144 ຄົນ ຮ່ວມສອບເສັງນັກຮຽນເກັ່ງຊັ້ນມັດທະຍົມສຶກສາລະດັບຊາດ

 ການສອບເສັງນັກຮຽນເກັ່ງຊັ້ນມັດທະຍົມສຶກສາລະດັບຊາດໄຂຂຶ້ນຢ່າງເປັນທາງການໃນວັນທີ 26 ມີນາຜ່ານມາທີ່ສະໂມສອນມະຫາວິທະຍາໄລແຫ່ງຊາດໂດຍໃຫ້ກຽດເຂົ້າຮ່ວມຂອງທ່ານ ນາງ ແສງເດືອນ ຫຼ້າຈັນທະບູນ ລັດຖະມົນຕີກະຊວງສຶກສາທິການ ແລະກີລາທ່ານນາງ ສີສຸກ ວົງວິຈິດ ຫົວໜ້າກົມສາມັນສຶກສາກະຊວງສຶກສາທິການ ແລະ ກີລາ, ພ້ອມດ້ວຍບັນດາຫົວໜ້າກົມ-ຮອງ ຫົວໜ້າກົມ, ຫ້ອງການ, ສະຖາບັນ, ສູນ, ມະຫາວິທະຍາໄລແຫ່ງຊາດ ແລະ ພະນັກ ງານ, ຄູອາຈານຈາກບັນດາພາກສ່ວນຕ່າງໆ ແລະນັກຮຽນເຂົ້າຮ່ວມ.

  ທ່ານ ນາງ ສີສຸກ ວົງວິຈິດ ໄດ້ລາຍງານໃຫ້ຮູ້ວ່າ: ໃນແຕ່ລະສົກຮຽນ, ກົມສາມັນສຶກສາກະຊວງສຶກສາທິການ ແລະ ກີລາໄດ້ຈັດໃຫ້ມີການສອບເສັງແຂ່ງຂັນ ນັກຮຽນເກັ່ງຊັ້ນມັດທະຍົມສຶກສາລະດັບຊາດຂຶ້ນຊຶ່ງເປັນໜຶ່ງໃນກິດຈະກໍາບຸລິມະສິດທີ່ມີຄວາມສໍາຄັນປະຈໍາສົກຮຽນໃນແຕ່ລະປີ. ສໍາລັບຂັນ ມ4 ໄດ້ຈັດສອບ ເສັງເປັນປີທີ 10 ແລະ ມ7 ເປັນປີທີ 9 ໂດຍມີຈຸດປະສົງລະດັບຄາດໝາຍເພື່ອສົ່ງເສີມ ແລະຊຸກຍູ້ຂະບວນການສອນດີ-ຮຽນເກັ່ງຢູ່ໃນໂຮງຮຽນມັດທະຍົມໃນຂອບເຂດທົ່ວປະເທດໃຫ້ມີບັນຍາກາດຟົດຟື້ນມີລັກສະນະແຂ່ງຂັນ ແລະ ມີຄຸນນະພາບ, ສ້າງໂອກາດໃຫ້ນັກຮຽນໄດ້ສະແດງອອກດ້ານຄວາມຮູ້-ຄວາມສາມາ ດ, ພອນສະຫວັນ ແລະຫົວຄິດປະຄິດສ້າງຂອງຕົນເອງ. ພ້ອມດຽວກັນ, ຍັງເປັນການວັດ ແລະປະເມີນຜົນສໍາເລັດດ້ານການສິດສອນ, ຮໍ່າຮຽນຂອງຄູ ແລະນັກຮຽນ, ຄັດເລືອກ ແລະ ສົ່ງເສີມນັກຮຽນເກັ່ງທີ່ມີພອນສະຫວັນໃນແຕ່ລະວິຊາເປັນຕົວແທນຂອງຊາດເຂົ້າຮ່ວມແຂ່ງຂັນໃນລະດັບພາກພື້ນ ແລະ ສາກົນ ແລະຍັງເປັນການສ້າງໂອກາດໃຫ້ຄູນໍາພາ ແລະນັກສອບເສັງຈາກທົ່ວປະເທດໄດ້ແລກປ່ຽນ ແລະຖອດຖອນບົດຮຽນຮ່ວມກັນ. ນອກຈາກນັ້ນ, ຍັງຈະມີການ ຍ້ອງຍໍນັກຮຽນເກັ່ງ ແລະໃຫ້ໂອກາດແກ່ຜູ້ທີ່ສອບເສັງໄດ້ຊະນະເລີດອັນດັບທີ 1, 2 ແລະ 3 ແຕ່ລະວິຊາໄດ້ຮັບທຶນການສຶກສາເພື່ອຮຽນຕໍ່ໃນວິຊາທີ່ຕົນເອງມັກທັງພາຍໃນ ແລະຕ່າງປະເທດ.

  ສ່ວນການສອບເສັງນັກຮຽນເກັ່ງລະດັບຊາດຊັ້ນມັດທະຍົມສຶກສາໃນສົກຮຽນ 2018-2019, ທາງກົມສາມັນສຶກສາໄດ້ປະຕິບັດຕາມຮູບແບບ, ວິທີການ ແລະ ມາດຕະຖານຄື: ດ້ານວິຊາການໄດ້ເຊີນຄູສອນຕົວຈິງ ແລະນັກວິຊາການທີ່ມີປະສົບການທັງສາຍສາມັນ ແລະມະຫາວິທະຍາໄລອອກຂໍ້ສອບເສັງເພື່ອສ້າງເປັນຄັງຂໍ້ສອບເສັງສໍາລັບນັກຮຽນເກັ່ງໃນ 4 ວິຊາທັງ ມ4  ແລະ ມ7 ໄດ້ຈໍານວນໜຶ່ງເພື່ອເປັນຂໍ້ມູນໃນການຄັດເລືອກຂໍ້ສອບເສັງ. ສໍາລັບມາດຕະຖານການຕັດສິນຜົນການສອບເສັງໄດ້ກໍານົດຄະແນນໃນວິຊາສອບເສັງແມ່ນຕ້ອງໄດ້ຄະແນນ 7 ຂຶ້ນໄປຈຶ່ງຈະຖືກຮັບຮອງເປັນນັກຮຽນເກັ່ງລະດັບຊາດຊຶ່ງການສອບເສັງ ໃນແຕ່ລະວິຊາ ໃຊ້ເວລາ 120 ນາທີ, ສອບເສັງໃນ 4 ວິຊາຄື: ຄະນິດສາດ: ພາສາລາວ-ວັນນະຄະດີ, ຟີຊິກສາດ ແລະ ເຄມີສາດ. ສ່ວນປະເພດລາງວັນການສອບເສັງໄດ້ຈັດໃຫ້ມີລາງວັນທີ 1, 2, 3 ແລະລາງວັນຊົມເຊີຍໃນແຕ່ລະວິຊາ. ນອກຈາກໄດ້ຮັບໃບຢັ້ງຢືນ, ໃບຍ້ອງຍໍ ແລະທຶນການສຶກສາແລ້ວຍັງຈະໄດ້ຮັບຫຼຽນນັກຮຽນເກັ່ງອີກດ້ວຍ.

  ສໍາລັບສົກຮຽນ 2018-2019 ມີນັກຮຽນເກັ່ງເຂົ້າຮ່ວມການສອບເສັງທັງໝົດ 144 ຄົນ, ຍິງ 55 ຄົນ ຊຶ່ງກວມເອົາຫຼາຍເຜົ່າຄື: ເຜົ່າລາວ ມີ 69 ຄົນ, ມົ້ງ ມີ 50 ຄົນ, ກຶມມຸ 6 ຄົນ, ກະລ່ຽງ ມີ 6 ຄົນ, ພູນ້ອຍ ມີ 2 ຄົນ, ຢ້າວ ມີ 2 ຄົນ, ລື້ ມີ 3 ຄົນ, ອາຄ່າ ມີ 2 ຄົນ, ແຢະ ມີ 1 ຄົນ, ໂອ້ຍ ມີ 2 ຄົນ ແລະຍວນ 1 ຄົນ. ໃນນັ້ນ, ມ4 ມີນັກສອບເສັງທັງໝົດ 72 ຄົນ, ຍິງ 32 ຄົນ. ສ່ວນ ມ7 ມີນັກສອບເສັງທັງໝົດ 72 ຄົນ, ຍິງ 23 ຄົນ. ສ່ວນການສອບເສັງແມ່ນຈະໄດ້ດໍາເນີນໄປຈົນເຖິງວັນທີ 29 ເປັນມື້ປະກາດຜົນການສອບເສັງ.

ນສພ ເສດຖະກິດ-ສັງຄົມ

แชร์