ລາວ-ຫວຽດນາມ ສືບຕໍ່ຜັນຂະຫຍາຍການຮ່ວມມືດ້ານເຕັກໂນໂລຊີ ແລະນະວັດຕະກໍາ

ເນື່ອງໃນໂອກາດສະເຫຼີມສະຫຼອງສອງວັນປະຫວັດສາດສຳຄັນຂອງສອງຊາດ ລາວ-ຫວຽດນາມ ຄື: ວັນສ້າງຕັ້ງສາຍພົວພັນທາງການທູດ ຄົບຮອບ 60 ປີ ແລະວັນເຊັນສົນທິສັນຍາມິດຕະພາບ ແລະການຮ່ວມມື ຄົບຮອບ 45 ປີ ແລະໂດຍຕອບສະໜອງຕາມຄຳເຊີນຂອງທ່ານ ບັນດິດ ສຈ. ບໍ່ວຽງຄໍາ ວົງດາລາ, ກຳມະການສູນກາງພັກປະຊາຊົນປະຕິວັດລາວ, ລັດຖະມົນຕີກະຊວງເຕັກໂນໂລຊີ ແລະການສື່ສານ ແຫ່ງ ສາທາລະນະລັດ ປະຊາທິປະໄຕ ປະຊາຊົນລາວ (ສປປ ລາວ), ທ່ານ ບັນດິດ ສຈ. ເຈົາ ວັນ ມິງ, ກຳມະການສູນກາງພັກຄອມມູນິດຫວຽດນາມ, ປະທານສະພາບັນດິດວິທະຍາສາດ ແລະ ເຕັກໂນໂລຊີ ແຫ່ງ ສາທາລະນະລັດ ສັງຄົມນິຍົມ ຫວຽດນາມ (ສສ ຫວຽດນາມ) ພ້ອມດ້ວຍຄະນະໄດ້ເດີນທາງຢ້ຽມຢາມ ແລະເຮັດວຽກຢູ່ ສປປ ລາວ ຢ່າງເປັນທາງການ ໃນລະຫວ່າງວັນທີ 26-30 ກໍລະກົດ 2022 ນີ້.

ໃນຕອນເຊົ້າຂອງວັນທີ 27 ກໍລະກົດ 2022, ທ່ານ ບັນດິດ ສຈ. ບໍ່ວຽງຄໍາ ວົງດາລາ, ລັດຖະມົນຕີ ກະຊວງເຕັກໂນໂລຊີ ແລະການສື່ສານໄດ້ໃຫ້ກຽດຕ້ອນຮັບ ທ່ານ ບັນດິດ ສຈ. ເຈົາ ວັນ ມິງ, ກໍາມະການສູນກາງພັກຄອມມູນິດຫວຽດນາມ, ປະທານສະພາບັນດິດວິທະຍາສາດ ແລະເຕັກໂນໂລຊີ ແຫ່ງ ສສ ຫວຽດນາມ ພ້ອມດ້ວຍຄະນະຢ່າງອົບອຸ່ນຖານອ້າຍນ້ອງເພື່ອນມິດສະຫາຍ. ພ້ອມນັ້ນ, ທັງສອງຝ່າຍຍັງໄດ້ຮ່ວມກອງປະຊຸມພົບປະສອງຝ່າຍລະຫວ່າງ ກະຊວງເຕັກໂນໂລຊີ ແລະການສື່ສານ ສປປ ລາວ ແລະສະພາບັນດິດວິທະຍາສາດ ແລະເຕັກໂນໂລຊີ ແຫ່ງ ສສ ຫວຽດນາມ ໂດຍພາຍໃຕ້ການເປັນປະທານຮ່ວມຂອງທ່ານລັດຖະມົນຕີກະຊວງເຕັກໂນໂລຊີ ແລະ ການສື່ສານ ສປປ ລາວ ແລະ ທ່ານ ປະທານສະພາບັນດິດວິທະຍາສາດ ແລະ ເຕັກໂນໂລຊີ ແຫ່ງ ສສ ຫວຽດນາມ, ຊຶ່ງມີເອກອັກຄະລັດຖະທູດ ສສ ຫວຽດນາມ ປະຈໍາ ສປປ ລາວ,ມີຮອງລັດຖະມົນຕີ,ຄະນະຜູ້ແທນທັງສອງຝ່າຍເຂົ້າຮ່ວມພ້ອມພຽງ. ກອງປະຊຸມພົບປະສອງຝ່າຍໄດ້ດຳເນີນໄປດ້ວຍບັນຍາກາດແຫ່ງຄວາມສາມັກຄີມິດຕະພາບ, ຄວາມເຂົ້າອົກເຂົ້າໃຈ,ຄວາມຈິງໃຈ ແລະຄວາມຮັບຜິດຊອບສູງທັງສະເເດງໃຫ້ເຫັນເຖິງຄວາມມຸ່ງຫວັງຂອງທັງສອງຝ່າຍທີ່ຈະເສີມຂະຫຍາຍສາຍພົວພັນຮ່ວມມືແບບພິເສດ ແລະ ຮອບດ້ານທີ່ເປັນມູນເຊື້ອເພື່ອຜົນປະໂຫຍດຂອງປະຊາຊົນສອງຊາດ ລາວ-ຫວຽດນາມ ເວົ້າລວມກໍຄືການຮ່ວມມືຊຸກຍູ້ຊ່ວຍເຫຼືອ ແລະສະໜັບສະໜູນເຊິ່ງກັນ ແລະກັນເພື່ອພັດທະນາເຕັກໂນໂລຊີ ແລະນະວັດຕະກໍາ ຂອງສອງປະເທດໃຫ້ກ້າວໜ້າຢ່າງບໍ່ຢຸດຢັ້ງ.

ພາຍຫຼັງສໍາເລັດກອງປະຊຸມ, ທັງສອງຝ່າຍຍັງໄດ້ຮ່ວມກັນລົງນາມເຊັນສັນຍາຮ່ວມມືວ່າດ້ວຍເຕັກໂນໂລຊີ ແລະນະວັດຕະກໍາເພື່ອຜັນຂະຫຍາຍການຮ່ວມມື, ແລກປ່ຽນປະສົບການ ແລະ ການຊ່ວຍເຫຼືອເຊິ່ງກັນ ແລະກັນ ບົນຈິດໃຈຄວາມສາມັກຄີພິເສດ, ຮ່ວມມືຮອບດ້ານ, ມິດຕະພາບ, ມິດສະຫາຍແບບອ້າຍນ້ອງເຂົ້າໃຈເຊິ່ງກັນ ແລະ ກັນ ແລະຕ່າງຝ່າຍຕ່າງມີຜົນປະໂຫຍດ.ໃນນັ້ນ, ສອງຝ່າຍຕົກລົງເປັນເອກະພາບໃນການຮ່ວມມືຫຼາຍກິດຈະກໍາ ຄື: 1) ສອງຝ່າຍເຫັນດີຕົກລົງແລກປ່ຽນຄະນະຜູ້ແທນຂັ້ນສູງ ແລະ ຂັ້ນກົມ ຢ່າງໜ້ອຍປີລະຄັ້ງ ໂດຍພັດປ່ຽນກັນເປັນເຈົ້າພາບ; 2) ສະພາບັນດິດວິທະຍາສາດ ແລະ ເຕັກໂນໂລຊີ ສສ ຫວຽດນາມ ຍິນດີໃຫ້ການຊ່ວຍເຫຼືອ ກະຊວງເຕັກໂນໂລຊີ ແລະ ການສື່ສານ ໃນການພັດທະນາຊັບພະຍາກອນມະນຸດ ພາຍໃຕ້ບັນດາຮູບແບບການຝຶກອົບຮົມ (ໄລຍະສັ້ນ ແລະ ໄລຍະຍາວ), ຈັດກອງປະຊຸມ, ການສໍາມະນາ ແລະກອງປະຊຸມວິຊາການ; 3) ຮ່ວມມືສ້າງ ແລະຈັດຕັ້ງປະຕິບັດບັນດາໂຄງການຄົ້ນຄວ້າກ່ຽວກັບເຕັກໂນໂລຊີອັດສະລິຍະ ເຊັ່ນ: ເຕັກໂນໂລຊີກຸ່ມຂໍ້ມູນຜູກພັນ (Blockchain), ກຸ່ມຂໍ້ມູນຂະໜາດໃຫຍ່ (Big Data), ການປະມວນຜົນຜ່ານລະບົບຄລາວ (Cloud Computing), ປັນຍາປະດິດ (AI) ແລະ ອິນເຕີເນັດສັບພະສິ່ງ (IoT); 4) ແລກປ່ຽນຂໍ້ມູນ,ສິ່ງພິມ ແລະ ບັນດາເອກະສານຜົນການຄົ້ນຄວ້າເຕັກໂນໂລຊີ ແລະ ນະວັດຕະກໍາ; 5) ແລກປ່ຽນຊ່ຽວຊານ ແລະ ນັກຄົ້ນຄວ້າ; 6) ຮ່ວມກັນສ້າງບົດສະເໜີໂຄງການ ສະເໜີເຖິງລັດຖະບານສອງປະເທດກ່ຽວກັບການຮ່ວມມືກໍ່ສ້າງສູນລະດັບຊາດ ເພື່ອເກັບກຳບໍລິຫານຂໍ້ມູນ ແລະ ປະມວນຜົນຜ່ານລະບົບຄລາວ (Cloud computing), ສູນເກັບຮັກສາຂໍ້ມູນ ແລະ ເເຈ້ງເຕືອນແຜ່ນດິນໄຫວຂອງ ສປປ ລາວ; 7)ຮ່ວມກັນສ້າງບົດສະເໜີໂຄງການສະເໜີເຖິງລັດຖະບານສອງປະເທດກ່ຽວກັບການຮ່ວມມືກໍ່ສ້າງສູນຮຽນຮູ້ລະດັບຊາດດ້ານເຕັກໂນໂລຊີ ແລະ ນະວັດຕະກໍາ, ສູນບົ່ມເພາະເຕັກໂນໂລຊີ ແລະນະວັດຕະກໍາ; 8) ຮ່ວມມືສ້າງສູນຝຶກອົບຮົມ ແລະຖ່າຍທອດເຕັກໂນໂລຊີ ລາວ-ຫວຽດນາມ (Laos-Vietnam Training and Technology Transfer Center); 9)ຮ່ວມມືຈັດເວທີສົ່ງເສີມການຖ່າຍທອດເຕັກໂນໂລຊີ ລາວ-ຫວຽດນາມ (Laos-Vietnam Tech Connect Forum) ທຸກໆປີ ແລະບັນດາຂົງເຂດຮ່ວມມືອື່ນໆທີ່ສອງຝ່າຍມີຄວາມສົນໃຈ.

ຂ່າວ: ບຸນນິກ ມະນີ

แชร์