ກອງປະຊຸມວິຊາການ ຍທຂ ຍົກ 5 ບັນຫາຂື້ນຫາລື

   ເພື່ອແນໃສ່ການກຽມຄວາມພ້ອມທາງດ້ານເນື້ອໃນໃຫ້ກັບກອງປະຊຸມໂຍທາທິການ ແລະ ຂົນສົ່ງ (ຍທຂ) ທົ່ວປະເທດທີ່ຈະຈັດຂຶ້ນໃນວັນທີ 28-29 ມີນານີ້, ດັ່ງນັ້ນໃນວັນທີ 26-27 ມີນາ 2019 ກະຊວງ ຍທຂ ຈຶ່ງໄດ້ຈັດກອງປະຊຸມວິຊາການຂະແໜງໂຍທາທິການ ແລະ ຂົນສົ່ງຂຶ້ນເພື່ອປຶກສາຫາລືຮ່ວມກັບບັນດາກະຊວງ, ອົງການ ແລະສະມາຄົມທີ່ກ່ຽວຂ້ອງ, ໂດຍໃນກອງປະຊຸມດັ່ງກ່າວໄດ້ຍົກເອົາ 5 ບັນຫາທີ່ພວມພົ້ນເດັ່ນຂຶ້ນຫາລື, ພາຍໃຕ້ການເປັນປະທານຂອງທ່ານ ບຸນຈັນ ສິນທະວົງ ລັດຖະມົນຕີກະຊວງ ຍທຂ.

ທ່ານ ບຸນຈັນ ສິນທະວົງ ກ່າວວ່າ: ເພື່ອເຮັດໃຫ້ກອງປະຊຸມວຽກງານໂຍທາທິການ ແລະຂົນສົ່ງທົ່ວປະເທດປະຈຳປີ 2018 ມີເນື້ອໃນທີ່ສົມບູນຄົບຖ້ວນ ແລະເລິກເຊິ່ງ, ກະຊວງຈຶ່ງໄດ້ຈັດກອງປະຊຸມສຳມະນາດ້ານວິຊາການຂຶ້ນເພື່ອປຶກສາຫາລືກັນເປັນແຕ່ລະຫົວຂໍ້ ແລະກຸ່ມວຽກ, ພ້ອມທັງປຶກສາຫາລືກ່ຽວກັບແຜນງົບປະມານການລົງທຶນຂອງລັດຂອງກະຊວງ ຍທຂ ແລະແຜນງົບປະມານກອງທຶນທາງປະຈຳປີ 2019 ບົດແນະນຳການຈັດຕັ້ງປະຕິບັດ ແລະຄວາມຄືບໜ້າຂອງການແກ້ໄຂ 19 ບັນຫາຂອງຂະແໜງ ຍທຂ ທີ່ໄດ້ຍົກຂຶ້ນໃນກອງປະຊຸມວຽກງານ ຍທຂ ປີ 2016 ທີ່ຜ່ານມາ, ທັງນີ້ກໍເພື່ອເປັນການສັງລວມເອົາມາດຕະການແກ້ໄຂທີ່ເປັນເອກະພາບກັນໄປສະເໜີຕໍ່ກອງປະຊຸມວຽກງານ ຍທຂ ທົ່ວປະເທດໃນວັນທີ 28-29 ມີນາ 2019 ໃຫ້ພິຈາລະນາຮັບຮອງເອົາ ແລະນຳໄປຈັດຕັ້ງປະຕິບັດໃຫ້ເປັນຮູບປະທຳໃນສົກປີ 2019 ຕໍ່ໄປ.

  ທ່ານ ບຸນຈັນ ສິນທະວົງ ກ່າວຕື່ມວ່າ: ກອງປະຊຸມວິຊາການຄັ້ງນີ້ແມ່ນມີຄວາມໝາຍສຳຄັນຫຼາຍ ແລະຈະດຳເນີນເປັນເວລາ 2 ວັນ (26-27 ມີນາ) ຊຶ່ງ ໄດ້ແບ່ງການຄົ້ນຄວ້າອອກເປັນ 5 ຫົວ ຂໍ້ທີ່ພົ້ນເດັ່ນ ແລະຈະຕ້ອງໄດ້ສືບຕໍ່ແກ້ໄຂໂດຍໄວໃນປີ 2019 ເປັນຕົ້ນແມ່ນການຍົກສູງຄຸນນະພາບ, ປະສິດທິພາບ ແລະ ມາດຕະຖານເຕັກນິກການກໍ່ສ້າງ-ສ້ອມ ແປງຂົວທາງ; ວຽກງານການຄຸ້ມຄອງການຂົນສົ່ງທາງບົກ ແລະຄວາມຈຳເປັນພາວະສິໄສກ່ຽວກັບການສ້າງຕັ້ງເຈົ້າໜ້າທີ່ຂົນສົ່ງທາງບົກ ແລະເຈົ້າໜ້າທີ່ກວດກາ ຍທຂ ການປະຕິບັດເຂັ້ມງວດດ້ວຍວິໄນແຜນການ-ວິໄນການເງິນ; ວຽກງານເຊື່ອມໂຍງ-ເຊື່ອມຈອດກັບພາກພື້ນ ແລະ ສາກົນພາຍໃຕ້ 2 ເງື່ອນໄຂ ແລະການແບ່ງວຽກ, ຄວາມຮັບຜິດຊອບລະຫວ່າງສູນກາງ ແລະທ້ອງຖິ່ນຕາມທິດສາມສ້າງ, ສະນັ້ນເພື່ອເຮັດໃຫ້ກອງປະຊຸມວິຊາການຄັ້ງນີ້ໄດ້ຮັບຜົນສຳເລັດຕາມຄາດໝາຍ, ຈຶ່ງຢາກຮຽກຮ້ອງມາຍັງທຸກພາກສ່ວນທີ່ເຂົ້າຮ່ວມກອງປະຊຸມຈົ່ງມີຄວາມຮັບຜິດຊອບສູງຕໍ່ໜ້ າທີ່ ແລະຄວາມຮັບຜິດຊອບການເມືອງຂອງຕົນ,ພະຍາຍາມຍົກໃຫ້ເຫັນບັນຫາທີ່ເກີດຂຶ້ນດ້ານດີ, ດ້ານອ່ອນ, ຂໍ້ຄົງຄ້າງຕໍ່ບັນດາເນື້ອໃນຕ່າງໆໃນກອງປະຊຸມ ແລະເພື່ອເຮັດໃຫ້ກອງປະຊຸມເຫັນໄດ້ຈຸດອ່ອນທີ່ຄົງຄ້າງ, ຈະໄດ້ຄົ້ນຄວ້າແກ້ໄຂໃນຕໍ່ໜ້າ ແລະໃຫ້ເກີດໝາກຜົນຕໍ່ໄປໃນຂະແໜງ ຍທຂ.

ຂ່າວ: ພິມພອນ 

แชร์