ຫສນຍ ຈັດພິທີ ປາຖະກະຖາວັນສຳຄັນຂອງພັກ-ຂອງຊາດ

ໃນວັນທີ 27 ກໍລະກົດ 2022 ຫ້ອງວ່າການສຳນັກງານາຍົກລັດຖະມົນຕີ (ຫສນຍ) ໄດ້ຈັດພິທີປາຖະກະຖາ ວັນສຳຄັນຂອງພັກ-ຂອງຊາດ ໂດຍເປັນປະທານຂອງທ່ານ ອາລຸນໄຊ ສູນນະລາດ, ກຳມະການສູນກາງພັກ, ເລຂາຄະນະບໍລິຫານງານພັກ, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ; ມີບັນດາສະຫາຍຄະນະພັກ ຫສນຍ, ຄະນະພັກຮາກຖານ, ຄະນະໜ່ວຍພັກພ້ອມດ້ວຍສະມາຊິກພັກ ແລະພະນັກງານລັດຖະກອນທົ່ວ ຫສນຍ ເຂົ້າຮ່ວມ.

ໃນພິທີ, ທ່ານ ອາລຸນໄຊ ສູນນະລາດ ໄດ້ໃຫ້ກຽດປາຖະກະຖາເນື້ອໃນວັນຄ້າຍວັນເກີດຂອງປະທານ ສຸພານຸວົງ ຄົບ ຮອບ 113 ປີ (13 ກໍລະກົດ 1909 ຫາ 13 ກໍລະກົດ 2022) ຊຶ່ງທ່ານ ໄດ້ຍົກໃຫ້ເຫັນມູນເຊື້ອອັນດີງາມ, ແບບແຜນການດຳລົງຊີວິດ, ຜົນງານ ແລະ ການເຄື່ອນໄຫວຂອງປະທານ ສຸພານຸວົງ ຜູ້ນຳທີ່ດີເດັ່ນ ແລະ ເຄົາລົບຮັກ ທີ່ໄດ້ສຸມສະຕິປັນຍາ ແລະເຫື່ອແຮງເພື່ອນໍາພາປະຊາຊົນລາວບັນດາເຜົ່າດໍາເນີນການຕໍ່ສູ້ປົດປ່ອຍຊາດ, ພ້ອມທັງສືບຕໍ່ນຳພາພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ. ພ້ອມນັ້ນ, ສະຫາຍຍັງໄດ້ເຜີຍແຜ່ເນື້ອໃນເອກະສານມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ຊຶ່ງໄດ້ຍົກໃຫ້ເຫັນເນື້ອໃນສຳຄັນເປັນຕົ້ນການປະເມີນສະພາບແວດລ້ອມ ຢູ່ພາກພື້ນ ແລະ ສາກົນ ໃນປະຈຸບັນ ແລະ ຄາດຄະ ເນທ່າອ່ຽງໃນຕໍ່ໜ້າ; ການຕີລາຄາຜົນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ ແລະແຜນເງິນຕາ ຕົ້ນປີ 2022 ຕິດພັນກັບຜົນການຈັດຕັ້ງປະຕິບັດ 2 ວາລະແຫ່ງຊາດ; ການເສີມຂະຫຍາຍທ່າແຮງ, ຄວາມສາມາດບົ່ມຊ້ອນ ໃຫ້ກາຍເປັນຂະແໜງເສດຖະກິດປາຍແຫຼມ; ການຊຸກຍູ້ສົ່ງເສີມຜູ້ປະກອບການທຸລະກິດຂະໜາດນ້ອຍ, ຂະໜາດກາງ ແລະ ຈຸນລະວິສາຫະກິດ ໃຫ້ມີຄວາມເຂັ້ມແຂງ; ການເພີ່ມທະວີພັດທະນາຊັບພະຍາກອນມະນຸດ ໃຫ້ມີຄຸນນະພາບສູງ; ການປັບປຸງລະບົບການຈັດຕັ້ງ, ກົງຈັກ ແລະການເຄື່ອນໄຫວຂອງອົງການບໍລິຫານລັດ ຕາມທິດເຂັ້ມແຂງ ແລະມີປະສິດທິພາບ; ການຄົ້ນຄວ້າທິດສະດີ ແລະສະຫຼຸບພຶດຕິກຳໃຫ້ແກ່ການສ້າງປະຖົມປັດໃຈເພື່ອກ້າວຂຶ້ນສູ່ຈຸດໝາຍສັງຄົມນິຍົມ; ການກະກຽມດຳເນີນກອງປະຊຸມວຽກງານການເມືອງແນວຄິດ ທົ່ວປະເທດ ຄັ້ງທີ V, ກອງປະຊຸມວຽກງານກໍ່ສ້າງຮາກຖານການເມືອງ, ວຽກງານພັດທະນາຊົນນະບົດ, ແກ້ໄຂຄວາມທຸກຍາກ ແລະ ວຽກງານສາມສ້າງ, ກອງປະຊຸມສະຫຼຸບຂະບວນການແຂ່ງຂັນຮັກຊາດ ແລະ ພັດທະນາ; ການກຳນົດວຽກງານຈຸດສຸມໃນການຊີ້ນຳຂອງຕົນໄປຮອດກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 5 ສະໄໝທີ XI.

ໃນໂອກາດດຽວກັນ, ທ່ານ ຄຳລາວັນ ຈັນທະລາວັນ, ຮອງເລຂາຄະນະພັກ ຫສນຍ, ຮອງລັດຖະມົນຕີ, ຮອງຫົວໜ້າ ຫສນຍ ກໍ່ໄດ້ໃຫ້ກຽດເຜີຍແຜ່ເອກະສານ ກ່ຽວກັບວັນສ້າງຕັ້ງສາຍພົວພັນການທູດ ຄົບຮອບ 60 ປີ ແລະວັນເຊັນສົນທິສັນຍາມິດຕະພາບ ແລະ ການຮ່ວມມື ລາວ-ຫວຽດນາມ ຄົບຮອບ 45 ປີ ເຊິ່ງສະຫາຍ ໄດ້ຍົກໃຫ້ເຫັນຄວາມໝາຍ, ຄວາມສຳຄັນຂອງສອງວັນປະຫວັດສາດດັ່ງກ່າວໂດຍສະເພາະການພົວພັນຮ່ວມມືມາແຕ່ຍາວນານຂອງສອງພັກ,ສອງລັດ ແລະ ປະຊາຊົນສອງຊາດ ລາວ-ຫວຽດນາມ ພາຍໃຕ້ການນຳພາຂອງຜູ້ນຳສອງປະເທດທີ່ມີຄວາມກ້າຫານ, ສະຫຼາດສ່ອງໃສເປັນຈິດໜຶ່ງໃຈດຽວກັນພ້ອມກັນຕໍ່ສູ້ເພື່ອປົດປ່ອຍປະເທດຊາດຍາດເອົາເອກະລາດຈາກພວກຈັກກະພັດຜູ້ຮຸກຮານຈົນສາມາດຍາດໄດ້ໄຊຊະນະ ແລະ ສະຖາປະນາປະເທດຂອງຕົນຂຶ້ນ ແລະພ້ອມກັນສືບຕໍ່ເສີມຂະຫຍາຍສາຍພົວພັນ ແລະການຮ່ວມມືອັນດີງາມດັ່ງກ່າວໃນພາລະກິດປົກປັກຮັກສາ ແລະສ້າງສາພັດທະນາປະເທດຊາດຈົນມາເຖິງທຸກວັນນີ້ ແລະ ສືບຕໍ່ໝັ້ນຄົງຂະນົງແກ່ນຕະຫຼອດໄປ.

ໃນຕອນທ້າຍ, ທ່ານ ອາລຸນໄຊ ສູນນະລາດ ໄດ້ມີຄຳເຫັນເນັ້ນໜັກໃຫ້ສະມາຊິກພັກ, ພະນັກງານ-ລັດຖະກອນ ທົ່ວ ຫສນຍ ເອົາໃຈໃສ່ປະຕິບັດໃນຕໍ່ໜ້າຕື່ມບາງດ້ານ ເປັນຕົ້ນ ພ້ອມກັນສືບຕໍ່ຮໍ່າຮຽນເອົາຄຸນສົມບັດສິນທຳປະຕິວັດ ແລະ ແບບແຜນດຳລົງຊີວິດອັນດີເລີດຂອງ ປະທານ ສຸພານຸວົງ ເປັນແວ່ນແຍງ ແລະ ຝຶກຝົນຫຼໍ່ຫຼອມຕົນເອງ ທາງດ້ານມານະຈິດປະຕິວັດໂດຍສະເພາະ 7 ຄຸນລັກສະນະທີ່ດີເດັ່ນ ແລະ 6 ມູນເຊື້ອທີ່ເປັນແບບຢ່າງຂອງເພິ່ນ; ຈັດຕັ້ງຜັນຂະຫຍາຍເນື້ອໃນຈິດໃຈ 4 ເສດຖະກິດປາຍແຫຼມ ແລະ 3 ຂະແໜງການຊ່ວຍໜູນເສດຖະກິດ ທີ່ກຳນົດໃນມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 4 ສະໄໝທີ XI ເຂົ້າໃນຂົງເຂດວຽກງານທີ່ຕົນເອງຮັບຜິດຊອບ ໂດຍສະເພາະ ໃນວຽກງານເສນາທິການ ໃຫ້ແກ່ການນຳ; ພ້ອມກັນສືບຕໍ່ຄົ້ນຄວ້າໃຫ້ເລິກເຊິ່ງ ກ່ຽວກັບຄວາມໝາຍຄວາມສຳຄັນຂອງສອງວັນປະຫວັດສາດສອງຊາດ ລາວ-ຫວຽດນາມ ແລະ ຄົ້ນຄວ້າຜັນຂະຫຍາຍວຽກງານດັ່ງກ່າວ ເຂົ້າເປັນແຜນງານ, ໂຄງການຕາມຄວາມເໝາະສົມໃນການພົວພັນຮ່ວມມືຂອງສອງຫ້ອງວ່າການ ລາວ-ຫວຽດນາມ, ສິ່ງສຳຄັນແມ່ນໃຫ້ມີສະຕິລະວັງຕົວບໍ່ຕົກເຂົ້າໃນເລ່ຫຼ່ຽມຂອງຄົນບໍ່ດີທີ່ຫວັງມ້າງເພທຳລາຍສາຍພົວພັນ ແລະການຮ່ວມມືອັນດີງາມລະຫວ່າງລາວ ແລະ ຫວຽດນາມ; ໃຫ້ບັນດາຄະນະໜ່ວຍພັກ, ຄະນະກົມປັບປຸງກົນໄກການການເຮັດວຽກໃຫ້ມີຄວາມສອດຄ່ອງ ແລະ ໂລ່ງລ່ຽນດີ ໂດຍສະເພາະ ແກ້ໄຂອັນທີ່ຍັງບໍ່ທັນສະດວກ ພ້ອມທັງກຽມພ້ອມຮັບມືກັບບັນຫາເຄັ່ງຮ້ອນທີ່ອາດເກີດຂຶ້ນໃນຕໍ່ໜ້າ; ຈັດຕັ້ງປະຕິບັດວຽກງານຂະບວນການ ຂອງບັນດາອົງການຈັດຕັ້ງມະຫາຊົນ ໃຫ້ກາຍເປັນບ່ອນທົດສອບ ແລະ ກໍ່ສ້າງພະນັກງານ ຢ່າງແທ້ຈິງ ໂດຍສະເພາະວຽກຂະບວນການທາງດ້ານວິຊາສະເພາະກໍ່ຄືການຝຶກອົບຮົມຍົກລະດັບຄວາມຮູ້ຕິດພັນກັບການສຶກສາອົບຮົມແນວຄິດ, ການແລກປ່ຽນຄຳຄິດເຫັນ; ຂະບວນການຫັນພະນັກງານລົງຊ່ວຍຮາກຖານ ແລະ ອື່ນໆ ທັງນີ້ ເພື່ອຮັບປະກັນໃຫ້ແກ່ການເປັນເສນາທິການ, ປະສານງານ ແລະ ບໍລິການຮັບໃຊ້ຂັ້ນເທິງ ແລະປະຊາຊົນມີປະສິດທິພາບ ແລະປະສິດທິຜົນເປັນຢ່າງດີ.

ຂ່າວ;ພາບ: ກົມປະຊາສຳພັນ ສຳນັກງານນາຍົກລັດຖະມົນຕີ

แชร์