ລາວ ຍື່ນສານຕາຕັ້ງຕໍ່ ປະທານາທິບໍດີ ຝຣັ່ງ

ທ່ານ ຄຳອິນ ຄິດຈະເດດ ໄດ້ຍື່ນສານຕາຕັ້ງ ຕໍ່ ທ່ານ ແອມມານູຍແອນ ມາຄຣົງ (H.E. Emmanuel MACRON) ປະທານາທິບໍດີ ແຫ່ງ ສາທາລະນະລັດ ຝຣັ່ງ ເພື່ອເປັນເອກອັກຄະລັດຖະທູດວິສາມັນຜູ້ມີອຳນາດເຕັມ ແຫ່ງ ສປປລາວ ປະຈຳຝຣັ່ງ ໃນ​ວັນ​ທີ 22 ກໍ​ລະ​ກົດ 2022 ທີ່​ທຳ​ນຽບ​ປະ​ທາ​ນາ​ທິ​ບໍ​ດີ​ຝ​ຣັ່ງ.

ໃນໂອກາດ​ນີ້, ທ່ານທູດລາວໄດ້ນຳເອົາຄວາມຢ້ຽມຢາມຖາມຂ່າວອັນອົບອຸ່ນ, ຄວາມຮັກແພງ ແລະພອນໄຊອັນປະເສີດເພື່ອສັນຕິພາບ, ມິດຕະພາບ, ຄວາມສົມບູນພູນສຸກ, ການພົວພັນຮ່ວມມືທີ່ດີຂອງທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປ ລາວ ຝາກເຖິງ ທ່ານປະທານປະເທດ ແຫ່ງ ສາທາລະນະລັດຝຣັ່ງ, ພ້ອມທັງ ຜ່ານທ່ານໄປຍັງລັດຖະບານ ແລະປະຊາຊົນຝຣັ່ງທຸກທົ່ວໜ້າ.

ທ່ານທູດລາວ ໄດ້ສະແດງຄວາມດີໃຈທີ່ໄດ້ຖືກແຕ່ງເປັນເອກອັກຄະລັດຖະທູດແຫ່ງ ສປປ ລາວ ປະຈຳ ຝຣັ່ງ ແລະໄດ້ໃຫ້ຄຳໝັ້ນສັນຍາວ່າໃນໄລຍະທີ່ດຳລົງຕຳແໜ່ງ, ຈະເຮັດສຸດຄວາມສາມາດໃນການເພີ້ມທະວີການສົ່ງເສີມສາຍ​ພົວ​ພັນ, ການຮ່ວມມື​ລະ​ຫວ່າງ​ ລາວ-ຝ​ຣັ່ງ ທີ່​ມີ​ມາແຕ່ດົນນານ​ແລ້ວ​ນັ້ນໃຫ້ດີຂຶ້ນ ແລະໄດ້ສະແດງຄວາມຂອບໃຈຕໍ່ ທ່ານປະທານາທິບໍດີ,ລັດຖະບານ ແລະປະຊາຊົນຝຣັ່ງທີ່ໄດ້ໃຫ້ການສະໜັບສະໜູນຊ່ວຍເຫລືອທາງດ້ານການພັດທະນາເສດຖະກິດ-ສັງຄົມຂອງ ສປປ ລາວ ໃນໄລຍະຜ່ານມາ ແລະຫວັງວ່າຈະໄດ້ຮັບການສືບຕໍ່ຮ່ວມມືຢ່າງດີໃນຕໍ່ໜ້າ.

ທ່ານ ປະທານາທິບໍດີ ມາຄຣົງ ໄດ້ສະແດງຄວາມຊົມເຊີຍຕໍ່​ທ່ານ ທູດລາວຄົນໃໝ່ ແລະໄດ້ຝາກຄວາມຢື້ຢາມຖາມຂ່າວ, ຄວາມຮັກແພງ, ພອນໄຊອັນປະເສີດ ແລະ ມິດຕະພາບການພົວພັນທີ່ດີມາມາຍັງທ່ານ ທອງລຸນ ສີສຸລິດ, ປະທານປະເທດ ແຫ່ງ ສປປລາວ, ລັດຖະບານ ແລະປະຊາຊາຊົນລາວທຸກທົ່ວໜ້າ.

ສາທາລະນະລັດ ປະຊາທິປະໄຕ ປະຊາຊົນລາວ ແລະສາທາລະນະລັດ ຝຣັ່ງ ໄດ້ສ້າງສາຍພົວພັນການທູດນຳກັນໃນວັນທີ 22 ຕຸລາ 1953.

ຂ່າວ : ກະ​ຊວງ​ຕ່າງ​ປະ​ເທດ

 

แชร์