ສູນກາງແນວລາວສ້າງຊາດ-ສູນກາງແນວໂຮມປະເທດຊາດຫວຽດນາມ ເສີມຂະຫຍາຍການຮ່ວມມື

ພິທີພົບປະສອງຝ່າຍລະຫວ່າງຄະນະກຳມະການສູນກາງແນວລາວສ້າງຊາດ ແລະ ຄະນະກຳມະການສູນກາງແນວໂຮມປະເທດຊາດຫວຽດນາມຈັດຂຶ້ນໃນວັນທີ 26 ກໍລະກົດ 2022 ທີ່ສູນກາງແນວລາວສ້າງຊາດ, ຝາຍລາວນຳໂດຍທ່ານ ສິນລະວົງ ຄຸດໄພທູນ ກຳມະການກົມການເມືອງສູນກາງພັກ, ປະທານສູນກາງແນວລາວສ້າງຊາດ ແລະຝ່າຍຫວຽດນາມ ນຳໂດຍ ທ່ານ ໂດ ວັນ ຈຽນ ຄະນະເລຂາທິການສູນກາງພັກກອມມູນິດຫວຽດນາມປະທານສູນກາງແນວໂຮມປະເທດຊາດຫວຽດນາມ.

ໂອກາດນີ້, ສອງຝ່າຍໄດ້ແຈ້ງໃຫ້ກັນຊາບກ່ຽວກັບສະພາບການພັດທະນາເສດຖະກິດ-ສັງຄົມ ຂອງແຕ່ລະປະເທດ; ລາຍງານກ່ຽວກັບການເຄື່ອນໄຫວຂອງ ແນວລາວສ້າງຊາດ ແລະ ແນວໂຮມປະເທດຊາດຫວຽດນາມ, ຜົນການຈັດຕັ້ງຜັນຂະຫຍາຍບົດບັນທຶກການຮ່ວມມືລະຫວ່າງສອງອົງການແນວໂຮມ ໄລຍະປີ 2016-2020 ບົນພື້ນຖານແທດເໝາະກັບພາລະບົດບາດ, ໜ້າທີ່ ແລະ ຂອບເຂດສິດຂອງແຕ່ລະຝ່າຍທີ່ໄດ້ເຊັນຮ່ວມກັນ, ລະບຽບກົດໝາຍທີ່ກ່ຽວຂ້ອງຂອງແຕ່ລະປະເທດ ແລະ ແທດເໝາະກັບ ສົນທິສັນຍາສາກົນທີ່ເປັນສະມາຊິກ. ພ້ອມນີ້, ສອງຝ່າຍຍັງໄດ້ແລກປ່ຽນ ແລະເປັນເອກະພາບນຳກັນກ່ຽວກັບເນື້ອໃນການຮ່ວມມືລະຫວ່າງຄະນະກຳມະການສູນກາງແນວລາວສ້າງຊາດ ແລະຄະນະກຳມະການສູນກາງແນວໂຮມປະເທດຊາດຫວຽດນາມ ໄລຍະປີ 2022-2027. ຈາກນັ້ນ, ສອງຝ່າຍກໍໄດ້ເຊັນບົດບັນທຶກການຮ່ວມມືໃນໄລຍະປີ 2022-2027 ຕື່ມອີກ.

ໃນໂອກາດນີ້, ທ່ານ ໂດ ວັນ ຈຽນ ຍັງໄດ້ປະດັບຫລຽນໄຊ, ຫລຽນກາລະນຶກຂອງພັກ-ລັດ ແຫ່ງ ສສ ຫວຽດນາມ ໃຫ້ແກ່ການນຳ, ຄະນະກຳມະການ ແລະພະນັກງານສູນກາງແນວລາວສ້າງຊາດ ຈຳນວນ 38 ທ່ານ, ໃນນີ້ມີລຽນໄຊເອກະລາດຊັ້ນ 3 ຈໍານວນ 2 ທ່ານ, ຫລຽນໄຊແຮງງານ 8 ທ່ານ ແລະຫລຽນກາລະນຶກ 28 ທ່ານ.

ຂ່າວ-ພາບ: ບຸນຕອມ

แชร์