ລັດຖະມົນຕີກະຊວງພາຍໃນຊຸກຍູ້ວຽກງານຂະແໜງພາຍໃນ ຢູ່ແຂວງສະຫວັນນະເຂດ

ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນພ້ອມດ້ວຍຄະນະໄດ້ລົງເຄື່ອນໄຫວ ແລະ ຊຸກຍູ້ວຽກງານຂະແໜງພາຍໃນຢູ່ແຂວງສະຫວັນນະເຂດ ໃນທີ່ 27 ກໍລະກົດ 2022 ໂດຍມີ ທ່ານ ຈີນດາວັນ ບຸດລາສີ ຫົວໜ້າພະແນກພາຍໃນແຂວງສະຫວັນນະເຂດມີຮອງຫົວໜ້າພະແນກ ແລະພະນັກງານ-ລັດຖະກອນ ພະແນກພາຍໃນແຂວງເຂົ້າຮ່ວມການຕ້ອນຮັບ.

ການລົງຊຸກຍູ້ວຽກງານຂະແໜງພາຍໃນຄັ້ງນີ້ທ່ານລັດຖະມົນຕີກະຊວງພາຍໃນພ້ອມຄະນະໄດ້ຮັບຟັງການລາຍງານກ່ຽວກັບການຈັດຕັ້ງປະຕິບັດວຽກງານຂອງພະແນກພາຍໃນແຂວງສະຫວັນນະເຂດ ໄລຍະ 6 ເດືອນຜ່ານມາຈາກ ທ່ານ ຈິນດາວັນ ບຸດລາສີ ຫົວໜ້າພະແນກພາຍໃນແຂວງສະຫວັນນະເຂດ ໂດຍໄດ້ຍົກໃຫ້ເຫັນຜົນງານ, ດ້ານດີ, ຂໍ້ຄົງຄ້າງ, ສາຍເຫດ ແລະທິດທາງໃນຕໍ່ໜ້າ, ຊຶ່ງໄລຍະຜ່ານມາພະແນກພາຍໃນແຂວງໄດ້ເປັນເສນາທິການໃຫ້ແກ່ອົງການປົກຄອງແຂວງຈັດຕັ້ງປະຕິບັດມະຕິກົມການເມືອງສູນກາງພັກ ເລກທີ 07/ກມສພ, ຄໍາສັ່ງຂອງຄະນະເລຂາທິການສູນກາງພັກເລກທີ 190/ຄລສພ, ຄໍາແນະນໍາຂອງນາຍົກລັດຖະມົນຕີເລກທີ 01/ນຍ,ແຈ້ງການຂອງກະຊວງພາຍໃນເລກທີ 175/ພນ ກ່ຽວກັບການປັບປຸງກົງຈັກການຈັດຕັ້ງໂດຍໄດ້ກວດຜ່ານການຂຽນກໍານົດຕຳແໜ່ງງານດ່ານສາກົນແດນສະຫວັນ ແລະ ສະເໜີຂໍລາຍເຊັນ ທ່ານເຈົ້າແຂວງເພື່ອນຳສົ່ງກະຊວງພາຍໃນ, ກວດຜ່ານເອກະສານຂໍ້ຕົກລົງວ່າດ້ວຍການຈັດຕັ້ງ ແລະການເຄື່ອນໄຫວວຽກງານ 5 ຫ້ອງການຂັ້ນແຂວງ, ໂຮຽຮຽນການເມືອງ-ການປົກຄອງ,ແນວລາວສ້າງຊາດ,ສະຫະພັນນັກຮົບເກົ່າ, ຊາວໜຸ່ມ, ອົງການໄອຍະການປະຊາຊົນແຂວງ; ໄດ້ສະຫຼຸບ-ສັງລວມການຈັດຕັ້ງປະຕິບັດວຽກງານສາມສ້າງ, ສ້າງແຂວງເປັນຫົວໜ່ວຍຍຸດທະສາດ, ສ້າງເມືອງເປັນຫົວໜ່ວຍເຂັ້ມແຂງຮອບດ້ານ ແລະ ສ້າງບ້ານເປັນຫົວໜ່ວຍພັດທະນາປະຈຳປີ 2021; ໄດ້ສ້າງແຜນໂຄງການເຜີຍແຜ່ກົດໝາຍ ແລະນິຕິກໍາກ່ຽວກັບການຈົດທະບຽນ ແລະ ສະຖິຕິພົນລະເມືອງໃຫ້ຫ້ອງການພາຍໃນເມືອງ ແລະ ຫ້ອງການອ້ອມຂ້າງເມືອງ; ກວດຜ່ານບັນດາເອກະສານ, ຂໍ້ສະເໜີຕ່າງໆ ທີ່ບັນດາພະແນກການສະເໜີມາເປັນຕົ້ນແມ່ນ ກວດຜ່ານເລື່ອນຊັ້ນ-ຂັ້ນເງິນເດືອນປົກກະຕິ; ເກັບມ້ຽນ, ຄຸ້ມຄອງ ແລະ ປົກປັກຮັກສາບັນດາເອກະສານທີ່ສຳຄັນຂອງພັກ-ລັດ ໄວ້ເປັນຂໍ້ມູນທາງດ້ານການເມືອງ, ປະຫວັດສາດ, ເສດຖະກິດ-ສັງ ຄົມ ແລະເອກະສານປະເພດອື່ນໆ; ຄົ້ນຄວ້າ, ສະເໜີຍ້ອງຍໍບຸກຄົນ, ນິຕິບຸກຄົນ ແລະກົມກອງ, ທີ່ປະຕິບັດໜ້າທີ່ວິຊາສະເພາະ, ປະກອບສ່ວນເງິນຄຳ, ວັດຖຸປັດໃຈ, ເຫື່ອແຮງ, ໃນຂະບວນການຕ່າງໆ ທີ່ພັກລັດຈັດຂຶ້ນເພື່ອຄຳນັບຮັບຕ້ອນວັນສຳຄັນຕ່າງໆ ແລະຕ້ານໄພພິບັດ, ພະຍາດລະບາດ ໂຄວິດ -19. ນອກນັ້ນ, ການໂຄສະນາເຜີຍແຜ່-ເຊື່ອມຊືມບັນດານິຕິກໍາໃຫ້ແກ່ຄະນະພັກ, ອົງການປົກຄອງແຕ່ລະຂັ້ນຢ່າງກວ້າງຂວາງ.

ພ້ອມທັງສຸມໃສ່ປັບປຸງກົງຈັກການຈັດຕັ້ງຢູ່ໃນແຕ່ລະຂັ້ນນັບທັງຂັ້ນແຂວງ, ຂັ້ນເມືອງດ້ວຍການຊັບຊ້ອນຈັດວາງບຸກຄະລາກອນເຂົ້າໃສ່ຕຳແໜ່ງງານເໜາະສົມກັບຄວາມຮູ້ຄວາມສາມາດ ແລະວິຊາສະເພາະຂອງແຕ່ລະຄົນໃນການຈັດຕັ້ງປະຕິບັດພາລະບົດບາດຂອງຕົນ.

ໂອກາດນີ້ ທ່ານ ປອ ທອງຈັນ ມະນີໄຊ ລັດຖະມົນຕີກະຊວງພາຍໃນ ໄດ້ມີຄໍາເຫັນວ່າ: ຜ່ານການຮັບຟັງການລາຍງານຂອງທ່ານຫົວໜ້າພະແນກພາຍໃນແຂວງເຖີງແມ່ນວ່າມີຂໍ້ຫຍຸ້ງຍາກ ແລະສິ່ງທ້າທາຍຫຼາຍຢ່າງແຕ່ພາຍໃຕ້ການນໍາພາ-ຊີ້ນໍາຂອງຄະນະພັກ,ອໍານາດການປົກຄອງແຂວງກໍຄືໜ່ວຍພັກ ແລະຄະນະນໍາຂອງພະແນກພາຍໃນແຂວງ ດ້ວຍຄວາມສາມັກຄີຂອງສະມາຊິກພັກ ແລະ ພະນັກງານ-ລັດຖະກອນ ພະແນກພາຍໃນແຂວງສະຫວັນນະເຂດໄດ້ພ້ອມກັນສູ້ຊົນຈັດຕັ້ງປະຕິບັດໜ້າທີ່ການເມືອງທີ່ໄດ້ຮັບມອບໝາຍເຮັດໃຫ້ບັນລຸຜົນສໍາເລັດໃນຫຼາຍດ້ານສາມາດເປັນເສນາທິການໃຫ້ແກ່ຄະນະພັກ, ອໍານາດການປົກຄອງແຂວງ ແລະບໍລິການຮັບໃຊ້ພໍ່ແມ່ປະຊາຊົນຂົງເຂດວຽກງານຂະແໜງພາຍໃນໄດ້ນັບມື້ດີຂຶ້ນ ແລະ ເປັນການປະກອບສ່ວນທີ່ສໍາຄັນເຂົ້າໃນການພັດທະນາປະເທດຊາດໂດຍສະເພາະການພັດທະນາເສດຖະກິດ-ສັງຄົມຂອງແຂວງສະຫວັນນະເຂດ.

ນອກນັ້ນ, ທ່ານ ປອ ທອງຈັນ ມະນີໄຊ ລັດຖະມົນຕີກະຊວງພາຍໃນໄດ້ເນັ້ນຕື່ມວ່າ: ອີງໃສ່ຄວາມຕ້ອງການຂອງໜ້າທີ່ການເມືອງໃນໄລຍະໃໝ່ຂະແໜງການພາຍໃນ ຈະໄດ້ພ້ອມກັນຄົ້ນຄວ້າ, ປັບປຸງ ແລະ ສ້າງນິຕິກໍາທີ່ຕິດພັນກັບພາລະບົດບາດຂອງຂະແໜງພາຍໃນ, ສືບຕໍ່ປັບປຸງກົງຈັກການຈັດຕັ້ງບັນດາກະຊວງ, ອົງການ ແລະ ທ້ອງຖິ່ນຕິດພັນກັບການກໍານົດຕໍາແໜ່ງງານຕາມທິດກະທັດຮັດ, ບໍ່ຊໍ້າຊ້ອນກ້າວກ່າຍວຽກງານກັນ, ຈັດຕັ້ງປະຕິບັດວຽກງານບໍລິການຜ່ານປະຕູດຽວໃນຂອບເຂດທົ່ວປະເທດ, ຫັນການຄຸ້ມຄອງພະນັກງານ-ລັດຖະກອນ ເປັນທັນສະໄໝ, ຈັດຕັ້ງປະຕິບັດໂຄງການຈົດທະບຽນ ແລະ ສະຖິຕິພົນລະເມືອງດ້ວຍລະບົບທັນສະໄໝ, ແກ້ໄຂບັນຫາເຂດແດນເຊື່ອມຕໍ່ລະຫວ່າງແຂວງກັບແຂວງໃຫ້ສໍາເລັດພາຍໃນປີ 2022, ສະຫຼຸບຕີລາຄາຂະບວນການແຂ່ງຂັນ, ຮັກຊາດ ແລະ ພັດທະນາຕິດພັນກັບການຈັດຕັ້ງປະຕິບັດວຽກງານສາມສ້າງ, ຄົ້ນຄວ້າຫັນຫົວໜ່ວຍວິຊາການທີ່ມີລາຍຮັບໄປກຸ້ມຕົນເອງທາງດ້ານງົບປະມານເທື່ອລະກ້າວ ແລະຫັນພະນັກງານ- ວິຊາການ ຢູ່ຫົວໜ່ວຍດັ່ງກ່າວເປັນພາລະກອນເພື່ອຫຼຸດຜ່ອນຈໍານວນພະນັກງານ-ລັດຖະກອນ, ສືບຕໍ່ຍົກລະດັບຄວາມຮູ້ຄວາມສາມາດທາງດ້ານວິຊາສະເພາະໃຫ້ພະນັກງານ-ລັດຖະກອນຂະແໜງພາຍໃນທັງຂັ້ນສູນກາງ ແລະ ທ້ອງຖິ່ນ.

แชร์