6 ເດືອນ ນໍ້າປະປາອັດຕະປື ຜະລິດນໍ້າໄດ້ 255.740 ແມັດກ້ອນ

    ອີງຕາມບົດລາຍງານການສະຫຼຸບຕີລາຄາຄືນວຽກງານການເຄື່ອນໄຫວຂອງລັດວິສາຫະກິດນໍ້າປະປາແຂວງອັດຕະປື ປະຈໍາ 6 ເດືອນຕົ້ນປີ 2022 ໄດ້ຈັດຂຶ້ນໃນວັນທີ 21 ກໍລະກົດນີ້ ຊຶ່ງມີທ່ານ ທະນູໄຊ ບັນຊາລິດ ຮອງເຈົ້າແຂວງອັດຕະປື, ມີພະແນກ ຍທຂ ແຂວງ, ລັດວິສາຫະກິດນໍ້າປະປາແຂວງ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

    ທ່ານ ແກ້ວວິຊຽນ ສີຊານົນ ຜູ້ອໍານວຍການ ລັດວິສາຫະກິດ ນໍ້າປະປາ ແຂວງອັດຕະປື ໄດ້ຍົກໃຫ້ເຫັນຜົນສໍາເລັດຂອງການເຄື່ອນໄຫວທຸລະກິດນໍ້າປະປາ ປະຈໍາ 6 ເດືອນຕົ້ນປີ 2022 ແລະ ວາງທິດທາງແຜນການ 6 ເດືອນທ້າຍປີ ຊຶ່ງໃນ 6 ເດືອນຕົ້ນປີ 2022 ສາມາດຜະລິດນໍ້າໄດ້ທັງໝົດ 255.740 ແມັດກ້ອນ, ໃນນັ້ນຈໍາໜ່າຍນໍ້າໄດ້ 217.921 ແມັດກ້ອນ, ນໍ້າສູນເສຍ 37.819 ແມັດກ້ອນ ເທົ່າກັບ 15%. ສັງລວມດ້ານລາຍຮັບທັງໝົດ 1.014.487.155 ກີບ, ໃນນັ້ນຮັບຈາກການຜະລິດຕົ້ນຕໍ (ຂາຍນໍ້າ) ໄດ້ 937.412.984 ກີບ, ຮັບຈາກຜະ ລິດສໍາຮອງ 77.074.171 ກີບ. ດ້ານລາຍຈ່າຍທັງໝົດ 2.341.754.644 ກີບ. ຈ່າຍຕົ້ນຕໍ (ກ່ຽວກັບນໍ້າ) 2.328.777.168 ກີບ, ຄ່າໃຊ້ຈ່າຍຜະລິດສໍາຮອງ 12.977.476 ກີບ, ດ້ານໜີ້ຕ້ອງຮັບເກັບໄດ້ທັງໝົດຄ່ານໍ້າ 1.060.181.247 ກີບ, ໃນນັ້ນຄ່ານໍ້າ-ຄ່າກົງເຕີ 1.031.861.693 ກີບ, ຄ່າຕິດຕັ້ງ 27.115.641 ກີບ, ເປີດນໍ້າ 1.203.913 ກີບ, ດ້ານໜີ້ຕ້ອງສົ່ງລວມທັງໝົດ 187.883.980 ກີບ, ພ້ອມດຽວກັນນີ້ຍັງໄດ້ປະກອບສ່ວນມອບພັນທະເຂົ້າງົບປະມານປະຈໍາ 6 ເດືອນຕົ້ນປີ 2022 ລວມທັງໝົດ 70.483.974 ກີບ.

    ໃນວາລະກອງປະຊຸມ ຜູ້ເຂົ້າຮ່ວມຍັງໄດ້ຮັບຟັງການລາຍງານຄວາມຄືບໜ້າຂອງໂຄງການກໍ່ສ້າງນໍ້າປະປາຂອງກອງທຶນ ADB, ລາຍງານຄວາມຄືບໜ້າການລົງຊີ້ນໍາວຽກງານຂອງຄະນະປັບປຸງລັດວິສາຫະກິດນໍ້າປະປາ ພ້ອມດຽວກັນນີ້, ຜູ້ເຂົ້າຮ່ວມຍັງໄດ້ປະກອບຄໍາເຫັນເພື່ອເສີມຂະຫຍາຍຈຸດດີ, ແກ້ໄຂຈຸດຄົງຄ້າງໃນໄລຍະຜ່ານມາ ກໍຄືບົດຮຽນທີ່ຖອດຖອນໄດ້ເພື່ອເປັນບ່ອນອີງໃນການຈັດຕັ້ງປະຕິບັດແຜນການເຄື່ອນໄຫວໃນ 6 ເດືອນທ້າຍປີໃຫ້ ວ່ອງໄວຂຶ້ນຕື່ມ ແລະ ຮັບປະກັນຫາງສຽງຈົ່ມວ່າຂອງສັງຄົມ.

    ໂອກາດນີ້, ທ່ານ ທະນູໄຊ ບັນຊາລິດ ໄດ້ເນັ້ນຫຼາຍບັນຫາສໍາຄັນຕໍ່ກັບການເຄື່ອນໄຫວທຸລະກິດຂອງລັດວິສາຫະກິດນໍ້າປະປາແຂວງ ໂດຍສະເພາະແຜນການ 6 ເດືອນທ້າຍປີຕໍ່ໜ້ານີ້ ແມ່ນໃຫ້ເອົາໃຈໃສ່ໃນການຜະລິດ ແລະ ສະໜອງນໍ້າປະປາໃຫ້ປະຊາຊົນໄດ້ຢ່າງປົກກະຕິ, ໃຫ້ມີການຄຸ້ມຄອງ, ກວດກາດ້ານເຕັກນິກວິຊາສະເພາະ, ຮັບປະກັນບໍ່ໃຫ້ມີການຜະລິດແບບຂາດໆເຂີນໆ, ກວດການໍ້າຮົ່ວ-ທໍ່ແຕກຫັກ, ຕິດຕາມນໍ້າຂຶ້ນ-ນໍ້າລົງ, ການເຄື່ອນຍ້າຍບັກ, ປັບປຸງແກ້ໄຂລະບົບການບໍລິຫານໃຫ້ເປັນລະບົບ, ເຮັດວຽກຖືກຕາມຫຼັກວິຊາການ, ການເກັບກູ້ໜີ້ສິນ, ການແກ້ໄຂລະບົບເງິນເດືອນພະນັກງານ ແລະ ບັນຫາອື່ນໆ ທີ່ຍັງບໍ່ທັນຮັບການແກ້ໄຂ ຕ້ອງຮີບຮ້ອນເອົາໃຈໃສ່ເຮັດຢ່າງຈິງຈັງ ແລະ ປະສານສົມທົບຢ່າງກົມກຽວກັບສະພາບໍລິຫານພະແນກໂຍທາທິການ ແລະ ຂົນສົ່ງແຂວງ ເພື່ອຮ່ວມກັນແກ້ໄຂໃຫ້ໄດ້ຮັບຜົນດີເທື່ອລະກ້າວ.

ຂ່າວ-ພາບ: ຊິບປະໄຊ

แชร์