ອຸດົມໄຊ ໄຂກອງປະຊຸມອົງການປົກຄອງແຂວງ ເປີດກ້ວາງ ຄັ້ງທີ I

ກອງປະຊຸມອົງການປົກຄອງ ແຂວງອຸດົມໄຊ ເປີດກ້ວາງ ຄັ້ງທີ I ປີ 2022 ໄຂຂຶ້ນຢ່າງເປັນທາງການ ໃນວັນທີ 27-28 ກໍລະກົດ 2022 ໂດຍການເປັນປະທານຂອງທ່ານ ບຸນຄົງ ຫລ້າຈຽມພອນ ເຈົ້າແຂວງອຸດົມໄຊ, ມີຄະນະສະພາປະຊາຊົນແຂວງ, ຄະນະບໍລິຫານງານພັກແຂວງ, ຫົວໜ້າພະແນກ, ສອງກອງບັນຊາການ ທະຫານ-ຕໍາຫລວດ ແລະພາກສ່ວນກ່ຽວຂ້ອງເຂົ້າຮ່ວມ.

ກອງປະຊຸມໄດ້ຮັບຟັງບົດລາຍງານຫຍໍ້ຕີລາຄາການຊີ້ນຳ-ນຳພາ ການເຄື່ອນໄຫວຈັດຕັ້ງປະຕິບັດວຽກງານຂອງອົງການປົກຄອງແຂວງ ປະຈຳ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດສອງວາລະແຫ່ງຊາດ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022; ຮັບຟັງບົດລາຍງານກ່ຽວກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂບັນຫາຢາເສບຕິດ; ບົດລາຍງານຫຍໍ້ຕີລາຄາການຈັດຕັ້ງປະຕິບັດວຽກງານຄຸມຄອງປ່າໄມ້ທຸກປະເພດພາຍໃນແຂວງ ໄລຍະຜ່ານມາ ແລະ ທິດທາງແຜນການ; ມາດຕະການຄຸ້ມຄອງ, ສະກັດກັ້ນການບຸກລຸກຖາງປ່າໃນຕໍ່ໜ້າ; ບົດລາຍງານການຄຸ້ມຄອງແກ້ໄຂບັນຫາຂໍ້ຂັດແຍ່ງທີ່ດິນແຕ່ລະປະເພດ (ການອອກໃບນຳໃຊ້ທີດິນ, ການຄຸ້ມຄອງ ແລະການແກ້ໄຂຂໍ້ຂັດແຍ່ງກ່ຽວກັບທີ່ດິນ) ໃນໄລຍະຜ່ານມາ ແລະ ທິດທາງແຜນການ; ລາຍງານຕີລາຄາການຈັດຕັ້ງປະຕິບັດການພັດທະນາ ແລະ ຄຸ້ມຄອງການບໍລິການໂຮງແຮມ, ເຮືອນພັກ, ຮ້ານອາຫານ, ຮ້ານກິນດື່ມ, ຄາຣາໂອເກະ ແລະ ການທ່ອງທ່ຽວໃນໄລຍະຜ່ານມາ ແລະ ທິດທາງແຜນການ; ມາດຕະການແກ້ໄຂ, ຂໍ້ຕົກລົງ ວ່າດ້ວຍການຄຸ້ມຄອງການຈັດງານປະເພນີຕ່າງໆຢູ່ແຂວງອຸດົມໄຊ, ຜ່ານຂໍ້ຕົກລົງ ວ່າດ້ວຍການຈັດຕັ້ງຜັນຂະຫຍາຍ ລັດຖະບັນຍັດປະທານປະເທດວ່າດ້ວຍຄ່າທຳນຽມ ແລະ ຄ່າບໍລິການ; ຂໍ້ຕົກລົງ ວ່າດ້ວຍການປະເມີນລາຄາທີ່ດິນທົ່ວແຂວງອຸດົມໄຊ ສະບັບປັບປຸງ, ຂໍ້ຕົກລົງ ວ່າດ້ວຍການຄຸມຄອງຢາປາບສັດຕູພືດ, ຂໍ້ຕົກລົງວ່າດ້ວຍການຫັນເປັນທັນສະໄໝລະບົບບໍລິຫານ ແລະ ບໍລິການລັດແບບດີຈິຕອນ, ຂໍ້ຕົກລົງວ່າດ້ວຍການປະສານງານລະຫວ່າງ ພະແນກການ, ອົງການລັດທຽບເທົ່າພະແນກຂັ້ນແຂວງ-ເມືອງ ກັບຫ້ອງວ່າການແຂວງ, ຂໍ້ຕົກລົງ ວ່າດ້ວຍຂໍ້ຫ້າມຂອງພະນັກງານ-ລັດຖະກອນ ຢູ່ແຂວງອຸດົມໄຊ, ຮັບຟັງບົດລາຍງານ ກ່ຽວກັບການຄຸ້ມຄອງສິ່ງປຸກສ້າງພາຍໃນເທດສະບານ ແຂວງອຸດົມໄຊ, ພິຈາລະນາຮັບຮອງ ກ່ຽວກັບປ້າຍ, ຊື່ປ້າຍ ແລະ ຮູບປັ້ນຈຳລອງ 12 ຊົນເຜົ່າ ຢູ່ສວນສາທາລະນະ 2 ຈຸດ ພາຍໃນເທສະບານເມືອງໄຊ.

ພ້ອມນີ້, ກອງປະຊຸມຍັງໄດ້ເປີດກວ້າງໃຫ້ຜູ້ແທນໄດ້ປະກອບຄຳຄິດເຫັນເຂົ້າໃນແຕ່ລະຂົງເຂດວຽກງານ ແລະຂໍ້ຕົກລົງຕ່າງໆ, ພ້ອມກັນຍົກສູງຄວາມຮັບຜິດຊອບຂອງຕົນໃນການປະກອບຄຳຄິດຄຳເຫັນ, ຕີລາຄາລົງເລິກບັນຫາໃຫ້ລະອຽດເພື່ອໃຫ້ເຫັນໄດ້ດ້ານດີ-ຜົນສໍາເລັດ, ດ້ານອ່ອນ-ຂໍ້ຄົງຄ້າງ, ຄວາມຮັບຜິດຊອບຂອງແຕ່ລະພາກສ່ວນລວມທັງທິດທາງແກ້ໄຂ, ລະບອບແບບແຜນເຮັດວຽກ ແລະກຳນົດວຽກງານຈຸດສຸມຂອງແຂວງໃນຕໍ່ໜ້າເພື່ອຮັບປະກັນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງ ໃນ 6 ເດືອນທ້າຍປີ 2022 ໃຫ້ໄດ້ຮັບຜົນສໍາເລັດຕາມລະດັບຄາດໝາຍທີ່ວາງໄວ້.

ຂ່າວ: ແສງອາທິດ

แชร์