ນັກທຸລະກິດລາວຈົກທຶນ 10 ຕື້ກີບສ້າງໂຮງຮຽນ ອັກສອນສະຫວັນ

ເພື່ອເປັນການສ້າງຊັບພະຍາກອນມະນຸດໃຫ້ມີຄວາມຮູ້ພັດທະນາທັນສະໄໝ ນັກທຸລະກິດລາວເຫັນຄວາມສຳຄັນຈົກທຶນ 10 ຕື້ກີບສ້າງໂຮງຮຽນ ອັກສອນສະຫວັນ ຊຶ່ງເປັນໂຮງຮຽນແຫ່ງທຳອິດທີ່ກຳລັງກໍ່ສ້າງໃກ້ຈະສຳເລັດ ຈະເປີດການຮຽນການສອນ 3 ພາສາ ຫຼັກ ກໍຄື ພາສາລາວ, ພາສາອັງກິດ ແລະ ພາສາຈີນ ຢ່າງເປັນທາງການແລ້ວ ໃນສົກຮຽນ 2022-2023ນີ້ ໂດຍຈະຈັດຕັ້ງການຮຽນການສອນຕັ້ງແຕ່ຊັ້ນອະນຸບານ ຫາ ປະຖົມສຶກສາ ພ້ອມຈະວາງນະໂຍບາຍພິເສດໃຫ້ແກ່ຄູ ແລະ ນັກຮຽນ ທີ່ສອນດີຮຽນເກັ່ງ ແນໃສ່ສ້າງຄົນໃຫ້ມີຄຸນນະພາບ ເພື່ອເປັນຊັບພະຍາກອນທີ່ມີຄຸນຄ່າຂອງຊາດໃນອະນາຄົດ.
ທ່ານ ນາງ ວິໄລວັນ ເພັດລໍາພອນ ປະທານໂຮງຮຽນອັກສອນສະຫວັນ ໃຫ້ສໍາພາດຕໍ່ນັກຂ່າວສຶກສາ ແລະ ກິລາ ເຖິງວິໄສທັດ ແລະ ເປົ້າໝາຍໃນການກໍ່ສ້າງໂຮງຮຽນດັ່ງກ່າວ ເມື່ອວັນທີ 15 ກໍລະກົດ ຜ່ານມາ ໃຫ້ຮູ້ວ່າ: ໂຮງຮຽນອັກສອນສະຫວັນ ເປັນໂຮງຮຽນທີ່ສ້າງຂຶ້ນໃໝ່ມາແຕ່ປີ 2021 ສະຖານທີ່ຕັ້ງຢູ່ບ້ານເກົ້າລ້ຽວ ເມືອງສີໂຄດຕະບອງ ນະຄອນຫຼວງວຽງຈັນ ແລະ ຈະສຳເລັດການກໍ່ສ້າງພາຍໃນ 30 ກໍລະກົດນີ້ ໂຮງຮຽນຂອງພວກເຮົາຈະເລີ່ມເປີດການສຶກສາໃນວັນທີ 1 ສິງຫານີ້ ເລີ່ມຕົ້ນໃນຊັ້ນອານຸບານ ແລະ ໃນເດືອນກັນຍາ 2022 ກໍຈະເປີດໂຮງຮຽນປະຖົມສຶກສາ ໂດຍສະເພາະໃນຊັ້ນ ປ1 ແລະ ໂຮງຮຽນຫຼັງນີ້ ເປັນໂຮງຮຽນລາວ 100 ເປີເຊັນແຕ່ລະບົບການສຶກສາພາຍໃນຂອງພວກເຮົາແມ່ນສອນເປັນ 3 ພາສາ ຈາກອານຸບານລົງມາເຮັດເປັນ 2 ພາສາ ກໍຄື ພາສາລາວ ແລະ ພາສາອັງກິດ ແລະ ເລີ່ມຈາກ ປ1 ແມ່ນເພີ່ມພາສາຈີນ ໂດຍຈະເນັ້ນສອນເດັກນ້ອຍໃຫ້ມີຄວາມສະຫຼາດທາງດ້ານອາລົມຈິດມີວິໄນຕໍ່ຕົນເອງສູງ ແລະ ມີວິໄນຕໍ່ສັງຄົມສູງພ້ອມກັນນັ້ນ ສອນໃຫ້ເຂົາເຈົ້າມີຄວາມຄິດທີ່ກ້າຫານ ແລະ ກ້າສະແດງອອກກຽມການເຂົ້າສູ່ສາກົນ ຊຶ່ງເງື່ອນໄຂແມ່ນຈະຮັບເດັກນ້ອຍອາຍຸແຕ່ 1 ປີ 2 ເດືອນຂຶ້ນໄປ ແຕ່ລະຊັ້ນຮຽນຈະມີ 2 ຫ້ອງ ແລະ ຄາດວ່າອີກ 3 ປີຂ້າງໜ້າ ຈະສືບຕໍ່ພັດທະນາໂຮງຮຽນໃຫ້ສາມາດເປີດການຮຽນການສອນຈົນເຖິງມັດທະຍົມຕອນປາຍ. ແນວໃດກໍດີ, ໃນປັດຈຸບັນໂຮງຮຽນຂອງພວກເຮົາສາມາດຮອງຮັບນັກຮຽນໄດ້ທັງໝົດ 200 ກວ່າຄົນ ຫ້ອງໜຶ່ງສາມາດບັນຈຸນັກຮຽນຕາມມາດຕະຖານແມ່ນຈຳນວນ 20-25 ຄົນ ສຳລັບພື້ນຖານໂຄງລ່າງຂອງໂຮງຮຽນເປັນທີ່ໜ້າສະດຸດຕາ ມີການອອກແບບທີ່ສວຍງາມ ແລະ ເປັນໂຮງຮຽນລາວ ແຕ່ອອກແບບໃຫ້ໄດ້ມາດຕະຖານຄຸນະພາບຄືກັບໂຮງຮຽນນານາຊາດ ໂດຍນຳໃຊ້ງົບປະມານເປັນຈໍານວນຫຼວງຫຼາຍຕື້ກີບ ເນື່ອງຈາກຢູ່ໃນໄລຍະສະພາບເສດຖະກິດແບບນີ້ ຄ່າເງິນມີການປ່ຽນແປງ ເຮັດໃຫ້ວັດຖຸ ແລະ ອຸປະກອນໃນການກໍ່ສ້າງມີການເໜັງຕົວສູງ.

ປະທານໂຮງຮຽນອັກສອນສະຫວັນ ໄດ້ກ່າວເຖິງແນວຄວາມຄິດໃນການສ້າງໂຮງຮຽນແຫ່ງນີ້ຂຶ້ນມາອີກວ່າ: ນອກຈາກຫຼັກສູດພາຍໃນໂຮງຮຽນແລ້ວ ກໍຍັງມີຫຼັກສູດສາທິດທີ່ສອນໃຫ້ເດັກນ້ອຍໄດ້ຮຽນຮູ້ວິຖີຊີວິດຂອງຄົນລາວເຮົາ ໄດ້ຮຽນຮູ້ການປູກຝັງ ແລະ ລ້ຽງສັດ ແລະ ການເຮັດນາ ໃນເທດສະການເຮັດນາ ຈະໄດ້ພາເດັກນ້ອຍຮຽນຮູ້ ແລະ ເຮັດກະສິກຳເພື່ອຊ່ວຍເຫຼືອພໍ່ແມ່ໄປໃນຕົວເລີຍ ໂດຍພວກເຮົາມີສູນຮຽນຮູ້ຂອງເຮົາເອງ ທັງນີ້ ທັງນັ້ນ ກໍເພື່ອເປັນການຈັດຕັ້ງປະຕິບັດໃຫ້ໄປຕາມ 3 ລັກສະນະ ແລະ 5 ຫຼັກມູນການສຶກສາ. ແນວໃດກໍຕາມ, ເພື່ອເຮັດໃຫ້ການຮຽນການສອນມີຄຸນນະພາບ ເປັນໄປຕາມເປົ້າໝາຍ ສ້າງຄົນໃຫ້ມີຄຸນນະພາບ ເພື່ອເປັນຊັບພະຍາກອນທີ່ມີຄຸນຄ່າຂອງຊາດໃນອະນາຄົດນັ້ນ; ທາງໂຮງຮຽນຍັງໄດ້ໃຫ້ຄວາມສໍາຄັນແກ່ການຄັດເລືອກຄູທີ່ຈະສອນຕ້ອງມີເງື່ອນໄຂທີ່ຄົບຖ້ວນ ແລະ ຈົບຈາກຄູຢ່າງແທ້ຈິງມີຄວາມຮູ້ຄວາມສາມາດທີ່ຖືກຕ້ອງຕາມເງື່ອນໄຂຕົວຈິງ ເພື່ອຈະສອນໃຫ້ລູກຫຼານໄປຕາມຫຼັກສູດທີ່ກຳນົດໄວ້ແລ້ວ ກໍຍັງຈະພາລູກຫຼານເຄື່ອນໄຫວກິດຈະກຳນອກຫຼັກສູດ ກໍຄື ອອກໄປທັດສະນະສຶກສາ ເພື່ອສ້າງໃຫ້ເຂົາເຈົ້າມີຄວາມຄິດເປັນຕົວຂອງຕົວເອງ ແລະ ຄູຈະເປັນຜູ້ຊີ້ທາງວ່າມີຈຸດໄດ້ຈຸດເສຍແນວໃດ ສາມາດເຮັດໃຫ້ເຂົາເຈົ້າມີຄວາມຄິດເຫັນ ເພື່ອສົ່ງເສີມສັກກະຍະພາບຂອງຄູ ແລະ ນັກຮຽນໃຫ້ມີປະສິດທິພາບ ແລະ ປະສິດທິຜົນ ພິເສດສຸດໆທາງໂຮງຮຽນພວກເຮົາກໍຍັງມີນະໂຍບາຍໃຫ້ຄູ ແລະ ນັກຮຽນ ຖ້າຫາກວ່າຮຽນດີຮຽນເກັ່ງ ເໝືອນກັບຄູກໍເຊັນກັນເມື່ອສອນດີສອນເກັ່ງ ກໍສົມຄວນໄດ້ຮັບນະໂຍບາຍທີ່ດີເໝືອນກັນ

ເຖິງຢ່າງໃດກໍຕາມ ໂຮງຮຽນອັກສອນສະຫວັນ ຄົງຈະເປັນອີກທາງເລືອກໜຶ່ງໃຫ້ແກ່ພໍ່ແມ່ຜູ້ປົກຄອງ ຕັດສິນໃຈເອົາລູກເອົາຫຼານໄປສຶກສາຮໍ່າຮຽນຢູ່ສະຖານການສຶກສາແຫ່ງນີ້ ເວົ້າລວມເວົ້າສະເພາະ ແມ່ນຜູ້ປົກຄອງທີ່ຢູເຂດເມືອງສີໂຄດ ນະຄອນຫຼວງວຽງຈັນ ກໍຄືບ້ານໃກ້ຄຽງ ຂໍໃຫ້ພິຈາລະນາເປັນສ້ອຍໃຫ້ເລືອກ ຫາກວ່າມັກແນວທາງຂອງໂຮງຮຽນພວກເຮົາກໍສາມາດພາລູກຫຼານມາເຂົ້າຮຽນໄດ້ ແລະ ເນື່ອງໃນໂອກາດທີ່ຈະເປີດການຮຽນການສອນໃນສົກຮຽນໃໝ່ 2022 ຫາ 2023 ນີ້ ທາງໂຮງຮຽນ ກໍຈະມີນະໂຍບາຍກ່ຽວກັບຄ່າຮຽນຂອງນ້ອງນັກຮຽນແບບພິເສດອີກດ້ວຍ ສຳລັບເບີຕິດຕໍ່ ສາມາດຕິດຕໍ່ໄດ້ທີ່ເບີໂທ 02022222329.

แชร์