ພິທີປະດັບຫຼຽນໄຊແຮງງານຊັ້ນ II ໃຫ້ກັບ ຄະນະນຳ, ຄະນະຄູຝຶກ ແລະນັກກິລາ ທີມຊາດລາວ ຮຸ່ນອາຍຸບໍ່ເກີນ 19 ປີ

ຕອນບ່າຍວັນທີ 19 ກໍລະກົດ 2022 ຢູ່ທີ່ ຫ້ອງວ່າການສຳນັກງານນາຍົກລັດຖະມົນຕີ, ໄດ້ມີພິທີປະດັບຫຼຽນໄຊແຮງງານຊັ້ນ II ຄະນະນຳ, ຄະນະຄູຝຶກ ແລະນັກກິລາ ທີມຊາດລາວ ຮຸ່ນອາຍຸບໍ່ເກີນ 19 ປີ ໄດ້ ຮອງແຊ້ມ ການແຂ່ງຂັນບານເຕະຊາຍຊີງແຊ້ມອາຊຽນ ຮຸ່ນອາຍຸບໍ່ເກີນ 19 ປີ ຢູ່ທີ່ປະເທດອິນໂດເນເຊຍ, ເຂົ້າຮ່ວມໃນພິທີດັ່ງກ່າວໂດຍມີທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ, ທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະກິລາ,​ ທ່ານ ວີເພັດ ສີຫາຈັກຣ ປະທານສະຫະພັນບານເຕະແຫ່ງຊາດລາວ, ຄະນະບໍລິຫານງານສະຫະພັນບານເຕະແຫ່ງຊາດລາວ, ຄະນະນຳ, ຄະນະຄູຝຶກ ແລະນັກກິລາ ທີມຊາດລາວ ຮຸ່ນອາຍຸບໍ່ເກີນ 19 ປີ ພ້ອມດ້ວຍພາກສ່ວນທີ່ກ່ຽວຂ້ອງ ແລະສື່ມວນຊົນເຂົ້າຮ່ວມ.​

ທ່ານ ພຸດ ສິມມາລາວົງ ລັດຖະມົນຕີ ກະຊວງສຶກສາທິການ ແລະກິລາ ແມ່ນໄດ້ກ່າວຈຸດປະສົງ ແລະລາຍງານຫຍໍ້ຜົນສຳເລັດ ການແຂ່ງຂັນບານເຕະຊາຍຊີງແຊ້ມອາຊຽນ ຢູ່ທີ່ປະເທດອິນໂດເນເຊຍ, ຫລັງຈາກນັ້ນໄດ້ມີພິທີປະດັບຫຼຽນໄຊແຮງຊັ້ນ II ໃຫ້ກັບຄະນະນຳ, ຄະນະຄູຝຶກ ແລະນັກກິລາ ຈຳນວນ 37 ທ່ານ ໂດຍແມ່ນທ່ານ ພັນຄຳ ວິພາວັນ ເປັນຜູ້ມອບ.

ໃນໂອກາດດຽວກັນນັ້ນ ທ່ານ ພັນຄຳ ວິພາວັນ ນາຍົກລັດຖະມົນຕີແຫ່ງ ສປປ ລາວ, ໄດ້ກ່າວຍ້ອງຍໍຊົມເຊີຍຕໍ່ຜົນສຳເລັດຂອງຄະນະນຳ, ຄະນະຄູຝຶກ ແລະນັກກິລາ ທີມຊາດລາວ ຮຸ່ນອາຍຸບໍ່ເກີນ 19 ປີ ໄດ້ ຮອງແຊ້ມ ການແຂ່ງຂັນບານເຕະຊາຍຊີງແຊ້ມອາຊຽນ ຮຸ່ນອາຍຸບໍ່ເກີນ 19 ປີ ຢູ່ທີ່ປະເທດອິນໂດເນເຊຍ ແລະພິເສດໄປກວ່າ ພູນິນ ໄຊຍະສອນ ໄດ້ຮັບລາງວັນຜູ້ຮັກສາປະຕູດີເດັ່ນ, ຜົນງານດັ່ງກ່າວແມ່ນການສ້າງຊື່ສຽງໃຫ້ກັບປະເທດຊາດ,ນຳຄວາມສູກມາສູ່ແຟນບານ, ລັດຖະບານຈຶ່ງໄດ້ມອບຫຼຽນໄຊແຮງງານຊັ້ນ II ເພື່ອເປັນສ້າງຜົນງານມາສູ່ປະເທດຊາດ.

ຈັນທະວີໄຊ ຂຸນທຸມພອນ ຕາງຫນ້ານັກກິລາໄດ້ກ່າວສະແດງຄວາມຮູ້ບຸນຄຸນແລະຂອບໃຈເປັນຢ່າງສູງມາຍັງການນຳພັກ, ລັດ, ທສະຫະພັນບານເຕະແຫ່ງຊາດລາວ,ຄູຝຶກ ແລະທຸກພາກສ່ວນຂອງສັງຄົມທີ່ເຮັດໃຫ້ພວກເຮົາມີຜົນງານດີຄືມື້ນີ້ແລະພວກເຮົາຂໍໃຫ້ຄຳໝັ້ນສັນຍາວ່າ,ຈະສືບຕໍ່ມູນເຊື້ອ ແລະນຳເອົາບົດຮຽນ,ປະສົບການທີ່ໄດ້ມາເພື່ອພັດທະນາຕົນເອງແລະໝູ່ຄະນະໃຫ້ດີຂຶ້ນໄປເລື້ອຍໆ ເພື່ອເປັນແບບຢ່າງທີ່ດີໃຫ້ແກ່ຊາວໜຸ່ມລາວຫັນມາຮັກການຫຼີ້ນກິລາແລະເອົາກິລາເພື່ອສ້າງຊື່ສຽງໃຫ້ແກ່ປະເທດຊາດ.

แชร์