ສະຫາຍເລຂາທິການໃຫຍ່ ຕ້ອນຮັບຄະນະຜູ້ແທນແນວໂຮມປະເທດຊາດຫວຽດນາມ

ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກປະຊາຊົນ ປະຕິວັດລາວ ປະທານປະເທດ ແຫ່ງ ສປປ ລາວ ໄດ້ຕ້ອນຮັບການເຂົ້າຢ້ຽມຂໍ່ານັບຂອງ ສະຫາຍ ໂດວັນ ຈຽນ ເລຂາທິການສູນກາງພັກກອມມູນິດຫວຽດນາມປະທານຄະນະກຳມະການສູນກາງແນວໂຮມປະເທດຊາດຫວຽດນາມພ້ອມດ້ວຍຄະນະ ໃນວັນທີ 27 ກໍລະກົດ 2022 ທີ່ຫ້ອງວ່າການສູນກາງພັກ. ໃນໂອກາດທີ່ເດີນທາງມາເຮັດວຽກ ແລະຢ້ຽມຢາມ ສປປ ລາວ ຢາງເປັນທາງການໃນລະຫວ່າງວັນທີ 26-28 ກໍລະກົດນີ້.

ໃນໂອກາດດັ່ງກ່າວ, ສະຫາຍ ທອງລຸນ ສີສຸລິດ ກໍໄດ້ສະແດງຄວາມຍິນດີຕ້ອນຮັບ ແລະຕີລາຄາສູງຕໍ່ການມາຢ້ຽມຢາມຂອງ ສະຫາຍ ໂດວັນ ຈຽນ ພ້ອມຄະນະໃນຄັ້ງນີ້ ຊຶ່ງເປັນການເພີ່ມພູນຄູນສ້າງສາຍພົວພັນມິດຕະພາບອັນຍິ່ງໃຫຍ່ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດກໍຄືປະຊາຊົນສອງຊາດລາວ-ຫວຽດນາມ ໃຫ້ນັບມື້ເຕີບໃຫຍ່ຂະຫຍາຍຕົວຢ່າງບໍ່ຢຸດຢັ້ງ ແລະການມາຢ້ຽມຢາມ ສປປ ລາວ ຂອງຄະນະຜູ້ແທນຫວຽດນາມໃນຄັ້ງນີ້ແມ່ນທ່າມກາງບັນຍາກາດທີ່ສອງພັກ, ສອງລັດ ແລະປະຊາຊົນສອງຊາດລາວ-ຫວຽດນາມ ພວມຈັດຕັ້ງກິດຈະກຳສຳຄັນຕ່າງໆ ໃນປີສາມັກຄີມິດຕະພາບ ລາວ-ຫວຽດນາມ ປີ 2022 ຢ່າງຟົດຟື້ນ ແລະມີຄວາມໝາຍຢ່າງເລິກເຊິ່ງ.

ສະຫາຍ ໂດວັນ ຈຽນ ກໍໄດ້ຕາງໜ້າໃຫ້ຄະນະຜູ້ແທນສະແດງຄວາມຮູ້ບຸນຄຸນ ແລະຂອບໃຈເປັນຢ່າງສູງຕໍ່ການຕ້ອນຮັບອັນອົບອຸ່ນແບບມິດສະຫາຍຂອງ ສະຫາຍ ທອງລຸນ ສີສຸລິດ ກໍຄືບັນດາການນໍາຂອງລາວ ແລະ ໄດ້ລາຍງານຜົນການພົບປະກັບປະທານສູນກາງແນວລາວສ້າງຊາດ, ພ້ອມທັງໄດ້ແຈ້ງສະພາບລວມຜົນງານທີ່ພົ້ນເດັ່ນຂອງການພັດທະນາເສດຖະກິດ-ສັງຄົມ ຂອງຫວຽດນາມ ໃນສະພາບການໃໝ່ໃຫ້ຝ່າຍລາວໄດ້ຮັບຊາບ ແລະຜົນການພົວພັນຮ່ວມມື ແລະເຮັດວຽກຮ່ວມກັນລະຫວ່າງ ແນວໂຮມປະເທດຊາດຫວຽດນາມກັບສູນກາງແນວລາວສ້າງຊາດແມ່ນດຳເນີນໄປຕາມແຜນດ້ວຍຜົນສຳເລັດອັນຈົບງາມ.

ໃນໄລຍະຢ້ຽມຢາມ ສປປ ລາວ, ສະຫາຍ ໂດວັນ ຈຽນ ພ້ອມດ້ວຍຄະນະ ຍັງໄດ້ເຂົ້າຢ້ຽມຂໍ່ານັບ ສະຫາຍ ພັນຄຳ ວິພາວັນ ກໍາມະການກົມການເມືອງສູນກາງພັກ ນາຍົກລັດຖະມົນຕີ ແຫ່ງ ສປປ ລາວ ທີ່ສຳນັກງານນາຍົກລັດຖະມົນ. ແລະ ສະຫາຍ ໄຊສົມພອນ ພົມວິຫານ ກໍາມະການກົມການເມືອງສູນກາງພັກປະທານສະພາແຫ່ງຊາດ. ນອກຈາກນີ້ຄະນະຜູ້ແທນດັ່ງກ່າວຍັງໄດ້ໄປຢ້ຽມຢາມ ບໍລິສັດ ທ່າບົກທ່ານາແລ້ງ ຈຳກັດຜູ້ດຽວ, ສະມາຄົມໃຫຍ່ຊາວຫວຽດນາມ ຢູ່ ສປປ ລາວ ແລະ ຢ້ຽມຢາມໂຮງຮຽນຫງວຽນຢູ່ ແລະບ່ອນອື່ນໆອີກຈຳນວນໜຶ່ງ.

ຂ່າວ-ພາບ: ສນຊ

แชร์