ລັດຖະມົນຕີ ກຊສ ຕ້ອນຮັບ ປະທານຄະນະກຳມາທິການແມ່ນໍ້າມິສຊິຊິບປີ

ໃນວັນທີ 13 ກໍລະກົດ 2022 ທ່ານນາງ ບຸນຄຳ ວໍລະຈິດ ລັດຖະມົນຕີກະຊວງຊັບພະ ຍາກອນທໍາມະຊາດ ແລະ ສິ່ງແວດລ້ອມ (ກຊສ), ທັງເປັນປະທານຄະນະກໍາມະການ ແມ່ນໍ້າຂອງແຫ່ງຊາດລາວ, ສະມາຊິກສະພາມົນຕີ ຄະນະກໍາມາທິການແມ່ນໍ້າຂອງສາກົນ ສໍາລັບ ສປປ ລາວ ພ້ອມຄະນະ ໄດ້ຕ້ອນຮັບການເຂົ້າຢ້ຽມຂໍ່ານັບ ຂອງທ່ານ ພົນຕີ ນາງ Diana M. Holland ປະທານຄະນະກຳມາທິການ ແມ່ນໍ້າມິສຊິຊິບປີ (MiRC) ພ້ອມດ້ວຍຄະນະ ໃນໂອກາດເດີນທາງມາຢ້ຽມຢາມ ແລະ ເຮັດວຽກຢູ່ ພາກພື້ນແມ່ນໍ້າຂອງ.

ໂອກາດນີ້, ທ່ານ ລັດຖະມົນຕີ ກຊສ ກໍໄດ້ສະແດງຄວາມຍິນດີຕ້ອນຮັບ, ພ້ອມທັງສະແດງ ຄວາມຂອບໃຈ ຕໍ່ທ່ານ ພົນຕີ ນາງ Diana M. Holland ພ້ອມດ້ວຍຄະນະ ທີ່ໄດ້ມາຢ້ຽມຢາມ ສປປ ລາວ ແລະ ໃຫ້ການສະໜັບສະໜູນຊ່ວຍເຫຼືອ, ທັງເປັນຄູ່ຮ່ວມງານທີ່ດີ ຕໍ່ກັບຄະນະກໍາມາທິການ ແມ່ ນໍ້າຂອງສາກົນ(ຄມສ) ຕະຫລອດມາ. ພ້ອມທັງໄດ້ຍົກໃຫ້ເຫັນເຖິງຄວາມພະຍາຍາມ ແລະ ຄວາມເອົາໃຈ ໃສ່ ຂອງລັດຖະບານ ແຫ່ງສປປ ລາວ ໃນວຽກງານການຄຸ້ມຄອງສິ່ງແວດລ້ອມໃນລາວ ໂດຍສະເພາະ ການຄຸ້ມຄຸມຊັບພະຍາກອນນ້ຳ ແລະ ສິ່ງແວດລ້ອມໃນອ່າງແມ່ນໍ້າຂອງ ໂດຍໄດ້ຮ່ວມມືກັບບັນດາປະເທດສະມາຊິກ ຄະນະກຳມາທິການແມ່ນໍ້າຂອງສາກົນ ໃນການຕິດຕາມ ແລະ ແລກປ່ຽນຂໍ້ມູນຂ່າວສານທາງດ້ານ ສະພາບແວດລ້ອມ, ສະພາບອ່າງແມ່ນໍ້າ ແລະ ຍັງໄດ້ຮ່ວມມືກັບ ບັນດາປະເທດຄູ່ຮ່ວມເຈລະຈາ ກໍຄື ສປ ຈີນ ແລະ ສະຫະພາບມຽນມາ ໃນການແລກປ່ຽນຂໍ້ມູນຂ່າວສານ ທາງດ້ານອຸທົກກະສາດ.

ໂອກາດດຽວກັນ, ທ່ານ ພົນຕີ ນາງ Diana M. Holland ກໍໄດ້ສະແດງຄວາມຂອບໃຈ ຕໍ່ທ່ານ ລັດຖະມົນຕີ ທີ່ໄດ້ໃຫ້ການຕ້ອນຮັບອັນອົບອຸ່ນໃນຄັ້ງນີ້, ພ້ອມທັງແຈ້ງໃຫ້ຮູ້ເຖິງຈຸດປະສົງ ໃນການເຂົ້າຢ້ຽມຢາມໃນຄັ້ງນີ້ ເພື່ອສົນທະນາແລກປ່ຽນປະສົບການທີ່ດີ ແລະ ຖອດຖອນບົດຮຽນ ລະຫວ່າງຄະນະກໍາມາທິການ ແມ່ນໍ້າຂອງສາກົນ ແລະ ຄະນະກຳມາທິການແມ່ນ້ຳມິສຊິຊິບປີ ໂດຍສະເພາະບົດຮຽນໃນການຄຸ້ມຄອງ ແລະ ພັດທະນາ ອ່າງແມ່ນ້ຳຂອງ ເຊິ່ງເຫັນໄດ້ຈາກການໄປຢ້ຽມຢາມ ເຂື່ອນໄຟຟ້າໄຊຍະບູລີ ແລະ ປຶກສາຫາລື ກ່ຽວກັບສິ່ງທ້າທາຍ ຕໍ່ການປ່ຽນແປງດິນຟ້າອາກາດ, ການຄຸ້ມຄອງ ແລະ ສິ່ງແວດ ລ້ອມ, ການຄຸ້ມຄອງໄພນໍ້າຖ້ວມ, ໄພແຫ້ງແລ້ງ ແລະ ວຽກງານອື່ນໆ.

ທ່ານ ນາງ ບຸນຄຳ ວໍລະຈິດ ກໍໄດ້ສະແດງຄວາມຂອບໃຈ ຕໍ່ການມາຢ້ຽມຢາມ ແລະ ແລກປ່ຽນ ຄວາມຮູ້, ປະສົບການ ແລະ ບົດຮຽນ ໃນການຄຸ້ມຄອງອ່າງແມ່ນ້ຳ ແລະ ວຽກງານອື່ນໆທີ່ປິ່ນອ້ອມ ແລະ ເຊື່ອໝັ້ນຢ່າງຍິ່ງວ່າ ຄມສ ແລະ ຄະນະກຳມາທິການແມ່ນ້ຳມິສຊິຊິບປີ ຈະສືບຕໍ່ເຮັດວຽກຮ່ວມກັນ ໃນຂົງ ເຂດວຽກງານການຄຸ້ມຄອງອ່າງຮັບນ້ຳ ແລະ ສິ່ງແວດລ້ອມ ລວມທັງການປ່ຽນແປງດິນຟ້າອາກາດ ເຊິ່ງຈະເປັນການຮ່ວມມື ທີ່ມີປະໂຫຍດໃນອະນາຄົດ.

แชร์