ກອງທັບລາວ-ຈີນ ສໍາເລັດຝຶກຊ້ອມ ການຊ່ວຍເຫຼືອມະນຸດສະທໍາ

ວັນທີ 28 ກໍລະກົດ 2022 ນີ້, ບັ້ນຫັດແອບ, ຝຶກຊ້ອມຊ່ວຍເຫລືອມະນຸດສະທຳ ແລະກິດຈະກໍາບໍລິການທາງການແພດ (ຂະບວນລົດໄຟສັນຕິພາບ 2022) ລະຫວ່າງກອງທັບປະ ຊາຊົນລາວ ກັບ ກອງທັບປົດປ່ອຍປະຊາຊົນຈີນໄດ້ສໍາເລັດລົງດ້ວຍໝາກຜົນອັນຈົບງາມ, ພາຍຫລັງດໍາເນີນມາແຕ່ວັນທີ 19 ກໍລະກົດ 2022. ໃຫ້ກຽດເຂົ້າຮ່ວມ ພິທີປິດບັ້ນຝຶກແອບດັ່ງກ່າວ, ມີທ່ານ ພົນຕີ ວົງຄໍາ ພົມມະກອນ ຮອງລັດຖະມົນຕີກະຊວງປ້ອງກັນປະເທດ, ທ່ານ ພັນເອກພິເສດ ເສິນ ຊຸນມິງ ຮອງຫົວໜ້າເສນາຮັກກົມຮັບປະກັນພະລາທິການຂອງຄະນະກໍາມະການທະຫານສູນກາງແຫ່ງ ສປ ຈີນ, ຫົວໜ້າຄະນະຂະບວນລົດໄຟສັນຕິພາບ 2022 ກອງທັບປົດປ່ອຍປະຊາຊົນຈີນ, ພ້ອມດ້ວຍພາກສ່ວນກ່ຽວຂ້ອງ ແລະພະນັກງານແພດ-ໝໍເຫລົ່າຮົບເສນາຮັກຂອງກອງທັບລາວ-ຈີນເຂົ້າຮ່ວມ.

ໂອກາດດັ່ງກ່າວ, ທ່ານ ພົນຈັດຕະວາ ຄໍາແພງ ພູມມາແກ້ວ ຫົວໜ້າກົມເສນາຮັກກົມໃຫຍ່ພະລາທິການກອງທັບລາຍງານໃຫ້ຮູ້ວ່າ: ຕະຫລອດໄລຍະການຫັດແອບ, ຝຶກຊ້ອມໃນ 10 ວັນທີ່ຜ່ານມາຜູ້ເຂົ້າຮ່ວມຝຶກຊ້ອມໄດ້ແລກປ່ຽນບົດຮຽນ, ປະສົບການໃນການກອບກູ້ ແລະຊ່ວຍເຫລືອຜູ້ທີ່ໄດ້ຮັບຜົນກະທົບຈາກໄພພິບັດທຳມະຊາດ, ຊອກຄົ້ນ-ກອບກູ້ຜູ້ປະສົບໄພຢູ່ເຂດທີ່ເກີດໄພພິບັດຈຳນວນ 30 ກໍລະນີ, ກວດກາ ແລະຄັດແຍກລະດັບຄວາມຮ້າຍແຮງຂອງຜູ້ທີ່ຖືກບາດເຈັບ,ກອບກູ້ ແລະ ຊ່ວຍເຫລືອຄົນເຈັບ ທີ່ມີບັນຫາກ່ຽວກັບລະບົບຫາຍໃຈ ກໍລະນີທີ່ມີການສົງໃສຕິດເຊື້ອພະຍາດໂຄວິດ-19, ຝຶກແອບວີທີແກ້ໄຂ, ປິ່ນປົວ, ການເຄື່ອນຍ້າຍ ແລະ ມອບຮັບຜູ້ຖືກບາດເຈັບຈາກລົດແພດສະໜາມນຳສົ່ງຕໍ່ໄປທີ່ລົດໄຟ (ໂດຍນໍາໃຊ້ລົດໄຟຕົວຈິງເຂົ້າໃນການຝຶກຊ້ອມ), ຮຽນຮູ້ເຕັກນິກການເຊີດຊູ ແລະ ປິ່ນປົວຄົນເຈັບເວລາເຄື່ອນຍ້າຍຢູ່ເທິງລົດໄຟ, ແລກປ່ຽນຄວາມຮູ້ດ້ານວິຊາການເປັນຕົ້ນ, ການຄຸ້ມຄອງອາການເຈັບບາດແຜຈາກການສູ້ຮົບ, ການປ້ອງກັນ ແລະ ປິ່ນປົວບາດແຜຈາກການຝຶກແອບການທະຫານຢູ່ສະໜາມຮົບ, ການນຳໃຊ້ຊ່ອງທາງເຂົ້າໃນການຜ່າຕັດລະບົບປະສາດ, ການປິ່ນປົວພະຍາດໂຄວິດ-19 ທີ່ມີອາການໜັກ ແລະອັນຕະລາຍ, ການສ້າງຕຶກປິ່ນປົວພະຍາດຕິດແປດ ແລະ ການນຳໃຊ້ເຄື່ອງຊ່ວຍເຫລືອຕົນເອງ, ການຊ່ວຍເຫລືອ ແລະ ຮ່ວມມືກໍລະນີເກີດເຫດສຸກເສີນດ້ານສາທາລະນະສຸກ, ການບໍລິການດ້ານການພະຍາບານແພດທີ່ດີເດັ່ນຂອງ ສປ ຈີນ.

ໂອກາດດຽວກັນ, ທ່ານ ພົນຕີ ຄໍາເພັດ ສີຊານົນ ຫົວໜ້າກົມໃຫຍ່ພະລາທິການກອງທັບ, ຫົວໜ້າຄະນະຊີ້ນໍາລວມ ການຫັດແອບ, ຝຶກຊ້ອມໄດ້ມີຄໍາເຫັນວ່າ: ການຫັດແອບ, ຝຶກຊ້ອມຮ່ວມຂອງສອງກອງທັບ ລາວ-ຈີນ ເວົ້າລວມເວົ້າສະເພາະແມ່ນສອງເຫລົ່າຮົບເສນາຮັກກອງທັບປະຊາຊົນລາວ ແລະກອງທັບປົດປ່ອຍປະຊາຊົນຈີນ ໄດ້ສິ້ນສຸດລົງຢ່າງມີຜົນສໍາເລັດຕາມຈຸດປະສົງ-ຄາດໝາຍທີ່ວາງໄວ້ເຖິງວ່າການຝຶກຊ້ອມຄັ້ງນີ້ຈະເປັນຄັ້ງທຳອິດທີ່ນຳເອົາລົດໄຟການແພດຕົວຈິງມາຝຶກ, ໄລຍະເວລາໃນການກະກຽມ-ຝຶກຊ້ອມສັ້ນ, ສະພາບອາກາດຮ້ອນ ແລະຝົນຕົກແຕ່ຄະນະຮັບຜິດຊອບຊີ້ນຳ, ອະນຸກຳມະການ ແລະນັກຝຶກແອບທຸກຄົນຂອງສອງກອງທັບລາວ ແລະ ຈີນ ກໍໄດ້ເອົາໃຈໃສ່ສຸມໝົດສະຕິກຳລັງເຫື່ອແຮງຂອງຕົນຜ່ານຜ່າໂດຍນຳໃຊ້ເຕັກນິກການຫັດແອບໄດ້ຖືກຕ້ອງຕາມຫລັກການສາກົນພ້ອມທັງມີຄວາມປອດໄພ 100%. ໄພທຳມະຊາດແມ່ນເປັນບັນຫາໃຫຍ່ ທີ່ສົ່ງຜົນກະທົບໂດຍກົງຕໍ່ຊີວິດ, ຊັບສິນຕະຫລອດຮອດການພັດທະນາປະເທດຊາດ ເພາະເວລາເກີດໄພພິບັດບັນດາພື້ນຖານໂຄ່ງລ່າງຈະຖືກທຳລາຍ, ຈະມີຜູ້ໄດ້ຮັບບາດເຈັບ ພ້ອມທັງເກີດພະຍາດລະບາດຕ່າງໆຕາມມາ ໂດຍສະເພາະແມ່ນພາຍຸລົມຝົນ, ນໍ້າຖ້ວມ, ດິນເຈື່ອນເຊິ່ງປະເທດເຮົາກໍພົບບັນຫານີ້ເລື້ອຍໆ; ສະນັ້ນການກະກຽມຄວາມພ້ອມຮອບດ້ານເພື່ອກອບກູ້ ແລະຊ່ວຍເຫລືອຜູ້ປະສົບໄພ ແມ່ນໜ້າທີ່ຕົ້ນຕໍຂອງກອງທັບ ແລະການຊ່ວຍເຫລືອທາງດ້ານການແພດກໍເປັນວຽກງານໜຶ່ງທີ່ສໍາຄັນໃນເຫດການດັ່ງກ່າວ.

ການຮ່ວມມືກັນລະຫວ່າງສອງກອງທັບ, ສອງກົມເສນາຮັກລາວ ແລະ ຈີນ ໃນການຝຶກຊ້ອມຄັ້ງນີ້ເປັນການສ້າງຄວາມເຂັ້ມແຂງໃຫ້ແກ່ນັກວິຊາການ-ແພດໝໍ, ເປັນການແລກປ່ຽນບົດຮຽນ-ປະສົບການໃນການປິ່ນປົວ ແລະເປັນຂີດໝາຍອັນສຳຄັນຮັດແໜ້ນຄວາມສາມັກຄີມິດຕະພາບ, ການຊ່ວຍເຫລືອເຊິ່ງກັນ ແລະກັນ ໃນທຸກສະພາບການຂອງສອງກອງທັບໃຫ້ແໜ້ນແຟ້ນຍິ່ງໆຂຶ້ນ.

ໃນໂອກາດຽວກັນນີ້,ຍັງໄດ້ມອບຫລຽນກາມິດຕະພາບໃຫ້ແກ່ຄະນະຊີ້ນຳ ແລະນັກຝຶກຊ້ອມຂອງຝ່າຍຈີນ 149 ທ່ານ,ພ້ອມທັງມອບຮັບໃບຍ້ອງຍໍຂອງກະຊວງປ້ອງກັນປະເທດ, ໃບຍ້ອງຍໍຂອງກົມໃຫຍ່ການເມືອງກອງທັບໃຫ້ຄະນະຊີ້ນໍາ ແລະນັກຝຶກຊ້ອມຂອງຝ່າຍລາວ 274 ທ່ານ ເຊິ່ງໃຫ້ກຽດມອບໂດຍທ່ານ ພົນຕີ ຄໍາເພັດ ສີຊານົນຫົວໜ້າກົມໃຫຍ່ພະລາທິການກອງທັບ.

แชร์