ທ່ານ ສີຈິ້ນຜິງ ພົບປະເຈລະຈາກັບທ່ານ ໂຈໂກວີໂດໂດ ປະທານາທິບໍດີ ອິນໂດເນເຊຍ

ວິທະຍຸສາກົນແຫ່ງປະເທດຈີນ (CRI) ໄດ້ລາຍງານວ່າ: ອີງຕາມຂ່າວ ສານຊິນຮວາ, ຕອນບ່າຍວັນທີ 26 ກໍລະກົດ ທີ່ຜ່ານມາ, ທ່ານ ສີຈິ້ນຜິງ ປະທານ ປະເທດຈີນ ໄດ້ພົບປະເຈລະຈາກັບທ່ານ ໂຈໂກວີໂດໂດ ປະທານາທິບໍດີ ອິນໂດເນເຊຍ ຢູ່ໂຮງແຮມຕ້ຽວຢວີທາຍ ທີ່ນະຄອນຫລວງປັກກິ່ງ. ທ່າມກາງບັນຍາກາດໄມຕີຈິດສະໜິດສະໜົມ, ປະມຸກລັດສອງປະເທດ ໄດ້ແລກປ່ຽນຄວາມຄິດຄວາມເຫັນກ່ຽວກັບສາຍພົວພັນສອງປະເທດ ພ້ອມດ້ວຍບັນຫາສາກົນ ແລະພາກພື້ນທີ່ສອງຝ່າຍມີຄວາມສົນໃຈ ຮ່ວມກັນຢ່າງຮອບດ້ານ ແລະເລິກເຊິ່ງ, ພ້ອມທັງໄດ້ບັນລຸຄວາມເຫັນ ທີ່ເປັນເອກະພາບກັນອັນສຳຄັນຕ່າງໆ.

ໂອກາດນີ້, ທ່ານ ສີຈິ້ນຜິງ ກ່າວວ່າ: ທ່ານ ວີໂດໂດ ແມ່ນປະມຸກລັດຕ່າງປະເທດ ຜູ້ທຳອິດທີ່ຝ່າຍຈີນ ຕ້ອນຮັບພາຍຫຼັງງານກີລາໂອລິມປິກລະດູໜາວ ປັກກິ່ງ, ຊຶ່ງໄດ້ສະແດງໃຫ້ເຫັນເຖິງການໃຫ້ຄວາມສຳຄັນໃນລະດັບສູງ ຂອງສອງຝ່າຍທີ່ມີຕໍ່ການພັດທະນາສາຍພົວພັນລະຫວ່າງ ຈີນ-ອິນໂດເນເຊຍ. ໃນຊຸມປີມໍ່ໆມານີ້, ພາຍໃຕ້ການນຳພາຮ່ວມກັນ ຈາກພວກຂ້າພະເຈົ້າທັງສອງ, ສາຍພົວພັນລະຫວ່າງ ຈີນ-ອິນໂດເນເຊຍ ໄດ້ຮັບການພັດທະນາຢ່າງຟົດຟື້ນ, ທັງໄດ້ສະແດງໃຫ້ເຫັນເຖິງຄວາມ ໜຽວແໜ້ນ ແລະຄວາມມີຊີວິດຊີວາຢ່າງແຂງແຮງ. ຄວາມໄວ້ເນື້ອເຊື່ອໃຈ ກັນດ້ານຍຸດທະສາດລະຫວ່າງສອງຝ່າຍໄດ້ຮັບການປັບປຸງນັບມື້ນັບໝັ້ນຄົງກວ່າເກົ່າ, ສະພາບການຮ່ວມມືທີ່ມີ ແຮງຂັບເຄື່ອນໂດຍ 4 ດ້ານຮ່ວມກັນຄື: ການເມືອງ, ເສດຖະກິດ, ວັດທະນະທຳ ແລະ ເທິງທະເລ ໄດ້ກ້າວເຂົ້າສູ່ລວງເລິກຢ່າງຕໍ່ເນື່ອງ, ໄດ້ສະແດງໃຫ້້ເຫັນເຖິງຄວາມຮັບຜິດຊອບໃນດ້ານ ການປົກປັກຮັກສາສັນຕິພາບ ແລະສະຖຽນລະພາບຂອງພາກພື້ນ ພ້ອມດ້ວຍການຊຸກຍູ້ຄວາມສາມັກຄີ ແລະການຮ່ວມມືຂອງໂລກ, ໄດ້ສ້າງ ແບບຢ່າງທີ່ດີສຳລັບປະເທດໃຫຍ່ທີ່ກຳລັງພັດທະນາຮ່ວມກັນສ້າງຕົນເອງ ໃຫ້ເຂັ້ມແຂງ ແລະຕ່າງຝ່າຍຕ່າງໄດ້ຮັບຜົນປະໂຫຍດ. ສະພາບຄວາມ ເປັນຈິງໄດ້ຢັ້ງຢືນໃຫ້ເຫັນວ່າການພັດທະນາສາຍພົວພັນລະຫວ່າງ ຈີນ-ອິນໂດເນຊຍ ໃຫ້ດີ ຊຶ່ງບໍ່ພຽງແຕ່ສອດຄ່ອງກັບຜົນປະໂຫຍດທາງໄກ ຮ່ວມກັນລະຫວ່າງສອງປະເທດເທົ່ານັ້ນ, ຍັງໄດ້ເກີດມີຜົນສະທ້ອນຢ່າງ ຕັ້ງໜ້າ ແລະເລິກຊຶ່ງຍາວໄກຢູ່ພາກພື້ນ ແລະທົ່ວໂລກ.

ຂ້າພະເຈົ້າຍິນດີຮ່ວມກັບທ່ານ, ສືບຕໍ່ຊີ້ນຳນຳພາສາຍພົວພັນລະຫວ່າງ ຈີນ-ອິນໂດເນເຊຍ ໃຫ້ກ້າວໄປຂ້າງໜ້າຢ່າງໝັ້ນທ່ຽງ ແລະຍາວໄກຈາກ ຄວາມສູງດ້ານຍຸດທະສາດ ແລະ ແງ່ມຸມທີ່ຍາວໄກເພື່ອສ້າງຄວາມສຸກແກ່ ປະຊາຊົນສອງປະເທດໃຫ້ດີກວ່າເກົ່າ, ປະກອບສ່ວນເຂົ້າໃນສັນຕິພາບ ແລະສະຖຽນລະພາບຂອງພາກພື້ນ ແລະທົ່ວໂລກໃຫ້ຫລາຍກວ່າເກົ່າ.

ທ່ານ ໂຈໂກວີໂດໂດ ກ່າວວ່າ: ຂ້າພະເຈົ້າຂໍອວຍພອນໃຫ້ກອງປະຊຸມໃຫຍ່ ພັກກອມມູນິດຈີນ ຄັ້ງທີ 20 ຈົ່ງໄດ້ຮັບຜົນສຳເລັດຢ່າງເຕັມເມັດເຕັມ ໜ່ວຍ, ເຊື່ອໝັ້ນວ່າພາຍໃຕ້ການນຳພາຢ່າງເຂັ້ມແຂງຂອງທ່ານປະທານ ສີຈິ້ນຜິງ, ຈີນຈະໄດ້ຮັບຜົນສຳເລັດຢ່າງໃຫຍ່ກວ່າເກົ່າໃນອະນາຄົດ. ອິນໂດເນເຊຍ ຍິນດີຮ່ວມກັບຝ່າຍຈີນ, ລົງເລິກສາຍພົວພັນຄູ່ຮ່ວມ ຍຸດທະສາດຮອບດ້ານລະຫວ່າງສອງປະເທດຢ່າງບໍ່ຢຸດຢັ້ງ, ປະກອບສ່ວນ ເຂົ້າໃນສັນຕິພາບຂອງພາກພື້ນ ແລະ ການພັດທະນາຂອງໂລກໃຫ້ຫລາຍ ກວ່າເກົ່າ.

ສອງຝ່າຍໄດ້ອອກຖະແຫລງການຮ່ວມກ່ຽວກັບການພົບປະເຈລະຈາ ລະຫວ່າງປະມຸກລັດແຫ່ງສາທາລະນະລັດປະຊາຊົນຈີນ ແລະ ສາທາລະນະລັດ ອິນໂດເນເຊຍ ແລະໄດ້ລົງນາມໃນບົດບັນທຶກຄວາມເຂົ້າໃຈກ່ຽວກັບການ ຊຸກຍູ້ການຮ່ວມມືທີ່ກ່ຽວຂ້ອງກັບຂໍ້ລິເລີ່ມແລວເສດຖະກິດເສັ້ນທາງ ສາຍໄໝ ແລະເສັ້ນທາງສາຍໄໝທາງທະເລສັດຕະວັດທີ 21 ກັບໂຄງຄວາມ ຄິດຈຸດຄ້ຳຂອງທະເລທົ່ວໂລກ, ພ້ອມດ້ວຍເອກະສານການຮ່ວມມືໃນຂົງ ເຂດວັກຊີ.

ຂປລ.

 

แชร์