6 ເດືອນຕົ້ນປີ ໄຊຍະບູລີ ປະຕິບັດແຜນລາຍຮັບງົບປະມານ ໄດ້ 584,29 ຕື້ກີບ, ເທົ່າ ກັບ 51,29% ຂອງແຜນການປີ

ໃນຕອນເຊົ້າວັນທີ 25 ກໍລະກົດ 2022, ທ່ານ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ເລຂາທິການສູນກາງພັກ,ປະທານຄະນະກວດກາສູນກາງພັກ, ປະທານອົງການກວດກາແຫ່ງລັດ, ຫົວໜ້າອົງການຕ້ານການສໍ້ລາດບັງຫຼວງຂັ້ນສູນກາງພ້ອມຄະນະໄດ້ຢ້ຽມຢາມ ແລະເຮັດວຽກຢູ່, ແຂວງໄຊຍະບູລີ, ໃຫ້ການຕ້ອນຮັບໂດຍທ່ານ ພົງສະຫວັນ ສິດທະວົງ, ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງໄຊຍະບູລີ, ມີການນໍາທຸກພາກສ່ວນຂອງແຂວງ ແລະການນໍາ 11 ເມືອງທົ່ວແຂວງເຂົ້າຮ່ວມ.

ທ່ານ ພົງສະຫວັນ ສິດທະວົງ ໄດ້ລາຍງານສະພາບພົ້ນເດັ່ນໃນການນໍາພາ-ຊີ້ນໍາຈັດຕັ້ງປະຕິບັດວຽກງານໃນໄລຍະ 6 ເດືອນຕົ້ນປີ 2022 ເຊິ່ງທ່ານໄດ້ກ່າວວ່າ: ໂດຍລວມແລ້ວບັນຍາກາດການຜະລິດສະບຽງອາຫານ, ຜະລິດສິນຄ້າຂອງປະ ຊາຊົນ ຍັງສືບຕໍ່ເປັນຂະບວນການຢ່າງຕໍ່ເນື່ອງດີ, ຄາດວ່າໝົດປີເສດຖະກິດຂອງແຂວງຈະເຕີບໂຕໃນລະດັບ 4,8% - ໃນໄລຍະ 6 ເດືອນຕົ້ນປີປະຕິບັດແຜນລາຍຮັບງົບປະມານ ໄດ້ 584,29 ຕື້ກີບ, ເທົ່າກັບ 51,29% ຂອງແຜນການປີ - ມູນຄ່າສິນຄ້າສົ່ງອອກປີ 2021 ບັນລຸ 73,14 ລ້ານໂດສະຫະລັດ,-ມູນຄ່າສິນຄ້ານໍາເຂົ້າ 55,09 ລ້ານໂດລາສະຫະລັດ, ການຜະລິດໄດ້ສຸມໃສ່ຜະລິດເຂົ້າເພື່ອຄໍ້າປະກັນສະບຽງອາຫານ ແລະ ພືດເປັນສິນຄ້າ, ມາຮອດປະຈຸບັນປັກດໍາເຂົ້ານາປີສຳເລັດແລ້ວ 33,131 ກວ່າເຮັກຕາ, ເທົ່າກັບ 97%; ປູກພືດເປັນສິນຄ້າປະຕິບັດໄດ້ 106.940 ກວ່າເຮັກຕາ, ອັນພົ້ນເດັ່ນແມ່ນການປູກມັນຕົ້ນຂອງປະຊາຊົນເຊີ່ງມີເນື້ອທີ່ 55,300 ກວ່າເຮັກຕາ, ສໍາລັບວຽກງານກວດກາ ໃນໄລຍະ 1 ປີຜ່ານໄດ້ກວດກາປະເມີນຜົນສະມາຊິກພັກ, ການຈັດຕັ້ງພົບເຫັນກໍລະນີໜ່ວຍພັກ, ສະມາຊິກພັກທົ່ວແຂວງມີ 30 ກໍລະນີ, ມີ 162 ສະຫາຍ, ຍິງ 25 ສະຫາຍ ໃນນີ້ບັນຫາທີ່ເກີດຂຶ້ນຫຼາຍກວ່າໝູ່ແມ່ນປະລະໜ້າທີ່ ແລະ ພົວພັນຢາເສບຕິດ, ການແກ້ໄຂກໍລະນີຄະນະພັກ, ສະມາຊິກພັກແມ່ນໄດ້ສຶກສາອົບຮົມກ່າວເຕືອນ ແລະ ປະຕິບັດວິໄນຕາມຄວາມເໝາະສົມຄື: ເຮັດບົດບັນທືກ, ຂຽນໃບຫຼວດ ແລະ ສືກສາອົບຮົມກັບທີ່ 53 ສະຫາຍ, ເອົາອອກຈາກພັກ 50 ສະຫາຍ, ປົດຕໍາແໜ່ງພາຍໃນພັກ 5 ສະຫາຍ, ໂຈະຮ່ວມຊີວິດພັກ 9 ສະຫາຍ, ໂອກາດດັ່ງກ່າວ ທ່ານ ຄໍາພັນ ພົມມະທັດ ຍັງໄດ້ໂອ້ລົມ ແລະເນັ້ນໜັກໃຫ້ການນໍາຂອງແຂວງຈົ່ງເອົາໃຈໃສ່ຕໍ່ວຽກງານຕ້ານການສໍ້ລາດບັງຫຼວງ, ເອົາໃຈໃສ່ກວດກາວຽກງານຕ່າງໆໃຫ້ມີຄວາມເຂັ້ມແຂງ, ແກ້ໄຂບັນຫາຢາເສບຕິດ, ເອົາໃຈໃສ່ຕໍ່ວຽກງານເສດຖະກິດຂອງແຂວງເຮັດໃຫ້ມີການຂະຫຍາຍຕົວຢ່າງຕໍ່ເນື່ອງ.

แชร์