6 ເດືອນຕົ້ນປີນີ້ ເສດຖະກິດແຂວງອັດຕະປື ຂະຫຍາຍຕົວກວ່າ 3,3%

6 ເດືອນຕົ້ນປີ 2022 ແຂວງອັດຕະປື ອັດຕາຂະຫຍາຍຕົວລວມຍອດຜະລິດຕະພັນພາຍໃນ (GDP) ຢູ່ໃນລດັບ 3,3%, ສາມາດຈັດເກັບລາຍຮັບໄດ້ທັງທົດ 129 ຕື້ກີບ. ຂະນະທີ່ການກໍ່ສ້າງເຮືອນໃຫ້ແກ່ປະຊາຊົນຢູ່ເມືອງສະໜາມໄຊ ຈຳນວນ 700 ຫຼັງ ຈະໃຫ້ສໍາເລັດໃນທ້າຍປີນີ້.

ໃນໂອກາດເຂົ້າຮ່ວມກອງປະຊຸມລັດຖະບານເປີດກວ້າງ ຄັ້ງທີ I ປີ 2022, ທ່ານ ເລັດ ໄຊຍະພອນ ເຈົ້າແຂວງອັດຕະປື ໄດ້ເປີດເຜີຍຕໍ່ສື່ມວນຊົນໃນວັນທີ 22 ກໍລະກົດ ຜ່ານມາໃຫ້ຮູ້ວ່າ: ໃນໄລຍະ 6 ເດືອນຕົ້ນປີ 2022 ເສດຖະກິດຂອງແຂວງອັດຕະປືຂະຫຍາຍຕົວ ຢູ່ໃນລະດັບ 3,3%, ລວມຍອດຜະລິດຕະພັນພາຍໃນສະເລ່ຍຕໍ່ຫົວຄົນ ບັນລຸ 15,15 ລ້ານກີບ, ນອກຈາກນີ້ຍັງສາມາດຈັດເກັບລາຍຮັບໄດ້ທັງໝົດ 129 ຕື້ກວ່າກີບ ເທົ່າກັບ 80% ຂອງແຜນການປີ, ລາຍຈ່າຍປະຕິບັດໄດ້ 147 ຕື້ກວ່າກີບ ເທົ່າກັບ 46% ຂອງແຜນການປີ, ມູນຄ່າການສົ່ງອອກປະຕິບັດໄດ້ 68 ລ້ານກວ່າໂດລາ ເທົ່າກັບ 41% ຂອງແຜນການປີ, ແຜນປູກເຂົ້ານາປີໃນເນື້ອທີ່ 24.990 ເຮັກຕາ ມາຮອດປັດຈຸບັນແມ່ນຕົກກ້າສຳເລັດ 100%, ປັກດຳສຳເລັດແລ້ວກວ່າ 70% ຄາດວ່າກາງເດືອນສິງຫານີ້ຈະປັກດຳສຳເລັດ 100%.

ທ່ານກ່າວຕື່ມວ່າ: ແຂວງອັດຕະປື ໄດ້ສຸມໃສ່ການຈັດຕັ້ງປະຕິບັດ 2 ວາລະແຫ່ງຊາດ ໂດຍສະເພາະການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະການແກ້ໄຂບັນຫາຢາເສບຕິດ,ພາຍຫຼັງໄດ້ຮັບການຊີ້ນຳຈາກລັດຖະບານໃນການຈັດຕັ້ງປະຕິບັດ 2 ວາລະແຫ່ງຊາດດັ່ງກ່າວ ແຂວງອັດຕະປືກໍໄດ້ແຕ່ງຕັ້ງຄະນະບັນຊາ-ຊີ້ນຳຂັ້ນແຂວງ ໂດຍແມ່ນຮອງເຈົ້າແຂວງເປັນຫົວໜ້າຄະນະ, ເຈົ້າແຂວງເປັນຜູ້ບັນຊາໂດຍກົງຊຶ່ງຜ່ານການຈັດຕັ້ງປະຕິບັດຕົວຈິງເຫັນໄດ້ວ່າມີຜົນສຳເລັດສົມຄວນສາມາດທັບມ້າງຫຼາຍຄະດີທີ່ພົວພັນກັບການຄ້າ-ຂາຍຢາເສບຕິດ ຕິດພັນກັບການໂຄສະນາສຶກສາອົບຮົມປະຊາຊົນ, ໄວໜຸ່ມຍິງສາວໃຫ້ເຫັນໄດ້ເຖິງໄພອັນຕະລາຍຂອງຢາເສບຕິດ, ສ່ວນບັນຫາການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ທາງແຂວງກໍໄດ້ເອົາໃຈໃສ່ໂດຍສະເພາະເລັ່ງໃສ່ການຈັດເກັບລາຍຮັບເຂົ້າງົບປະມານ ແລະ ລາຍຈ່າຍກໍຈ່າຍຕາມແຜນຕິດພັນກັບການປະຢັດມັດທະຍັດ ແລະສຸມໃສ່ການແກ້ໄຂໜີ້ສິນ, ສົ່ງເສີມການຜະລິດ-ປູກຝັງ-ລ້ຽງສັດ ຂອງປະຊາຊົນໃຫ້ກາຍເປັນສິນຄ້າເພື່ອທົດແທນການນຳເຂົ້າປັດຈຸບັນການປູກມັນຕົ້ນ, ປູກອ້ອຍຢູ່ແຂວງອັດຕະປື ເຫັນວ່າເປັນຂະບວນການກວ້າງຂວາງພໍສົມຄວນ.

ທ່ານໃຫ້ຮູ້ຕື່ມວ່າ: ສຳລັບແຜນຟື້ນຟູຜົນກະທົບຈາກໄພພິບັດຢູ່ເມືອງສະໜາມໄຊ, ບໍລິສັດຜູ້ພັດທະນາໂຄງການ PNPC ໄດ້ຊົດເຊີຍຜົນເສຍຫາຍເປັນເງິນທັງໝົດ 828 ຕື້ກວ່າກີບ ທຶນຈຳນວນດັ່ງກ່າວແມ່ນໄດ້ນຳໃຊ້ເຂົ້າໃນການກໍ່ສ້າງພື້ນຖານໂຄງລ່າງ ເພື່ອຟື້ນຟູຊີວິດການເປັນຢູ່ຂອງປະຊາຊົນເປັນຕົ້ນກໍ່ສ້າງຖະໜົນຫົນທາງ, ໄຟຟ້າ-ນໍ້າປະປາ, ໂຮງຮຽນ, ໂຮງໝໍ, ກໍ່ສ້າງເຮືອນ ຈຳນວນ 700 ຫຼັງ, ໂຄງການປູກຝັງ-ລ້ຽງສັດ, ຊົນລະປະທານຕິດພັນກັບການສ້າງວຽກເຮັດງານທຳໃຫ້ແກ່ປະຊາຊົນ, ສັງລວມແລ້ວການຈັດຕັ້ງປະຕິບັດວຽກງານຟື້ນຟູໄພພິບັດຢູ່ເມືອງສະໜາມໄຊ ເຫັນວ່າມີຜົນສຳເລັດດີພໍສົມຄວນປັດຈຸບັນແມ່ນເລັ່ງໃສ່ໂຄງການກໍ່ສ້າງເຮືອນ 700 ຫຼັງ ໃຫ້ສຳເລັດຕາມແຜນການທີ່ວາງໄວ້ຄືທ້າຍປີນີ້ໃຫ້ສຳເລັດ 100%.

(ຂ່າວ: ສຳນານ)

แชร์