ງານວາງສະແດງສິນຄ້າເຟີນິເຈີຄາດມີມູນຄ່າຊື້-ຂາຍ 16 ຕື້ກີບ

   ວັນທີ 25 ມີນາຜ່ານມາທີ່ສູນການຄ້າລາວ-ໄອເຕັກ ນະຄອນຫຼວງວຽງຈັນ ໄດ້ມີພິທີເປີດງານວາງສະແດງເຟີນິເຈີວຽງຈັນຄັ້ງທີ 4 ຢ່າງເປັນທາງການໂດຍການເຂົ້າຮ່ວມຂອງທ່ານ ພັນທອງ ພິດທຸມມາ ຮອງລັດຖະມົນຕີກະຊວງອຸດສາຫະກຳ ແລະການຄ້າ, ທ່ານ ກອງມາລາ ພົມມາໄລ ຮອງປະທານສະມາຄົມເຟີ ນິເຈີລາວ, ມີຜູ້ປະກອບທຸລະກິດເຟີນິເຈີແລະພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ກອງມາລາ ພົມມາໄລ ກ່າວວ່າ: ງານວາງສະແດງສິນຄ້າເຟີນິເຈີວຽງຈັນຄັ້ງທີ 4 ຖືວ່າມີຄວາມໝາຍຄວາມສຳຄັນເປັນຢ່າງຍິ່ງຕໍ່ການຈະເລີນເຕີບ ໂຕຂອງຂະແໜງທຸລະກິດເຟີນິເຈີ, ເປັນການເຕົ້າໂຮມເອົາຜົນງານຫລືຜະລິດຕະພັນເຟີນິເຈີທີ່ເປັນຫົວຄິດປະດິດສ້າງຂອງຄົນລາວເຂົ້າມາໂຮມກັນເພື່ອເປັນການໂຄສະນາ ແລະ ວາງຈຳໜ່າຍຕໍ່ຊາວລາວ ແລະ ຊາວຕ່າງປະເທດໃຫ້ໄດ້ຮັບຮູ້ເຖິງຄວາມພ້ອມຂອງຜະລິດຕະພັນເຟີນິເຈີໄມ້ລາວທັງເປັນການຮອງຮັບກັບການແຂ່ງຂັນກັບພາກພື້ນ ແລະ ສາກົນ.

 ນອກນັ້ນຍັງເປັນການສົ່ງເສີມໃຫ້ຜູ້ປະກອບການໄດ້ມີໂອກາດແລກປ່ຽນບົດຮຽນປະສົບການດ້ວຍກັນ ແລະນຳເອົາບົດຮຽນດັ່ງກ່າວໄປປັບໃຊ້ເຂົ້າໃນຂະບວນ ການຜະລິດ, ການບໍລິການຂອງເຂົາເຈົ້າໃຫ້ເກີດດອກອອກຜົນ, ຊຸກຍູ້ໃຫ້ປະຊາຊົນລາວບັນດາເຜົ່າມີການຜະລິດສິນຄ້າໃຫ້ນັບມື້ນັບຫຼາຍຂຶ້ນເປັນກ້າວໆທັງດ້ານປະລິມານ ແລະຄຸນນະພາບ, ທັງເປັນການດຶງດູດເອົາການລົງທຶນຈາກພາຍໃນ ແລະຕ່າງປະເທດໃຫ້ມາລົງທຶນໃນຂົງເຂດການຜະລິດເຟີນິເຈີໄມ້, ສ້າງ  ມູນຄ່າເພີ່ມໃຫ້ແກ່ຜະລິດຕະພັນເຟີນິເຈີໄມ້ລາວໃຫ້ຫຼາຍຂຶ້ນ, ປະກອບສ່ວນສ້າງສາພັດທະນາປະເທດຊາດໃຫ້ຈະເລີນຮຸ່ງ ເຮືອງທັງຍັງເປັນການສ້າງວຽກເຮັດ ງານທຳໃຫ້ກັບປະຊາຊົນລາວບັນດາເຜົ່າເພື່ອຫຼຸດຜ່ອນໄພວ່າງງານ ຊຶ່ງສອດຄ່ອງກັບແຜນພັດທະນາເສດຖະກິດ-ສັງຄົມ ຂອງລັດຖະບານວາງອອກ.

  ງານວາງສະແດງສິນຄ້າເຟີນິເຈີວຽງຈັນຄັ້ງທີ 4 ຈັດຂຶ້ນໃນລະຫວ່າງວັນທີ 23-31 ມີນາ 2019 ມີທັງໝົດ 180 ຫ້ອງໃນນີ້ມີ 20 ຫ້ອງສຳລັບຫົວໜ່ວຍທຸລະກິດໂອດັອບໂດຍມີຫົວໜ່ວຍທຸລະກິດທີ່ເຂົ້າຮ່ວມທັງໝົດ 75 ຫົວໜ່ວຍ, ມາຈາກຕ່າງແຂວງ 17 ຫົວໜ່ວຍຈາກ 10 ແຂວງຊຶ່ງຄາດການຈໍລະຈອນຊື້-ຂາຍສິນຄ້າລວມທັງໝົດໃນງານປະມານ 20 ຕື້ກີບ ແລະຄາດວ່າຈະມີການຊື້-ຂາຍ ໄດ້ປະມານ16 ຕື້ກີບ ເທົ່າກັບ80%.

ນສພ ເສດຖະກິດ-ສັງຄົມ

แชร์