ນວ ໂຮມ 5 ເຂດເສດຖະກິດເຂົ້າເປັນຄະນະອັນດຽວ

 ນະຄອນຫຼວງວຽງຈັນ (ນວ) ໄດ້ສຳເລັດການເຕົ້າໂຮມເອົາບັນດາເຂດເສດຖະກິດພິເສດ (ຂພສ) ທີ່ມີຢູ່ໃນນະຄອນຫຼວງວຽງຈັນເຂົ້າໃນຄະນະບໍລິຫານ ແລະການຄຸ້ມຄອງເປັນອັນດຽວ, ເພື່ອສະດວກໃນການບໍລິຫານ ແລະພັດທະນາໃຫ້ໄປຕາມທິດຄຸ້ມຄອງຂອງລັດຖະບານຊຶ່ງພິທີມອບ-ຮັບການບໍລິຫານ ແລະການຄຸ້ມຄອງລະຫວ່າງຄະນະສະພາບໍລິຫານ ຂພສ ໃນນະຄອນຫຼວງວຽງຈັນ ແລະຄະນະຄຸ້ມຄອງ ຂພສ ນວ ໄດ້ມີຂຶ້ນໃນວັນທີ 25 ມີນາ 2019, ທີ່ ຂພສ ບຶງທາດຫຼວງໂດຍແມ່ນທ່ານ ສຸບັນ ຈຸນລະຊາ ເປັນຫົວໜ້າຄະນະຄຸ້ມຄອງເຂດເສດຖະກິດພິເສດ ນວ ແລະມອບໂດຍບັນດາຜູ້ຕາງໜ້າເຂດຕ່າງໆ, ມີທ່ານ ນາງ ຄໍາຈັນ ວົງແສນບູນ ຮອງລັດຖະມົນຕີກະຊວງແຜນການ ແລະການລົງທຶນ, ທ່ານ ສີຫຸນ ສິດທິລືໄຊ ຮອງເຈົ້າຄອງ ນວ ເປັນກຽດເຂົ້າຮ່ວມ ແລະພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.

  ທ່ານ ສົມກຽດ ສີຫາລາດ ຮອງຄະນະຄຸ້ມຄອງ ຂພສ ນະຄອນຫຼວງວຽງຈັນ ກ່າວວ່າ: ການມອບ-ຮັບໜ້າທີ່ລະຫວ່າງເຂດເສດຖະກິດພິເສດນະຄອນຫຼວງວຽງຈັນ ແລະຄະນະຄຸ້ມຄອງເຂດເສດຖະກິດພິເສດນະຄອນຫຼວງວຽງຈັນ ໃນຄັ້ງນີ້ແມ່ນເພື່ອປະຕິບັດຕາມກົດໝາຍວ່າດ້ວຍສົ່ງເສີມການລົງທຶນສະບັບເລກທີ 02/ສພຊ, 14/ສພຊ, ດຳລັດ 443/ນຍ ໃນທີ່ຜ່ານມາ ແລະດຳລັດ 188/ລບ, ຂໍ້ຕົກລົງ 1971/ກຜທ ໃນປະຈຸບັນ,ເຫັນວ່າການພັດທະນາເຂດເສດຖະ ກິດພິເສດ ນວ ມີທ່າຂະຫຍາຍຕົວຢ່າງຕໍ່ເນື່ອງ ແລະ ໄດ້ຮັບການປັບປຸງເຂົ້າສູ່ລະບົບດີຂຶ້ນເລື້ອຍໆທັງປະກອບສ່ວນຢ່າງຕັ້ງໜ້າເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີຄັ້ງທີ 8 ແລະ ແຜນພັດທະນາເສດຖະກິດ-ສັງຄົມຂອງ ນວ ໂດຍສະເພາະແມ່ນການພັດທະນາພື້ນຖານໂຄງລ່າງ,ການດຶງດູດການລົງທຶນພາຍໃນ ແລະຕ່າງປະເທດ, ສ້າງວຽກເຮັດງານທຳ, ການຖ່າຍທອດເຕັກໂນໂລຊີ, ການປະຕິບັດພັນທະເຂົ້າງົບປະມານ ແລະອື່ນໆ ຊຶ່ງມາຮອດປະຈຸບັນການພັດ ທະນາເຂດເສດຖະກິດພິເສດໃນ ນວ ສາມາດດຶງດູດການລົງທຶນທັງພາຍໃນ ແລະຕ່າງປະເທດໄດ້ 132 ບໍລິສັດ, ມີທຶນຈົດທະບຽນທັງໝົດ 666 ລ້ານກວ່າ ໂດລາສະຫະລັດ, ມີແຜນການຈະລົງທຶນ ສູງເຖິງ 4,51 ພັນລ້ານໂດລາ, ມອບພັນ ທະເຂົ້າງົບປະມານໄດ້ 3,4 ລ້ານໂດລາ, ສ້າງວຽກເຮັດງານທຳໄດ້ທັງໝົົດ 3,95 ພັນຄົນ, ໃນນັ້ນແຮງງານລາວ 3,59 ພັນຄົນ ແລະຕ່າງປະເທດ 363 ຄົນ ຊຶ່ງກວມເອົາອັດຕາການຈ້າງແຮງງານພາຍໃນສູງເຖິງ 90,8%, ປະຈຸບັນເຂດເສດຖະກິດພິເສດໃນ ນວ ມີທັງໝົດ 5 ເຂດຄື: ເຂດພັດທະນາກວມ ລວມໄຊ ເສດຖາ, ບຶງທາດຫຼວງ, ລອງແທ່ງ-ວຽງ ຈັນ, ດົງໂພສີ ແລະເຂດອຸດສາຫະກຳ ວຽງຈັນ-ໂນນທອງ

  ຂໍ້ມູນຍັງໃຫ້ຮູ້ອີກວ່າ: ໃນໄລຍະຜ່ານມາເຂດເສດຖະກິດພິເສດໃນນະຄອນຫຼວງແມ່ນຂຶ້ນກັບກະຊວງແຜນການ ແລະການລົງທຶນ, ໂດຍແຕ່ລະເຂດມີການ ບໍລິຫານກັນເອງການໂຮມເຂົ້າເປັນຄະນະບໍລິຫານອັນດຽວໃນຄັ້ງນີ້ຈະຊ່ວຍອຳນວຍຄວາມສະດວກໃນການຕັດສິນໃຈ ແລະງ່າຍໃນການຄຸ້ມຄອງບໍລິຫານ.

ຂ່າວ: ພິມພອນ 

แชร์