ປະທານສະພາແຫ່ງຊາດລາວ ຕ້ອນຮັບການເຂົ້າພົບປະຂອງຄະນະຜູ້ແທນຂັ້ນສູງ ສສ ຫວຽດນາມ

ໃນວັນທີ 17 ກໍລະກົດ 2022, ທີ່ສະພາແຫ່ງຊາດລາວ, ທ່ານ ໄຊສົມພອນ ພົມວິຫານ, ກຳມະການກົມການເມືອງສູນກາງພັກ, ປະທານສະພາແຫ່ງຊາດລາວ ໄດ້ຕ້ອນຮັບການເຂົ້າພົບປະຂອງ ທ່ານ ຫວໍ ວັນ ເຖື້ອງ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ, ຫົວໜ້າຄະນະຊີ້ນໍາລະດັບຊາດ ສະເຫລີມສະຫລອງປີສາມັກຄີມິດຕະພາບ ຫວຽດນາມ-ລາວ, ໃນໂອກາດທີ່ໄດ້ນໍາພາຄະນະຜູ້ແທນຂັ້ນສູງຂອງ ສສ ຫວຽດນາມ ເດີນທາງມາຢ້ຽມຢາມ ສປປ ລາວ ແລະ ເຂົ້າຮ່ວມພິທີສະເຫລີມສະຫລອງປີສາມັກຄີມິດຕະພາບ ລາວ-ຫວຽດນາມ ກໍຄື ໂອກາດວັນສ້າງຕັ້ງສາຍພົວພັນການທູດ ລາວ-ຫວຽດນາມ ຄົບຮອບ 60 ປີ ແລະວັນເຊັນສົນທີສັນຍາມິດຕະພາບ ແລະການຮ່ວມມື ລາວ-ຫວຽດນາມ ຄົບຮອບ 45 ປີ, ທີ່ນະຄອນຫຼວງວຽງຈັນ.

ໃນການພົບປະຄັ້ງນີ້, ທ່ານ ໄຊສົມພອນ ພົມວິຫານ ໄດ້ສະແດງຄວາມຍິນດີຕ້ອນຮັບ ແລະຕີລາຄາສູງຕໍ່ຄະນະຜູ້ແທນຂັ້ນສູງຫວຽດນາມ ທີ່ໄດ້ເດີນທາງມາຢ້ຽມຢາມ ສປປ ລາວ ໃນຄັ້ງນີ້,ຊຶ່ງໄດ້ສະແດງໃຫ້ເຫັນເຖິງຄວາມໝາຍສໍາຄັນຂອງສາຍພົວພັນມິດຕະພາບອັນຍິ່ງໃຫຍ່,ຄວາມສາມັກຄີພິເສດແລະການຮ່ວມມືຮອບດ້ານລະຫວ່າງ ສອງພັກ ສອງລັດ ແລະ ປະຊາຊົນສອງຊາດ ລາວ-ຫວຽດນາມ ອ້າຍນ້ອງ, ພິເສດການມາຢ້ຽມຢາມຄັ້ງນີ້ ເປັນການນໍາເອົາໄມຕີຈິດມິດຕະພາບອັນດູດດື່ມ, ຄວາມສາມັກຄີຮັກເເພງອັນສະໜິດສະໜົມຂອງ ພັກ, ລັດ, ສະພາແຫ່ງຊາດ ຫວຽດນາມອ້າຍນ້ອງມາຍັງພັກ-ລັດ, ສະພາແຫ່ງຊາດລາວ ແລະກໍໄດ້ຖືໂອກາດນີ້ຝາກຄວາມຢື້ຢາມຖາມຂ່າວໄປຍັງ ທ່ານ ເວືອງ ດິງເຫວະ, ປະທານສະພາແຫ່ງຊາດຫວຽດນາມ. ໃນໂອກາດນີ້, ທ່ານປະທານສະພາແຫ່ງຊາດລາວກໍໄດ້ສະແດງຄວາມຊົມເຊີຍຕໍ່ຜົນສຳເລັດອັນໃຫຍ່ຫຼວງ ແລະ ຮອບດ້ານທີ່ປະຊາຊົນຫວຽດນາມອ້າຍນ້ອງຍາດມາໄດ້ພາຍໃຕ້ການນໍາພາອັນປີຊາສາມາດ, ສະຫລາດສ່ອງໃສຂອງພັກກອມມູນິດຫວຽດນາມ ໃນພາລະກິດປົດປ່ອຍຊາດໃນເມື່ອກ່ອນ ກໍຄື ພາລະກິດປ່ຽນແປງໃໝ່ແຫ່ງການສ້າງສາພັດທະນາ ແລະປົກປັກຮັກສາປະເທດຊາດ ໃນປັດຈຸບັນ. ພ້ອມນີ້, ສອງຝ່າຍກໍໄດ້ຕີລາຄາສູງ ແລະສະແດງຄວາມພາກພູມໃຈເປັນຢ່າງຍິ່ງທີ່ເຫັນວ່າບໍ່ວ່າຍຸກສະໄໝໃດສາຍພົວພັນມິດຕະພາບອັນຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງ ລາວ ແລະ ຫວຽດນາມ ກໍນັບມື້ນັບໄດ້ຮັບການເສີມຂະຫຍາຍໃຫ້ແຕກດອກອອກຜົນ ແລະ ເຂົ້າສູ່ລວງເລິກ, ຊຶ່ງໄດ້ສະແດງອອກໃຫ້ເຫັນຄື ການໄປມາຫາສູ່ກັນ ບໍ່ວ່າຈະເປັນການນຳຂັ້ນສູງ, ຈົນຮອດບັນດາຂະແໜງການສູນກາງ ແລະ ທ້ອງຖິ່ນຂອງສອງປະເທດ ໄດ້ແລກປ່ຽນພົບປະການຢ້ຽມຢາມເຊິ່ງກັນ ແລະກັນ ຢ່າງເປັນປົກກະຕິເພື່ອສືບຕໍ່ຮັດແໜ້ນສາຍພົວພັນພິເສດ ແລະຊຸກຍູ້ການຮ່ວມມືໃຫ້ຂະຫຍາຍຕົວເຊິ່ງໄດ້ປະກອບສ່ວນເຮັດໃຫ້ມີຄວາມໃກ້ຊິດຫລາຍຂຶ້ນ, ມີຄວາມເຂົ້າອົກເຂົ້າໃຈເຊິ່ງກັນ ແລະກັນ ແລະເຮັດໃຫ້ການພົວພັນຮ່ວມມືໄດ້ຮັບການເສີມຂະຫຍາຍ ແລະແຕກດອກອອກຜົນຍິ່ງຂຶ້ນ, ສະເພາະໃນຂອບການຮ່ວມມືຂອງສອງສະພາແຫ່ງຊາດ ລາວ-ຫວຽດນາມ ເຫັນວ່າ ສອງຝ່າຍໄດ້ເຮັດວຽກຮ່ວມກັນຢ່າງໃກ້ຊິດ, ໄດ້ມີການເສີມຂະຫຍາຍການພົວພັນຮ່ວມມື ແລະ ສາມາດນໍາປະໂຫຍດຕົວຈິງມາສູ່ສອງອົງການນິຕິບັນຍັດ,ສະແດງອອກໃນການແລກປ່ຽນຢ້ຽມຢາມຜູ້ແທນຂັ້ນຕ່າງໆ,ຈັດສຳມະນາໃນຫົວຂໍ້ທີ່ຈຳເປັນສຳລັບອົງການນິຕິບັນຍັດ, ມີການສົ່ງສານຊົມເຊີຍ, ສານອວຍພອນເຊິ່ງກັນ ແລະ ກັນ ໃນໂອກາດວັນສຳຄັນຕ່າງໆຂອງຊາດ,ການສະໜັບສະໜູນຊ່ວຍເຫຼືອ ແລະຮ່ວມມືກັນໃນເວທີລັດຖະສະພາພາກພື້ນ ແລະສາກົນ.

ໃນໂອກາດນີ້, ສະຫາຍປະທານສະພາແຫ່ງຊາດ ໄຊສົມພອນ ພົມວິຫານ ໄດ້ສະແດງຄວາມຂອບໃຈມາຍັງພັກ, ລັດຖະບານ ແລະປະຊາຊົນ ຫວຽດນາມ ອ້າຍນ້ອງທີ່ໄດ້ໃຫ້ການຊ່ວຍເຫຼືອອັນລໍ້າຄ່າ ແລະທັນການຕໍ່ ສປປ ລາວ ຕະຫຼອດໄລຍະຜ່ານມາ. ພິເສດແມ່ນການຊ່ວຍເຫຼືອອັນລໍ້າຄ່າເປັນຕົ້ນໂຄງການກໍ່ສ້າງຫໍສະພາແຫ່ງຊາດລາວຫລັງໃໝ່ ທີ່ມີຄວາມທັນສະໄໜທີ່ສຸດ, ສວຍງາມມີເອກະລັກຂອງວັດທະນະທໍາສະຖາປັດຕະຍະກໍາຂອງລາວທີ່ດີທີ່ສຸດ, ເປັນອາຄານທີ່ແໜ້ນໜາແຂງແຮງຈະໃຊ້ງານໄດ້ຍາວນານທີ່ສຸດ ແລະມີມູນຄ່າສູງທີ່ສຸດສໍາລັບຕຶກຫລັງໜຶ່ງເທົ່າທີ່ເຄີຍມີມາຢູ່ປະເທດລາວເຖິງປັດຈຸບັນນີ້ ແລະຂໍຖືໂອກາດນີ້ອວຍພອນໃຫ້ ທ່ານ ຫວໍ ວັນ ເຖື້ອງ ແລະຄະນະຜູ້ແທນຂັ້ນສູງຫວຽດນາມ ຈົ່ງປະສົບຜົນສຳເລັດໃນການເດີນທາງມາຢ້ຽມຢາມ ສປປ ລາວ ໃນຄັ້ງນີ້, ອວຍພອນໃຫ້ສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະການຮ່ວມມືຮອບດ້ານ ລາວ-ຫວຽດນາມ ຈົ່ງໝັ້ນຄົງຂະໜົງແກ່ນຕະຫຼອດກາລະນານ.

ໃນຕອນບ່າຍຂອງວັນດຽວກັນ, ທ່ານ ຫວໍ ວັນ ເຖື້ອງ, ກຳມະການກົມການເມືອງສູນກາງພັກ, ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມ ພ້ອມດ້ວຍຄະນະກໍໄດ້ເດີນທາງໄປທີ່ອານຸສອນສະຖານ ປະທານ ໄກສອນ ພົມວິຫານ ເພື່ອເຂົ້າຮ່ວມພິທີວາງກະຕ່າດອກໄມ້ເພື່ອສະແດງເຖິງຄວາມຮູ້ບຸນຄຸນອັນໃຫຍ່ຫລວງ ແລະຈົດຈຳລຳລຶກເຖິງຄຸນງາມຄວາມດີທີ່ຫາອັນປຽບບໍ່ໄດ້, ຜູ້ຊຶ່ງກຳຄັນທຸງໜ້າຂອງຂະບວນການຮັກຊາດ ແລະປະຕິວັດ, ນັກປະຕິວັດຮຸ່ນໜຸ່ມຂອງພັກທີ່ຍອມເສຍສະຫລະເລືອດເນື້ອຕໍ່ສູ້ກູ້ຊາດຢ່າງພິລະອາດຫານພາຍໃຕ້ການຊີ້ນຳ-ນຳພາຂອງພັກປະຊາຊົນ ປະຕິວັດລາວ ຈົນສາມາດປົດປ່ອຍປະເທດຊາດ ແລະ ນຳເອົາຄວາມຢູ່ເຢັນເປັນສຸກມາສູ່ປວງຊົນລາວທັງຊາດ ຈົນມາເຖິງປະຈຸບັນ. ຫຼັງຈາກນັ້ນ, ກໍໄດ້ສືບຕໍ່ເຂົ້າຮ່ວມພິທີເປີດງານວາງສະແດງຮູບພາບການພົວພັນຮ່ວມມືສອງຊາດ ລາວ-ຫວຽດນາມ ແຕ່ອະດີດຈົນເຖິງປັດຈຸບັນ.

ໃນວັນດຽວກັນນີ້, ທ່ານ ຫວໍ ວັນ ເຖື້ອງ, ກຳມະການກົມການເມືອງສູນກາງພັກ,ຜູ້ປະຈຳການຄະນະເລຂາທິການສູນກາງພັກກອມມູນິດຫວຽດນາມພ້ອມດ້ວຍຄະນະກໍ່ໄດ້ເດີນທາງໄປຢ້ຽມຢາມທ່ານ ຈູມມະລີ ໄຊຍະສອນ, ອະດີດເລຂາທິການໃຫຍ່, ປະທານປະເທດ ແຫ່ງ ສປປ ລາວ ແລະສືບຕໍ່ເຂົ້າຮ່ວມງານລ້ຽງຕ້ອນຮັບ,ຊຶ່ງຈັດໂດຍທ່ານ ທອງລຸນ ສີສຸລິດ, ເລຂາທິການໃຫຍ່, ປະທານປະເທດ ແຫ່ງ ສປປ ລາວ.

แชร์