ສະເຫຼີມສະຫຼອງວັນປະຊາກອນໂລກ ຄົບຮອບ 33 ປີ

ກະຊວງແຜນການ ແລະການລົງທຶນຮ່ວມກັບອົງການສະຫະປະຊາຊາດກອງທຶນສຳລັບປະຊາກອນ ປະຈໍາລາວ (UNFPA) ຈັດພິທີສະເຫຼີມສະຫຼອງວັນປະຊາກອນໂລກ ຄົບຮອບ 33 ປີ ປະຈຳປີ 2022 ໃນວັນທີ 19 ກໍລະກົດ 2022 ພາຍໃຕ້ຫົວຂໍ້ “ຫົນທາງສູ່ຄວາມໝັ້ນຄົງດ້ານປະຊາກອນ: ສະໜັບສະໜູນສິດທິ ແລະທາງເລືອກສຳລັບທຸກຄົນ” ໂດຍມີ ທ່ານ ນາງ ຫລິງທອງ ແສງຕາວັນ ຮອງເຈົ້າແຂວງສະຫວັນນະເຂດ, ທ່ານ ນາງ ມາຣຽນ ເອຄານ ຜູ້ຕາງໜ້າອົງການສະຫະປະຊາຊາດ ກອງທຶນສຳລັບປະຊາກອນ ປະຈຳ ສປປ ລາວ ພ້ອມດ້ວຍພາກສ່ວນກ່ຽວຂ້ອງເຂົ້າຮ່ວມ.

ໃນພິທີ ທ່ານ ສະຖາບັນດິດ ອິນສີສຽງໃໝ່ ຮອງລັດຖະມົນຕີກະຊວງແຜນການ ແລະການລົງທຶນ ໄດ້ກ່າວວ່າ: ໃນປີນີ້ເປັນປີທີມີຄວາມໝາຍ ແລະຄວາມສໍາຄັນເນື່ອງຈາກວ່າ ສປປ ລາວ ກໍາລັງຫັນປ່ຽນ ແລະ ສ້າງຄວາມສາມາດ ໃນການແກ້ບັນຫາຕ່າງໆ ທີ່ໄດ້ຮັບຜົນກະທົບຢ່າງໃຫຍ່ຫລວງ ທີ່ບໍ່ເຄີຍມີມາໃນຫລາຍທົດສະວັດເຊິ່ງໄດ້ສົ່ງຜົນກະທົບຢ່າງໜັກໜ່ວງຈາກການແພ່ລະບາດພະຍາດໂຄວິດ-19 ບໍ່ວ່າຈະເປັນທາງດ້ານເສດຖະກິດ ແລະສັງຄົມໃນນັ້ນ, ແມ່ຍິງ, ເດັກຍິງ ແລະໄວໜຸ່ມແມ່ນກຸ່ມທີ່ຍັງມີຄວາມສ່ຽງສູງ ແລະອ່ອນແອໃນສັງຄົມໂດຍສະເພາະຢູ່ເຂດຊົນນະບົດ ແລະຫ່າງໄກແມ່ນໄດ້ຮັບຜົນກະທົບຫລາຍເຊິ່ງການສົ່ງເສີມໃຫ້ທຸກຄົນມີສິດທິ ແລະທາງເລືອກທີ່ດີ ໃນການດຳລົງຊີວິດ ແມ່ນຄວາມຮັບຜິດຊອບຂອງຄອບຄົວ ກໍຄື ພໍ່ແມ່ຜູ້ປົກຄອງ, ຊຸມຊົນ, ອົງການຈັດຕັ້ງທຸກຂັ້ນ, ໄວໜຸ່ມລວມທັງທຸກຄົນໃນສັງຄົມ. ສະນັ້ນ, ພວກເຮົາຕ້ອງພ້ອມກັນສົ່ງເສີມ ແລະສະໜັບສະໜູນການຈັດຕັ້ງປະຕິບັດການສົ່ງເສີ່ມສິດທິດັ່ງກ່າວເພື່ອໃຫ້ແມ່ ຍິງ, ເດັກນ້ອຍ, ໄວໜຸ່ມ ແລະ ຜູ້ດ້ອຍໂອກາດໃນແຂວງສະຫວັນນະເຂດກໍຄື ສປປ ລາວ ໄດ້ມີສິດທິໃນການດໍາລົງຊີວິດທີ່ດີຂຶ້ນ, ຫລຸດຜ່ອນຄວາມສ່ຽງທີ່ສົ່ງຜົນກະທົບທາງລົບຕໍ່ທຸກຄົນ, ສ້າງແຮງບັນດານໃຈໃຫ້ເຂົາເຈົ້າ ໃນການພັດທະນາຕົນເອງດ້ວຍທຸກວິທີທາງໂດຍສະເພາະແມ່ນການສະໜອງຂໍ້ມູນຂ່າວສານທີ່ເປັນປະໂຫຍດ, ຖືກຕ້ອງ ແລະ ທັນການ, ການໃຫ້ບໍລິການທາງດ້ານສຸຂະພາບຈະເລີນພັນ ແລະຄວາມຮູ້ທາງດ້ານເພດສຶກສາທີ່ເໝາະສົມຕາມກຸ່ມອາຍຸເພື່ອເຮັດໃຫ້ມີການປ່ຽນແປງທີ່ດີຂຶ້ນ ແລະ ເພື່ອເປັນການຊຸກຍູ້ໃຫ້ເຂົາເຈົ້າສາມາດປະກອບສ່ວນຢ່າງແຂງແຮງເຂົ້າໃນການພັດທະນາຕົນເອງ, ຄອບຄົວ ແລະ ຊຸມຊົນ, ນັ້ນແມ່ນການປະກອບສ່ວນເຂົ້າໃນການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຂອງແຂວງກໍຄືແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX ໃຫ້ເຕີບໂຕຢ່າງຕໍ່ເນື່ອງ, ໝັ້ນທ່ຽງ ແລະຍືນຍົງຕາມທິດສີຂຽວ.

ຕາມບົດລາຍງາຍສະຖານະພາບປະຊາກອນໂລກ 2022 ສະແດງໃຫ້ເຫັນເຖິງຜົນກະທົບດ້ານສຸຂະພາບຈະເລີນພັນໂດຍສະເພາະຕໍ່ແມ່ຍິງ ແລະໄວໜຸ່ມທີ່ບໍ່ສາມາດເຂົ້າເຖິງຂໍ້ມູນຂ່າວສານ ແລະການບໍລິການທາງດ້ານສຸະພາບຈະເລີນ ແລະການວາງແຜນຄອບຄົວໃນໄລຍະການລະບາດຂອງໂຄວິດ-19 ເຮັດໃຫ້ມີບັນຫາ ແລະ ອັດຕາການຖືພາທີ່ບໍ່ຕັ້ງໃຈທີ່ສູງຂຶ້ນໃນທົ່ວໂລກກໍຄືໃນ ສປປ ລາວ ເຊິ່ງຈະນຳໄປສູ່ການເອົາລູກອອກທີ່ບໍ່ປອດໄພ ແລະບັນຫາສຸຂະພາບຂອງແມ່ ແລະ ເດັກນ້ອຍທີ່ຕາມມາເຊິ່ງການຖືພາທີ່ບໍ່ຕັ້ງໃຈແມ່ນມີເຖິງ 61% ແມ່ນຈະຢຸດຕິການຖືພາດ້ວຍການເອົາລູກອອກ, ນັ້ນແມ່ນບັນຫາທີ່ສຳຄັນໜຶ່ງທີ່ຕ້ອງໄດ້ເອົາໃຈໃສ່ແກ່ໄຂຢ່າງຮີບດ່ວນເຊິ່ງເປັນສິ່ງທ້າທາຍທີ່ຈະຕ້ອງຮ່ວມແຮງຮ່ວມໃຈຂ້າມຜ່ານເພື່ອໃຫ້ບັນລຸການຈັດຕັ້ງປະຕິບັດແຜນດໍາເນີນງານວ່າດ້ວຍປະຊາກອນ ແລະ ການພັດທະນາ (ICPD) ແລະ ວາລະການພັດທະນາແບບຍືນຍົງ ຮອດປີ 2030 ໂດຍສະເພາະ 3 ເປົ້າໝາຍຂອງການປ່ຽນແປງທີ່ສໍາຄັນ ຄື: ຢຸດຕິການຕາຍຂອງແມ່, ຢຸດຕິຄວາມຕ້ອງການໃນການ ວາງແຜນຄອບຄົວທີ່ບໍ່ໄດ້ຕອບສະໜອງ ແລະລຶບລ້າງຄວາມຮຸນແຮງໂດຍອີງໃສ່ເພດ.

แชร์