ຄຳມ່ວນ ດຳເນີນກອງປະຊຸມຄົບຄະນະບໍລິຫານງານພັກແຂວງຄັ້ງທີ 7 ສະໄໝທີ X

ກອງປະຊຸມເປີດກວ້າງ ຄົບຄະນະບໍລິຫານງານພັກແຂວງຄຳມ່ວນ ຄັ້ງທີ 7 ສະໄໝທີ X ໄດ້ໄຂຂຶ້ນໃນວັນທີ 27 ກໍລະກົດ 2022 ທີ່ເຮືອນພັກເລກ 1 ໂດຍການເປັນປະທານຂອງ ທ່ານ ວັນໄຊ ພອງສະຫວັນ ກຳມະການສູນກາງພັກ, ເລຂາພັກແຂວງ, ເຈົ້າແຂວງຄຳມ່ວນ, ມີບັນດາສະຫາຍຮອງເລຂາພັກແຂວງ, ຄະນະປະຈໍາພັກແຂວງ, ບັນດາຄະນະບໍລິຫານງານພັກແຂວງ, ເລຂາພັກເມືອງ, ເລຂາຄະນະພັກຮາກຖານພະແນກການອ້ອມຂ້າງ, ອົງການທຽບເທົ່າເຂົ້າຮ່ວມ.

ກອງປະຊຸມຈະໄດ້ດຳເນີນໄປເປັນເວລາ 2 ວັນ, ໃນລະຫວ່າງວັນທີ 27 – 28 ກໍລະກົດ 2022. ຊຶ່ງໃນວາລະກອງປະຊຸມບັນດາສະຫາຍທີ່ເຂົ້ຮ່ວມຈະໄດ້ພ້ອມກັນປະກອບຄຳຄິດເຫັນໃສ່ບັນດາເນື້ອໃນເອກະສານສຳຄັນຄື : ບົດສະຫລຸບການຈັດຕັ້ງປະຕິບັດແຜນພັດທະນາເສດຖະກິດ - ສັງຄົມ 06 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022, ຮັບຟັງການລາຍງານການຊຸກຍູ້ຈັດເກັບລາຍຮັບງົບປະມານ, ການຄຸ້ມຄອງລາຍຈ່າຍ 6 ເດືອນຕົ້ນປີ ແລະທິດທາງແຜນການ 6 ເດືອນທ້າຍປີ 2022, ຮັບຟັງການລາຍງານການຊຸກຍູ້ການຈັດຕັ້ງປະຕິບັດໂຄງການຄໍ້າປະກັນທາງດ້ານສະບຽງອາຫານ ແລະ ການຜະລິດກະສິກຳເປັນສິນຄ້າ ແລະ ການກະກຽມຮັບມືກັບໄພພິບັດ (ຕ້ານແລ້ງ-ຕ້ານຖ້ວມ) ໃນຊ່ວງລະດູຝົນນີ້, ຮັບຟັງການລາຍງານກ່ຽວກັບການຈັດຕັ້ງປະຕິບັດ ການຊຸກຍູ້, ສົ່ງເສີມ ແລະສ້າງຄວາມເຂັ້ມແຂງໃຫ້ແກ່ບັນດາຫົວໜ່ວຍທຸລະກິດຂະໜາດນ້ອຍ ແລະ ຂະໜາດກາງໃນການຜະລິດເປັນສິນຄ້າ ແລະ ມີຕະຫຼາດຈຳໜ່າຍ, ຕີລາຄາຄືນການຄຸ້ມຄອງລາຄາສິນຄ້າ, ຮັບຟັງການລາຍງານ ກ່ຽວກັບການຄຸ້ມຄອງ, ຕິດຕາມ, ກວດກາການຂຸດຄົ້ນ ແລະປຸງແຕ່ງແຮ່ທາດຕ່າງໆພາຍໃນແຂວງ. ພ້ອມດຽວກັນນີ້ບັນດາສະຫາຍທີ່ເຂົ້້າຮ່ວມຈະໄດ້ພ້ອມກັນເຊື່ອມຊຶມມະຕິກອງປະຊຸມຄົບຄະນະຄັ້ງທີ 4 ຂອງຄະນະບໍລິຫານງານສູນກາງພັກ ສະໄໝທີ XI.

แชร์