ລັດຖະບານລາວ ມອບຫລຽນກາມິດຕະພາບໃຫ້ຮອງຜູ້ຕາງໜ້າອົງການ ອຸຍນີເຊບ ປະຈໍາລາວ

ວັນທີ 26 ກໍລະກົດ 2022 ຢູ່ກະຊວງການຕ່າງປະເທດຈັດພິທີປະດັບຫລຽນກາມິດຕະພາບໃຫ້ແກ່ທ່ານ ນາງ ບີອາເຕ ດັດສເທວ (Ms. Beate Dastel), ຮອງຜູ້ຕາງໜ້າອົງການອຸນນີເຊບ (UNICEF) ປະຈໍາ ສປປ ລາວ ທີ່ມີຜົນງານອັນພົ້ນເດັ່ນໃນການປະກອບສ່ວນໃນການຂົນຂວາຍການລະດົມທຶນຮອນ ແລະ ຊ່ວຍເຫຼືອເຕັກນິກວິຊາການໃຫ້ແກ່ ສປປ ລາວ ແລະໃນໂອກາດທີ່ທ່ານໄດ້ສິ້ນສຸດການປະຕິບັດໜ້າທີ່ ຢູ່ ສປປ ລາວ, ລັດຖະບານແຫ່ງ ສປປ ລາວ ຈຶ່ງໄດ້ຕົກລົງເຫັນດີຍ້ອງຍໍ ແລະມອບຫຼຽນກາມິດຕະພາບໃຫ້ແກ່ຜູ້ກ່ຽວຊຶ່ງຕາງໜ້າໃຫ້ລັດຖະບານ ສປປ ລາວ ມອບໂດຍ ທ່ານ ໂພໄຊ ໄຂຄໍາພິທູນ ຮອງລັດຖະມົນຕີກະຊວງການຕ່າງປະເທດ.

ທ່ານ ນາງ ບີອາເຕ ດັດສເທວ ໄດ້ຖືກແຕ່ງຕັ້ງໃຫ້ມາເປັນຮອງຜູ້ຕາງໜ້າອົງການ UNICEF ປະຈຳ ສປປ ລາວຕັ້ງແຕ່ປີ 2019 ຕະຫຼອດໄລຍະຂອງການປະຕິບັດໜ້າທີ່ ທ່ານໄດ້ປະກອບສ່ວນຢ່າງຕັ້ງໜ້າເຂົ້າໃນການເຄື່ອນໄຫວວຽກງານການຊ່ວຍເຫຼືອຂອງອົງການ UNICEF ຕໍ່ ສປປ ລາວ ກໍຄືການຊຸກຍູ້ ແລະສະໜັບສະໜູນລັດຖະບານ ສປປ ລາວ ໃນວຽກງານການພັດທະນາເດັກນ້ອຍ, ສົ່ງເສີມໂພຊະນາການເດັກ,ການປັບປຸງການສຶກສາໃນຂັ້ນອະນຸບານ, ການເສີມຂະຫຍາຍ ແລະ ປັບປຸງການໃຫ້ບໍລິການເພື່ອປ້ອງກັນການແພ່ລະບາດຂອງເຊື້ອພະຍາດຕິດແປດຕ່າງໆ, ນໍ້າສະອາດໃນເຂດຊຸມຊົນ ແລະສະຖານທີ່ການສຶກສາຕ່າງໆໃນເຂດຫ່າງໄກສອກຫຼີກ, ການຊ່ວຍເຫຼືອສຸກເສີນໃນເວລາເກີດ ແລະ ການຟື້ນຟູພາຍຫລັງໄພພິບັດໂດຍສະເພາະແມ່ນການຊຸກຍູ້ວຽກງານການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງທີ່ຕິດພັນກັບແມ່ຍິງ ແລະເດັກນ້ອຍ, ກະກຽມຄວາມພ້ອມໃນການຮັບມື ເເລະຟື້ນຕົວຈາກໂຄວິດ-19 ເຊັ່ນ: ສະໜອງອຸປະກອນທາງການແພດ, ໂພຊະນາການ ແລະສຸຂາພິບານໃຫ້ແກ່ລັດຖະບານລາວ, ຊ່ວຍລະດົມ ແລະ ປະສານງານກັບລັດຖະບານ ແລະ ສາກົນໃນການຂົນສົ່ງ ແລະ ການມອບຮັບວັກຊິນຕ້ານໂຄວິດ-19 ໃຫ້ແກ່ ສປປ ລາວ ໂດຍຜ່ານໂຄງການ COVAX. ນອກນັ້ນ, ທ່ານ ນາງ ບີອາເຕ ດັດສເທວ ຍັງໄດ້ປະກອບສ່ວນເຂົ້າໃນການສະໜັບສະໜູນແຜນງານຮ່ວມມືລະຫວ່າງ ສປປ ລາວ ແລະ ອົງການ UNICEF ໃນໄລຍະ 2017-2021 ເປັນເງິນຈໍານວນ 68 ລ້ານໂດລາສະຫະລັດ.

ປັດຈຸບັນ, ອົງການ UNICEF ກຳລັງຈັດຕັ້ງປະຕິບັດແຜນງານການຮ່ວມມືການພັດທະນາຢູ່ ສປປ ລາວ ສຳລັບສົກປີ 2022-2026 ເຊິ່ງໄດ້ສຸມໃສ່ວຽກງານສຸຂະພາບແມ່ ແລະ ເດັກ ແລະ ໂພຊະນາການ, ວຽກງານສຶກສາແຜນງານນໍ້າ ແລະ ສຸຂະອະນາໄມ, ວຽກງານປົກປ້ອງເດັກ, ວຽກງານນະໂຍບາຍ, ວາງແຜນ, ຕິດຕາມ ແລະປະເມີນຜົນ, ວຽກງານໂຄສະນາ ແລະສື່ສານມວນຊົນ.

ຂ່າວ-ພາບ: ກົມຂ່າວ ກະຊວງການຕ່າງປະເທດ

แชร์