ສຳເລັດຝຶກອົບຮົມ ທັກສະການເພີ່ມລາຍຮັບທາງອອນລາຍ ສື່ມວນຊົນລາວ

ພາຍຫຼັງເປີດຝຶກອົກຮົມໃນລະຫວ່າງວັນທີ 24-26 ກໍລະກົດ 2022 ທາງສະມາຄົມນັກຂ່າວແຫ່ງ ສປປ ລາວ ຮ່ວມກັບສະມາຄົມນັກຂ່າວນັກໜັງສືພິມແຫ່ງປະເທດໄທກໍຈັດພິທີ່ມອບໃບຢັງຢືນໃຫ້ນັກສຳມະນາກອນໂດຍການເປັນປະທານຂອງທ່ານ ສະຫວັນຄອນ ຣາຊມຸນຕຣີ, ປະທານສະມາຄົມນັກຂ່າວແຫ່ງ ສປປ ລາວ, ທ່ານ ຊະວະຣົງ ລິມປັດທະມະປານີ ທີ່ປຶກສາສະມາຄົມນັກຂ່າວ, ນັກໜັງສືພິມແຫ່ງປະເທດໄທ ແລະມີນັກສໍາມະນາກອນເຂົ້າຮ່ວມຢ່າງພ້ອມພຽງ.

ໂອກາດນີ້, ທ່ານ ສະຫວັນຄອນ ຣາຊມຸນຕຣີ ກ່າວເປີດງານຄັ້ງນີ້ວ່າ: ໃນນາມຕາງໜ້າສະມາຄົມນັກຂ່າວແຫ່ງ ສປປ ລາວ ຮູ້ສຶກເປັນກຽດຢ່າງສູງທີ່ໄດ້ເຂົ້າຮ່ວມພິທີເປີດຊຸດຝຶກອົບຮົມໃນຫົວຂໍ້: “ການນໍາພາເຮັດຕົວຈິງເພື່ອພັດທະນາທັກສະການສ້າງລາຍຮັບຈາກສື່ອອນລາຍໃຫ້ອົງການສື່ມວນຊົນລາວ” ປະຈໍາປີ 2022 ຊຶ່ງຖືວ່າເປັນກິດຈະກໍາໜຶ່ງທີ່ມີຄວາມໝາຍສໍາຄັນຍິ່ງໃນການພັດທະນາຖັນແຖວສື່ມວນຊົນລາວໃຫ້ກ້າວໜ້າອີກຂັ້ນໜຶ່ງໃນໂອກາດນີ້,ຂ້າພະເຈົ້າຂໍສະແດງຄວາມຍ້ອງຍໍຊົມເຊີຍ ແລະຄວາມຂອບໃຈອັນລົ້ນເຫລືອມາຍັງສະມາຄົມນັກຂ່າວນັກໜັງສືພິມແຫ່ງປະເທດໄທ ແລະສະມາຄົມຜູ້ສະໜອງຂ່າວອອນລາຍແຫ່ງປະເທດໄທທີ່ໄດ້ໃຫ້ການສະໜັບສະໜູນ ແລະຊ່ວຍເຫລືອຖ່າຍທອດບົດຮຽນອັນລໍ້າຄ່າໃຫ້ແກ່ຖັນແຖວສື່ມວນຊົນລາວໃນຄັ້ງນີ້.

ທ່ານ ຊະວະຣົງ ລິມປັດທະມະປານີ ທີ່ປຶກສາສະມາຄົມນັກຂ່າວ, ນັກໜັງສືພິມແຫ່ງປະເທດໄທ ກ່າວວ່າ:ການຝຶກອົບຮົມພາຍໃຕ້ຫົວຂໍ້: “ການນໍາພາເຮັດຕົວຈິງເພື່ອພັດທະນາທັກສະການສ້າງລາຍຮັບຈາກສື່ອອນລາຍໃຫ້ອົງການສື່ມວນຊົນລາວ”ໃນຄັ້ງນີ້ເປັນນິມິດໝາຍອັນດີທີ່ສອດຄ່ອງກັບການປ່ຽນແປງໃໝ່ດ້ານສື່ມວນຊົນໂດຍຈະສ້າງເງື່ອນໄຂສະດວກຊ່ວຍໃຫ້ນັກຝຶກອົບຮົມໄດ້ພ້ອມກັນຮຽນຮູ້ ແລະຮັບເອົາຂໍ້ມູນໃໝ່ໆຈາກສື່ໃນຍຸກດີຈິຕອນ; ພ້ອມນັ້ນ, ກໍ່ຍັງຈະໄດ້ຮັບຮູ້ຄວາມສໍາຄັນ ແລະຄວາມແຕກຕ່າງລະຫວ່າງຮູບແບບຂອງສື່; ການຫາລາຍໄດ້ຜ່ານຮູບແບບຂອງສື່ຕ່າງໆ; ຮູບແບບການຫາລາຍໄດ້ ແລະການວິເຄາະຂໍ້ມູນ; ການຜະລິດເນື້ອໃນຂ່າວໃຫ້ມີສີສັນໃນຍຸກດີຈິຕອນການຊອກຫາລູກຄ້າຢູ່ໃນບັນດາສື່ດີຈິຕອນ ແລະການເຮັດທຸລະກິດແບບຊອກຫາສະຖິຕິລູກຄ້າ.

ນອກນັ້ນ, ບັນດາສຳມະນາກອນໄດ້ຝຶກຕົວຈິງໃນການສ້າງແຜນທຸລະກິດຕົວແບບທີ່ເນັ້ນໃສ່ປັດໄຈຍຸດທະສາດຫລັກທັງໝົດ,ໂດຍໃນນີ້ລວມທັງສະຖິຕິລູກຄ້າ,ລະບົບການເຮັດວຽກ,ລາຍຮັບລາຍຈ່າຍ-ກິດຈະກໍາຕ່າງໆຂອງບໍລິສັດ ແລະກໍ່ຈະມີການນໍາສະເໜີແຜນທຸລະກິດ ແລະແຜນການຫາລາຍໄດ້ຊຶ່ງບົດຮຽນຕ່າງໆທີ່ກ່າວມານີ້ຈະກາຍເປັນພື້ນຖານໃນການຊອກຫາ ຫລືສ້າງແຫລ່ງລາຍຮັບເຂົ້າສູ່ສໍານັກຂ່າວຂອງຕົນ.

ຂ່າວ: ບຸນນິກ ມະນີ

แชร์