ເປີດນຳໃຊ້ສື່ສິ່ງພິມ ໃນວຽກງານຕ້ານການຄ້າມະນຸດ

ວັນທີ 29 ກໍລະກົດ 2022 ທີ່ນະຄອນຫຼວງວຽງ ກະຊວງຖະແຫຼງຂ່າວ, ວັດທະນະທໍາ ແລະທ່ອງທ່ຽວ (ຖວທ) ຮ່ວມກັບອົງການວິນຣອກສາກົນເປີດນໍາໃຊ້ສື່ສິ່ງພິມໃນວຽກງານຕ້ານການຄ້າມະນຸດໂດຍມີ ທ່ານ ອຸ່ນທວງ ຂາວພັນ ຮອງລັດຖະມົນຕີກະຊວງ ຖວທ, ທ່ານ ໄມໂຄຣອນນິ້ງ ຜູ້ຕາງໜ້າອົງການພັດທະນາສາກົນຂອງປະເທດສະຫະລັດອາເມລິກາ ປະຈໍາລາວ, ມີຄະນະກໍາມະການຕ້ານການຄ້າມະນຸດ, ຜູ້ຕາງໜ້າຈາກອົງການຈັດຕັ້ງສາກົນ ແລະພາກສ່ວນທີ່ກ່ຽວຂ້ອງເຂົ້າຮ່ວມ.

ສື່ສິ່ງພິມໃນວຽກງານຕ້ານການຄ້າມະນຸດແມ່ນເປັນພາຫະນະໜຶ່ງ ແລະເປັນຄູ່ມືໃຫ້ແກ່ບັນດານັກສື່ມວນຊົນໃຊ້ເປັນກະບອກສຽງເພື່ອເຜີຍແຜ່ແນວທາງນະໂຍບາຍຂອງພັກ-ລັດ ຕໍ່ກັບວຽກງານການປ້ອງກັນ ແລະ ຕ້ານການຄ້າມະນຸດໃຫ້ທົ່ວສັງຄົມໄດ້ຮັບຮູ້, ເຂົ້າໃຈເຖິງໄພອັນຕະລາຍຂອງມັນ. ບັນດາສື່ທີ່ນຳໃຊ້ໃນຄັ້ງນີ້ມີ: ກາຕູນເອເນເມຊັ້ນ, ໂປດສເຕີ ແລະປື້ມຄູ່ມືການໂຄສະນາເຊິ່ງທັງໝົດນີ້ແມ່ນມີຄວາມຈຳເປັນອັນຮີບດ່ວນ ທີ່ຈະຕ້ອງໄດ້ສະໜອງຂໍ້ມູນຕໍ່ກັບສັງຄົມໂດຍສະເພາະຕໍ່ກັບຜູ້ທີ່ມີຄວາມສ່ຽງຕົກເປັນເຫຍື່ອການຄ້າມະນຸດ; ໄລຍະຜ່ານມາຫລາຍປະເທດກໍໄດ້ປະເຊີນໜ້າກັບບັນຫາການຄ້າມະນຸດໃນຫລາຍຮູບແບບເປັນຕົ້ນການໝັ້ນໝາຍ ຫຼືການແຕ່ງດອງແອບແຝງ, ການຂູດຮີດແຮງງານ, ການຂູດຮີດທາງເພດ ແລະການບັງຄັບໃຫ້ເປັນໂສເພນີ, ການຄ້າປະເວນີຂອງຜູ້ອື່ນ, ການໃຫ້ຖືພາ, ການເອົາເດັກໄປລ້ຽງ ຫຼືການເອົາເດັກມາເປັນລູກລ້ຽງແອບແຝງ, ການເປັນຂໍທານ, ການລັກພາຕົວ ແລະການເອົາອະໄວຍະວະຕ່າງໆຂອງຮ່າງກາຍໄປຂາຍ.

ທ່ານ ອຸ່ນທວງ ຂາວພັນ ໃຫ້ຮູ້ວ່າ: ເພື່ອສ້າງຂະບວນການ ແລະກິດຈະກຳໃນໂອກາດວັນຕ້ານການຄ້າມະນຸດສາກົນ ປະຈຳປີ 2022 ກໍຄື ວັນທີ 30 ກໍລະກົດ 2022 ນີ້, ສປປ ລາວ ເຮົາໄດ້ໃຫ້ຄວາມສຳຄັນ ແລະໃຫ້ການຮ່ວມມືທີ່ດີຕໍ່ກັບວຽກງານຕ້ານການຄ້າມະນຸດຕະຫລອດມາໂດຍໄດ້ມີການໂຄສະນາ, ເຜີຍແຜ່ ແລະຈັດກິດຈະກຳ ເພື່ອສ້າງຄວາມເຂົ້າໃຈຕໍ່ວຽກງານດັ່ງກ່າວດ້ວຍຫຼາຍຮູບແບບ ແລະພົ້ນເດັ່ນສຸດແມ່ນລັດຖະບານໄດ້ຈັດຕັ້ງປະຕິບັດແຜນງານແຫ່ງຊາດກ່ຽວກັບການສະກັດກັ້ນ ແລະ ຕ້ານການຄ້າມະນຸດ ໄລຍະ III ແຕ່ປີ 2021-2025.

ພັກ-ລັດຖະບານ ຍາມໃດກໍໄດ້ເອົາໃຈໃສ່ຊີ້ນຳຢ່າງໃກ້ສິດຕິດແທດໃນການຈັດຕັ້ງປະຕິບັດວຽກງານນີ້ຢ່າງກວ້າງຂວ້າງໃນຂະແໜງການຕ່າງໆ ໂດຍສະເພາະແມ່ນຂົງເຂດວຽກງານຖະແຫລງຂ່າວ, ວັດທະນະທຳ ແລະທ່ອງທ່ຽວທີ່ເຮັດໜ້າທີ່ເປັນກະບອກສຽງໃນການໂຄສະນາເຜີຍແຜ່ຂໍ້ມູນຂ່າວສານ ແລະ ປູກຈິດສຳນຶກໃນທົ່ວສັງຄົມໃຫ້ມີຄວາມຮັບຮູ້ເຂົ້າໃຈຢ່າງເລິກເຊີ່ງບົນພື້ນຖານປະສານສົມທົບ ແລະຮ່ວມມືກັບທຸກພາກສ່ວນທັງພາກລັດ, ເອກະຊົນ ແລະອົງການຈັດຕັ້ງສາກົນຂັ້ນຕ່າງໆທີ່ກ່ຽວຂ້ອງ ເພື່ອນຳເອົາແນວທາງນະໂຍບາຍຕໍ່ກັບການສະກັດກັ້ນ ແລະຕ້ານການຄ້າມະນຸດຫັນລົງສູ່ຊຸມຊົນທ້ອງຖິ່ນເພື່ອເຮັດໃຫ້ປະຊາຊົນລາວບັນດາເຜົ່າ, ໄວໜຸ່ມ ຍິງ-ຊາຍ ໄດ້ຮັບຮູ້ເຂົ້າໃຈມີສະຕິລະວັງຕົວຕໍ່ກັບກົນອຸບາຍຂອງຂະບວນການຄ້າມະນຸດທັງພາຍໃນ ແລະຕ່າງປະເທດນັບມື້ນັບຫຼາຍຂຶ້ນ.

แชร์