະມີຄວາມຍິນດີຈະຮ່ວມເຮັດວຽກກັບຄູ່ຮ່ວມຕຳແໜ່ງຝ່າຍອົດສະຕຣາລີ ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະການຮ່ວມມືອັນດີ ລະຫວ່າງສອງປະເທດ ລາວ-ອົດສະຕຣາລີ ໃຫ້ມີບາດກ້າວອັນໃໝ່. ຂະນະດຽວກັນ, ທ່ານ ນາງ ເພັນນີ ວອງ ກໍໄດ້ສະແດງຄວາມຍິນດີ ຕໍ່ທ່ານ ສະເຫລີມໄຊ ກົມມະສິດ ທີ່ໄດ້ຖືກແຕ່ງຕັ້ງໃຫ້ດໍາລົງຕໍາແໜ່ງເປັນຮອງນາຍົກລັດຖະມົນຕີ ແລະ ລັດຖະມົນຕີກະຊວງການຕ່າງປະເທດ.

ໃນການໂອ້ລົມ, ສອງຝ່າຍໄດ້ຕີລາຄາສູງຕໍ່ສາຍພົວພັນມິດຕະພາບການຮ່ວມມືອັນດີງາມທີ່ມີມາຍາວນານຕະຫລອດໄລຍະເກືອບ 7 ທົດສະວັດ, ນັບແຕ່ສອງປະເທດ ໄດ້ສ້າງຕັ້ງສາຍພົວພັນການທູດນໍາກັນ ໃນວັນທີ 15 ມັງກອນ 1952 ເປັນຕົ້ນມາ, ລາວ-ອົດສະຕຣາລີ ໄດ້ມີການແລກປ່ຽນການຢ້ຽມຢາມຂອງການນໍາຂັ້ນສູງ ແລະ ຂັ້ນຕ່າງໆມາຢ່າງເປັນປົກກະຕິເຊິ່ງເປັນການປະກອບສ່ວນສຳຄັນເຂົ້າໃນການຮັດແໜ້ນສາຍພົວພັນມິດຕະພາບ ແລະການຮ່ວມມືອັນດີ ລະຫວ່າງ ສອງປະເທດ ໃຫ້ນັບມື້ແໜ້ນແຟ້ນຍິ່ງໆຂຶ້ນ; ສອງຝ່າຍໄດ້ຕີລາຄາສູງຕໍ່ຜົນສໍາເລັດຕ່າງໆ ທີ່ຍາດມາໄດ້ໃນໄລຍະຜ່ານມາ, ພິເສດໃນປີນີ້ 2022 ຄົບຮອບ 70 ປີ ແຫ່ງການສ້າງຕັ້ງສາຍພົວພັນການທູດລະຫວ່າງ ລາວ-ອົດສະຕຣາລີ ເຊິ່ງທັງສອງປະເທດຈະໄດ້ສືບຕໍ່ຮ່ວມກັນຈັດກິດຈະກໍາຕ່າງໆເພື່ອສະເຫລີມສະຫລອງວັນດັ່ງກ່າວຢ່າງເປັນຂະບວນການຟົດຟື້ນ ແລະ ມີເນື້ອໃນຄວາມໝາຍຄວາມສຳຄັນ ໂດຍສະເພາະທັງສອງຝ່າຍ ໄດ້ເຫັນດີໃນດ້ານຫລັກການ ໃນການຍົກລະດັບ ການພົວພັນຮ່ວມມືສອງຝ່າຍເປັນ “ຄູ່ຮ່ວມມືຮອບດ້ານ” ເພື່ອສືບຕໍ່ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມື ທີ່ມີມາແຕ່ດົນນານຂອງທັງສອງປະເທດ. ພ້ອມນີ້, ສອງຝ່າຍຍັງໄດ້ແລກປ່ຽນກ່ຽວກັບສະພາບການຢູ່ໃນພາກພື້ນ ແລະສາກົນ ທີ່ສອງຝ່າຍມີຄວາມສົນໃຈ ແລະ ເຫັນດີເປັນເອກະພາບກັນໃນການສືບຕໍ່ຮັດແໜ້ນການພົວພັນ ແລະຮ່ວມມືໃນຂອບເວທີ ພາກພື້ນ ແລະສາກົນ ເປັນຕົ້ນການຮ່ວມມືໃນຂອບອາຊຽນ, ບັນດາອະນຸພາກພື້ນແມ່ນໍ້າຂອງ, ອົງການສະຫະປະຊາຊາດໂດຍສະເພາະໃນຖານະທີ່ ສປປ ລາວ ເປັນປະເທດປະສານງານ ແຫ່ງ ການພົວພັນ ອາຊຽນ-ອົດສະຕຣາລີ ປະຈຳສົກປີ 2021-2024, ທັງ 2 ຝ່າຍ ຈະຮ່ວມມືກັນຢ່າງໃກ້ຊິດເພື່ອຊຸກຍູ້ສົ່ງເສີມການພົວພັນຮ່ວມມື ອາຊຽນ-ອົດສະຕຣາລີ ໃຫ້ກ້າວຂຶ້ນສູ່ລະດັບສູງຍິ່ງໆຂຶ້ນ.

ໃນໂອກາດດຽວກັນ, ທ່ານ ສະເຫຼີມໄຊ ກົມມະສິດ ໄດ້ຕາງໜ້າໃຫ້ລັດຖະບານ ແລະ ປະຊາຊົນລາວ ສະແດງຄວາມຮູ້ບຸນຄຸນ ແລະ ຂອບໃຈມາຍັງລັດຖະບານ ແລະ ປະຊາຊົນອົດສະຕຣາລີ ທີ່ໄດ້ໃຫ້ການສະໜັບສະໜູນ ແລະ ຊ່ວຍເຫລືອ ສປປ ລາວ ຕະຫລອດມາໂດຍສະເພາະການຊ່ວຍເຫລືອເພື່ອການພັດທະນາ (ODA) ໃນຂົງເຂດວຽກງານການສຶກສາ, ການພັດທະນາຊັບພະຍາກອນມະນຸດ, ກະສິກໍາ, ສາທາລະນະສຸກ, ການຄ້າ-ການລົງທຶນ ໂດຍສະເພາະໃນໄລຍະມີການລະບາດຂອງ ພະຍາດໂຄວິດ ລັດຖະບານອົດສະຕາລີ ໄດ້ໃຫ້ການຊ່ວຍເຫລືອ ວັກຊິນ, ການຂົນສົ່ງ ແລະການຊ່ວຍເຫລືອດ້ານເຕັກນິກອື່ນໆ ໃນການປ້ອງກັນ, ຄວບຄຸມ ແລະ ແກ້ໄຂການລະບາດຂອງພະຍາດໂຄວິດ-19 ເຊິ່ງໄດ້ຊ່ວຍເຮັດໃຫ້ການຄວບຄຸມການລະບາດຂອງພະຍາດດັ່ງກ່າວຢູ່ ສປປ ລາວ ໄດ້ດີຂຶ້ນ.

ພ້ອມນີ້, ທ່ານລັດຖະມົນຕີຕ່າງປະເທດ ອົດສະຕຣາລີ ກໍໄດ້ເຊື້ອເຊີນ ທ່ານຮອງນາຍົກລັດຖະມົນຕີ ສະເຫລີມໄຊ ກົມມະສິດ ເດີນທາງຢ້ຽມຢາມຢ່າງເປັນທາງການປະເທດອົດສະຕຣາລີ ໃນເວລາທີ່ເໝາະສົມ.

แชร์