ສະພາປະຊາຊົນແຂວງຫົວພັນ ດຳເນີນກອງປະຊຸມສະໄໝສາມັນເທື່ອທີ 3

ກອງປະຊຸມສະໄຫມສາມັນ ເທື່ອທີ 3 ຂອງສະພາປະຊາຊົນ ແຂວງຫົວພັນ ຊຸດທີ II ໄຂຂຶ້ນຢ່າງເປັນທາງການ ໃນວັນທີ 27 ກໍລະກົດ 2022 ພາຍໃຕ້ການເປັນປະທານຂອງ ທ່ານ ນາງ ອຳໄພວອນ ລ້ອມບຸນແພງ ກຳມະການສຳຮອງສູນກາງພັກ, ຮອງເລຂາພັກແຂວງ, ປະທານສະພາປະຊາຊົນແຂວງຫົວພັນ, ມີບັນດາທ່ານການນໍາ, ຜູ້ຕາງໜ້າອົງການຈັດຕັ້ງພັກ-ລັດ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ, ສະມາຊິກສະພາແຫ່ງຊາດ ປະຈໍາເຂດເລືອກຕັ້ງທີ 8 ແຂວງຫົວພັນ ແລະສະມາຊິກສະພາປະຊາຊົນ ແຂວງຫົວພັນ ຊຸດທີ II ໃນນາມ ທີ່ເປັນຕົວແທນແຫ່ງສິດ ແລະ ຜົນປະໂຫຍດຂອງປະຊາຊົນບັນດາເຜົ່າໃນຂອບເຂດທົ່ວແຂວງຫົວພັນ ເຂົ້າຮ່ວມ.

ກອງປະຊຸມຄັ້ງນີ້, ຈະໄດ້ຮັບຟັງການລາຍງານ ແລະພິຈາລະນາຮັບຮອງເອົາບັນຫາສໍາຄັນພື້ນຖານຂອງແຂວງຄື: ຮັບຟັງການລາຍງານຂອງເຈົ້າແຂວງກ່ຽວກັບວຽກງານພົ້ນເດັ່ນໃນການຈັດຕັ້ງແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ 6 ເດືອນຕົ້ນປີ ແລະທິດທາງວຽກງານຈຸດສຸມ 6 ເດືອນທ້າຍປີ 2022 ຂອງແຂວງຫົວພັນ; ລາຍງານການຈັດຕັ້ງປະຕິບັດວຽກງານ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2022 ເປັນຕົ້ນ ແຜນພັດທະນາເສດຖະກິດ-ສັງຄົມ, ລາຍງານ ກ່ຽວກັບການຈັດຕັ້ງປະຕິບັດແຜນງົບປະມານແຫ່ງລັດ; ລາຍງານການຈັດຕັ້ງປະ ຕິບັດ 2 ວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ຢູ່ແຂວງຫົວພັນ; ລາຍງານການຄຸ້ມຄອງການສໍາຫລວດ, ຂຸດຄົ້ນ ແລະຂົນສົ່ງແຮ່ທາດຢູ່ແຂວງຫົວພັນ; ລາຍງານການຈັດຕັ້ງປະຕິບັດການຄຸ້ມຄອງການສົ່ງເສີມທຸລະກິດຂະຫນາດນ້ອຍ ແລະ ກາງ(SME) ຢູ່ແຂວງຫົວພັນ; ພິຈາລະນາ ແລະ ຮັບຮອງເອົາຮ່າງຂໍ້ຕົກລົງຂອງທ່ານເຈົ້າແຂວງວ່າດ້ວຍການປະເມີນລາຄາທີ່ດິນຢູ່ແຂວງຫົວພັນແລະຮ່າງຂໍ້ຕົກລົງຂອງເຈົ້າແຂວງວ່າດ້ວຍນະໂຍບາຍສົ່ງເສີມການລົງທຶນສະເພາະກິດຈະການການປູກ-ການລ້ຽງເປັນສິນຄ້າຢູ່ແຂວງຫົວພັນ;ລາຍງານການຜັນຂະຫຍາຍວາລະແຫ່ງຊາດວ່າດ້ວຍການແກ້ໄຂບັນຫາຢາເສບຕິດຕິດພັນກັບການຕິດຕາມກວດກາການຈັດຕັ້ງປະຕິບັດການນໍາໃຊ້ 7 ມາດຕະການສະກັດກັ້ນຂອງອົງການໄອຍະການປະຊາຊົນແຂວງ; ລາຍງານການສ້າງຜູ້ພິພາກສາທີ່ດີ ແລະເກັ່ງໃນຂົງເຂດສານປະຊາຊົນແຂວງ ແລະ ສານປະຊາຊົນເຂດ; ພິຈາລະນາ ແລະຮັບຮອງເອົາບົດລາຍງານ ການເຄື່ອນໄຫວວຽກງານ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022 ຂອງສະພາປະຊາຊົນແຂວງຫົວພັນ ແລະຮັບຟັງການຊັກຖາມຂອງສະມາຊິກສະພາປະຊາຊົນແຂວງ ແລະການອະທິບາຍຊີ້ແຈງຕອບຄໍາຊັກຖາມ ຈາກພາກສ່ວນກ່ຽວຂ້ອງຈໍານວນໜຶ່ງ.

ໂອກາດນີ້, ທ່ານ ນາງ ອຳໄພວອນ ລ້ອມບຸນແພງ ໄດ້ຮຽກຮ້ອງໃຫ້ສະມາຊິກສະພາປະຊາຊົນແຂວງ ຊຸດທີ II ນໍາໃຊ້ສິດປະຊາທິປະໄຕ ແລະຍົກສູງຄວາມຮັບຜິດຊອບການເມືອງ, ສຸມສະຕິປັນຍາ, ຄວາມຮູ້, ຄວາມສາມາດຂອງຕົນເຂົ້າໃນການຄົ້ນຄວ້າ, ພິຈາລະນາ ແລະປະກອບຄໍາຄິດ, ຄໍາເຫັນ ຢ່າງເລິກເຊິ່ງ ແລະ ມີຈຸດສຸມເຂົ້າໃສ່ແຕ່ລະນື້ອໃນທີ່ນໍາມາພິຈາລະນາໃນຄັ້ງນີ້ໃຫ້ຮັບປະກັນຄວາມຖືກຕ້ອງ, ສອດຄ່ອງກັບແນວທາງ, ແຜນນະໂຍບາຍຂອງພັກ, ລັດຖະທໍາມະນູນ ແລະກົດໝາຍກໍຄືສະ ພາບຄວາມເປັນຈິງຂອງແຂວງແນໃສ່ຮັບປະກັນເຮັດໃຫ້ການດໍາເນີນກອງປະຊຸມບັນລຸຜົນສໍາເລັດຕາມລະດັບຄາດຫມາຍວາງໄວ້. ກອງປະຊຸມຄັ້ງນີ້, ຍັງໄດ້ເປີດໃຫ້ປະຊາຊົນບັນດາເຜົ່າສົ່ງຄຳຄິດເຫັນຜ່ານໂທລະສັບສາຍດ່ວນ ເບີໂທລະສັບ 064165 ແລະ ຈະດຳເນີນໄປເປັນເວລາ 3 ວັນ ຈຶ່ງຈະສຳເລັດ.

ຂ່າວ-ພາບ: ໄອແກ້ວ

แชร์