ນາຍົກລັດຖະມົນຕີ ຕ້ອນຮັບປະທານສະພາບັນດິດ ວິທະຍາສາດແລະເຕັກໂນໂລຊີ ສສຫວຽດນາມ

ວັນທີ 27 ກໍລະກົດ 2022 ນີ້, ທ່ານ ພັນຄໍາ ວິພາວັນ ນາຍົກລັດຖະມົນຕີ ແຫ່ງ ສປປ ລາວ ໄດ້ໃຫ້ກຽດຕ້ອນຮັບ ທ່ານ ເຈົາ ວັນ ມິງ ກໍາມະການສູນກາງພັກ, ປະທານສະພາບັນດິດວິທະຍາສາດ ແລະເຕັກໂນໂລຊີ ສສ ຫວຽດນາມ ພ້ອມດ້ວຍຄະນະໃນໂອກາດເດີນທາງມາຢ້ຽມຢາມແລະເຮັດວຽກຢູ່ ສປປ ລາວ ໃນລະຫວ່າງວັນທີ 26-30 ກໍລະກົດ 2022.

ໂອກາດດັ່ງກ່າວ, ທ່ານ ພັນຄໍາ ວິພາວັນ ໄດ້ສະແດງຄວາມຍິນດີຕ້ອນຮັບ ແລະ ຕີລາຄາສູງຕໍ່ ທ່ານ ເຈົາ ວັນ ມິງ ພ້ອມດ້ວຍຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້, ໃນທ່າມກາງບັນຍາກາດທີ່ສອງປະເທດກໍາລັງຮ່ວມກັນສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ, ຫວຽດນາມ-ລາວ 2022, ທັງເປັນການປະກອບສ່ວນຮັດແໜ້ນການພົວພັນຮ່ວມມືໃນທຸກຂົງເຂດວຽກງານໂດຍສະເພາະການຮ່ວມມືຮອບດ້ານລະຫວ່າງກະຊວງເຕັກໂນໂລຊີ ແລະ ການສື່ສານ ລາວ ແລະ ຫວຽດນາມ ໃຫ້ໄດ້ຮັບການພັດທະນາ ແລະ ສືບຕໍ່ໃຫ້ການສະໜັບສະໜູນຊ່ວຍເຫລືອແລກປ່ຽນບົດຮຽນ,ຄວາມຮູ້ໃນດ້ານຕ່າງໆເຊິ່ງກັນ ແລະ ກັນຕະຫລອດໄປ,ພ້ອມນີ້,ທ່ານນາຍົກລັດຖະມົນຕີຍັງໄດ້ສະແດງຄວາມຊົມເຊີຍຕໍ່ການພົວພັນຮ່ວມມືລະຫວ່າງສອງກະຊວງ,ເຊິ່ງໃນໄລຍະຜ່ານມາເຫັນໄດ້ວ່າກະຊວງເຕັກໂນໂລຊີ ແລະ ການສື່ສານຂອງ ສປປ ລາວ ໄດ້ແລກປ່ຽນ ແລະ ຖອດຖອນບົດຮຽນໃນດ້ານຕ່າງໆຈາກ ສສ ຫວຽດນາມ ເພື່ອນຳມາໝູນໃຊ້ເຂົ້າໃນການພັດທະນາ ຢູ່ ສປປ ລາວ ທັງດ້ານວິທະຍາສາດ ແລະເຕັກໂນໂລຊີເປັນຕົ້ນການຮ່ວມມືກັບ ສສ ຫວຽດນາມ ໃນການສ້າງສະຖາບັນ,ຫ້ອງທົດລອງ,ຫ້ອງຄົ້ນຄວ້າ ແລະອື່ນໆ, ພ້ອມທັງສະແດງຄວາມຫວັງວ່າໃນອະນາຄົດ ທ່ານ ເຈົາ ວັນ ມິງ ກໍຄືຄະນະນໍາສະພາບັນດິດວິທະຍາສາດ ແລະເຕັກໂນໂລຊີຫວຽດນາມ ຈະສືບຕໍ່ເພີ່ມທະວີການຮ່ວມມືເພື່ອພັດທະນາດ້ານເຕັກໂນໂລຊີຂອງສອງປະເທດໃຫ້ຈະເລີນກ້າວໜ້າຂຶ້ນໄປເລື້ອຍໆ.

ໂອກາດດຽວກັນ, ທ່ານ ເຈົາ ວັນ ມິງ ກໍໄດ້ສະແດງຄວາມຂອບໃຈຕໍ່ ທ່ານ ພັນຄຳ ວິພາວັນ ທີ່ໄດ້ສະຫລະເວລາອັນມີຄ່າໃຫ້ຕ້ອນຮັບຢ່າງອົບອຸ່ນ, ພ້ອມທັງຢືນຢັນວ່າຈະສືບຕໍ່ໃຫ້ກ່ນສະໜັບສະໜູນຊ່ວຍເຫລືອດ້ານຕ່າງໆ ໂດຍສະເພາະດ້ານວິທະຍາສາດ ແລະເຕັກໂນໂລຊີແກ່ ສປປ ລາວ ຕະຫລອດໄປເພື່ອເສີມຂະຫຍາຍສາຍພົວພັນມິດຕະພາບ,ຄວາມສາມັກຄີແບບພິເສດ ແລະການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ, ຫວຽດນາມ-ລາວ ໃຫ້ໄດ້ຮັບການພັດທະນາ ແລະແຕກດອກອອກຜົນຍິ່ງໆຂຶ້ນ.

แชร์